.jpg)
Ramin Rezaeian (ស្តាំ) របស់អ៊ីរ៉ង់ដណ្តើមបាល់ជាមួយនឹងខ្សែប្រយុទ្ធចិន Zhang Yuning។ AFP
ក្រុងអាលអែន: លោក Marcello Lippi បានបញ្ជាក់ថាក្រុមបាល់ទាត់ជម្រើសជាតិចិនត្រូវតែរៀនពីរបៀបក្នុងការផ្តោតអារម្មណ៍សម្រាប់ការប្រកួតទាំងមូល នៅមុនពេលការប្រកួតដ៏សំខាន់របស់ពួកគេជាមួយនឹងក្រុមជម្រើសជាតិអ៊ីរ៉ង់ ក្នុងវគ្គ ៨ ក្រុមចុងក្រោយនៃព្រឹត្តិការណ៍ Asian Cup ដែលជាការប្រកួតដ៏ធំបំផុត និងអាចជាការប្រកួតចុងក្រោយរបស់លោកក្នុងនាមជាគ្រូបង្វឹក។
គ្រូបង្វឹកដែលធ្លាប់ឈ្នះពាន World Cup ជាមួយក្រុមជម្រើសជាតិអ៊ីតាលីរូបនេះបានកោតសរសើរកីឡាកររបស់ខ្លួនក្រោយពីពួកគេបានយកឈ្នះលើក្រុមជម្រើសជាតិថៃក្នុងលទ្ធផល ២-១ ដើម្បីឈានទៅវគ្គ ១/៤ ផ្តាច់ព្រ័ត្រតាមរយៈការបញ្ជាក់ថា ពួកគេបានបង្ហាញថា ពួកគេស្ថិតក្នុងចំណោមក្រុមដ៏ខ្លាំងបំផុតនៅអាស៊ី។
ប៉ុន្តែលោក Lippi វ័យ ៧០ ឆ្នាំបាននិយាយថា ចិននៅតែមានទម្លាប់នៃការខ្វះនូវការផ្តោតអារម្មណ៍ទាំងក្នុង និងក្រៅការប្រកួតក្រោយពីការបង្ហាញពីទម្រង់លេងចុះ និងឡើងមួយផ្សេងទៀតដែលនាំឲ្យពួកគេតាមពីក្រោយថៃ ១-០ រហូតដល់ពាក់កណ្តាលតង់ទី ២។
លោក Lippi ដែលត្រូវបានរំពឹងទុកថានឹងចាកចេញពីក្រុមជម្រើសជាតិចិន បន្ទាប់ពីព្រឹត្តិការណ៍ Asian Cup ក្រោយពីកាន់តំណែងបាន ២ ឆ្នាំកន្លះបាននិយាយថា៖ «កីឡាករចិនត្រូវតែពង្រឹងផ្នែកស្មារីតរបស់ខ្លួនឲ្យបានល្អប្រសើរ»។
គ្រូបង្វឹកចាស់វស្សារូបនេះបានបន្ថែមទៀតថា៖ «ពេលខ្លះពួកគេត្រូវតែផ្តោតអារម្មណ៍បន្ថែមទៀត និងមានការប្រុងប្រយ័ត្នជាងមុនក្នុងការប្រកួត។ វាជារឿងទាក់ទងនឹងចិត្តវិទ្យា។ វាពិតជាសំខាន់ណាស់ក្នុងការមានភាពតានតឹងដូចគ្នាការប្តេជ្ញាចិត្តដូចគ្នាតាំងពីចាប់ផ្តើមការប្រកួត»។
ក្រុមជម្រើសជាតិចិនបានធ្លាក់ចូលក្នុងការភិតភ័យនៅពេលប្រកួតជាមួយនឹងក្រុមជម្រើសជាតិថៃកាលពីថ្ងៃអាទិត្យនៅមុនពេលលោក Lippi បានផ្លាស់ប្តូររូបមន្តលេងរបស់លោកត្រឹមតង់ទី ១ ខណៈដែលពួកគេបានដាក់សម្ពាធលើក្រុមថៃយ៉ាងខ្លាំងក្នុងការប្រកួតតង់ទី ២។ ប៉ុន្តែ អ៊ីរ៉ង់ ដែលជាក្រុមមានចំណាត់ថ្នាក់ខ្ពស់ជាងគេប្រចាំអាស៊ីនឹងផ្តល់នូវការសាកល្បងដ៏ធំបំផុត ហើយការរំពឹងទុកគឺថាក្រុមជម្រើសជាតិចិននឹងធ្លាក់ចេញក្រោយពីការប្រកួតនៅរាត្រីថ្ងៃព្រហស្បតិ៍ក្នុងទីក្រុង Abu Dhabi។
លោក Lippi ហាក់បានព្យាយាមការពារកំណត់ត្រារបស់ខ្លួននៅពេលដែលលោកបានបង្ហាញពីស្ថិតិដោយក្នុងចំណោមការប្រកួត ១០ លើករបស់លោក ចិនបានយកឈ្នះ ៦ លើក និងចាញ់តែ ២ លើកគត់ពោលគឺក្រោមស្នាដៃក្រុមជម្រើសជាតិអ៊ីរ៉ង់ និងកូរ៉េខាងត្បូង។
លោកបានឲ្យដឹងថា៖ «នោះមានន័យថាខ្ញុំត្រូវតែមានមោទនភាពលើកីឡាកររបស់ខ្ញុំ។ ខ្ញុំពិតជាពេញចិត្ត ពីព្រោះក្រុមនេះកំពុងទទួលបានលទ្ធផលកាន់តែល្អ ហើយយើងស្ថិតក្នុងវគ្គ ៨ ក្រុមចុងក្រោយ ដែលមានន័យថាយើងជាក្រុមមួយក្នុងចំណោមក្រុមដ៏ខ្លាំងបំផុតរបស់អាស៊ី»។
ការឈានទៅវគ្គ ១/៤ ផ្តាច់ព្រ័ត្របានតាមស្មើកំណត់ត្រាដ៏ល្អរបស់ចិនកាលពីឆ្នាំ ២០១៥ ដែលនៅពេលនោះ Asian Cup មានត្រឹមតែ ១៦ ក្រុមប៉ុណ្ណោះ មិនមែន ២៤ ក្រុមឡើយ។
ក្រុមជម្រើសជាតិចិនមិនធ្លាប់បានឈ្នះពានប្រចាំទ្វីបនេះសោះក្នុងចំណោមការប្រកួត ១១ លើកកាលពីមុន។
ប៉ុន្តែលោក Lippi ក៏បារម្ភពីអនាគតសម្រាប់ក្រុមចិនផងដែរក្រោយពីប្រើប្រាស់កីឡាករវ័យចាស់ក្នុងជម្រើសទាំង ១១ នាក់ដំបូងក្នុងនោះរាប់បញ្ចូលទាំងកីឡាករ ៤ នាក់ដែលមានវ័យខ្ទង់ ៣០ ឆ្នាំ និងមានកីឡាករតែម្នាក់គត់ដែលមានវ័យតិចជាង ២៦ ឆ្នាំ៕ IS
