.jpg)
កីឡាករ Kompany ដែលក្លិប Man City នឹងកសាងរូបសំណាករបស់រូបគេដើម្បីបង្ហាញពីការគោរព។ AFP
ក្រុងឡុងដ៍៖ ក្លិប Man City នឹងផ្ដល់កិត្តិយសដល់អតីតប្រធានក្រុម Vincent Kompany ជាមួយការកសាងរូបសំណាករបស់កីឡាករបែលហ្ស៊ិករូបនេះ នៅខាងក្រៅកីឡដ្ឋាន Etihad។
ក្លិប Man City បានបង្ហាញពីការគោរពរបស់ពួកគេចំពោះកីឡាករ Kompany តាមរយៈការកសាងរូបសំណាក ហើយថែមទាំងយកឈ្មោះរបស់គាត់ដាក់ជាឈ្មោះផ្លូវមួយនៅកន្លែងហ្វឹកហាត់របស់ក្លិបនេះផងដែរ។
ក្លិប Man City បាននិយាយថា៖ «ផ្លូវដែលតភ្ជាប់ពីសាលាហ្វឹកហាត់បាល់ទាត់របស់ក្លិប Man City ទៅមជ្ឈមណ្ឌលក្រុមដំបូងរបស់ក្លិបនេះត្រូវបានដាក់ឈ្មោះជាថ្មីថា ''Vincent Kompany Crescent'' ដើម្បីជាការអបអរពីការរកបានគ្រាប់បាល់ដែលមិនអាចបំភ្លេចបាននៅក្នុងការប្រកួតឲ្យក្រុម Man City នៅឆ្នាំ ២០១២»។
ក្លិបនេះបានបន្តទៀតថា៖ «ប្រធានក្លិបលោក Khaldoon Al Mubarak បានប្រាប់ Kompany ថា ក្លិបនេះក៏បានចាប់ផ្ដើមដំណើរការសាងសង់រូបសំណាក ដើម្បីទទួលស្គាល់ និងអបអរជាសាធារណៈពីសមិទ្ធផល និងការរួមចំណែករបស់គាត់ជាមួយក្រុម Man City ហើយនៅពេលកសាងរួច រូបសំណាកនេះនឹងត្រូវដាក់តាំងនៅខាងក្រៅកីឡដ្ឋាន Etihad»។
កីឡាករ Kompany បាននិយាយតាមគេហទំព័រផ្លូវការរបស់ក្លិប Man City ថា៖ «ខ្ញុំពិតជាមានកិត្តិយសយ៉ាងខ្លាំងដែលក្លិបពិសេសនេះបានផ្ដល់ឲ្យបែបនេះ»។
កីឡាកររូបនេះបានបន្ថែមទៀតថា៖ «ការធ្វើដំណើរដែលយើងបានបន្តរួមគ្នាពេញ ១១ ឆ្នាំ នៅក្នុងក្លិប Man City នេះបានកែប្រែជីវិតរបស់ខ្ញុំ ហើយខ្ញុំពិតជាសប្បាយចិត្តណាស់ដែលបានរួមចំណែក ១ ផ្នែកតូចមួយក្នុងការផ្លាស់ប្ដូរមាគ៌ានៃប្រវត្តិសាស្ត្ររបស់ក្លិបនេះនៅក្នុងអំឡុងពេលនោះ»។
កីឡាករ Kompany បានបន្តទៀតថា៖ «ការបង្កើតទំនាក់ទំនងជាប់ជានិច្ចជាមួយកន្លែងដែលនឹងធ្វើឲ្យខ្ញុំមានន័យបំផុតនេះ គឺពិតជាពិសេសមែនទែន ហើយខ្ញុំនឹងដឹងគុណម្ចាស់ក្លិប លោក Sheikh Mansour ប្រធានក្លិបលោក Khaldoon Al Mubarak និងអ្នកដែលពាក់ព័ន្ធនឹងក្លិប Man City នេះទាំងអស់ចំពោះការគាំទ្រ និងការផ្ដល់កិត្តិយសដែលមិនអាចកាត់ថ្លៃបាននេះ»។
កីឡាករវ័យ ៣៣ ឆ្នាំរូបនេះ បានចាកចេញពីម្ចាស់ជើងឯក Premier League កាលពីខែឧសភា ដើម្បីធ្វើជាជំនួយការគ្រូបង្វឹកនៅក្លិប Anderlecht។
កីឡាករ Kompany គឺជាកីឡាករឆ្នើមម្នាក់ដែលបានជួយឲ្យក្រុម Man City ឈ្នះពានរង្វាន់ Premier League ចំនួន ៤ លើក ព្រមទាំងឈ្នះពានរង្វាន់ក្នុងស្រុកមួយចំនួនទៀតក្នុងរយៈពេល ១១ ឆ្នាំនោះផងដែរ។
លោក Al Mubarak បាននិយាយថា៖ «Kompany គឺជាឥស្សរជនពិសេសមួយក្នុងប្រវត្តិសាស្ត្រនៃក្លិបបាល់ទាត់ Man City ព្រោះគាត់មិនត្រឹមតែជាអ្នកដឹកនាំដែលចេះលើកចិត្ត និងគួរឲ្យគោរពនៅលើទីលានប្រកួតប៉ុណ្ណោះទេ ប៉ុន្តែគាត់ថែមទាំងជាអង្គទូតដ៏ប៉ិនប្រសប់ម្នាក់ផងដែរ»។
ប្រធានក្លិបរូបនេះបានបន្តថា៖ «ការរួមចំណែករបស់គាត់នឹងធ្វើឲ្យយើងចងចាំជារៀងរហូត ហើយអ្នកគាំទ្រក្លិប និងសហគមន៍បាល់ទាត់នឹងទទួលស្គាល់កីឡាករ Kompany ថាជាកីឡាករនិមិត្តរូបម្នាក់ដែលលេងនៅក្របខ័ណ្ឌ Premier League សម្រាប់ជំនាន់របស់ពួកគេ»៕ AFP/SN
