ក្រុងវ៉ាស៊ីនតោន: ម្ចាស់ការពារតំណែងជើងឯកពិភពលោក ២ សម័យកាល Marc Marquez បានឈ្នះការប្រណាំងម៉ូតូ MotoGP Grand Prix of the Americas ជាលើកទី ៦ ជាប់ៗគ្នារបស់គេ កាលពីថ្ងៃអាទិត្យ បើទោះបីធ្លាក់ចេញពីលេខរៀងនាំមុខគេ រហូតដល់លេខរៀងទី ៤ លើទីលាន ដោយសារតែការរងពិន័យការប្រណាំងជម្រុះក៏ដោយ។
កីឡាករសញ្ជាតិបារាំងរបស់ក្រុម Honda រូបនេះបានឈ្នះដោយនាំមុខក្នុងថិរវេលា ៣,៥ វិនាទីលើមិត្តរួមជាតិរបស់ខ្លួន Maverick Vinales របស់ក្រុម Yamaha ក្នុងការប្រណាំងចំនួន ២០ ជុំ លើចម្ងាយប្រមាណជា ៥,៥១៣ គីឡូម៉ែត្រ នៅលើទីលានផ្លូវខ្វាត់ខ្វែងក្នុងទីក្រុង Austin រដ្ឋតិចសាស ខណៈដែលកីឡាករអ៊ីតាលី Andrea Iannone របស់ក្រុម Suzuki ស្ថិតក្នុងចំណាត់ថ្នាក់លេខ ៣។
Marquez វ័យ២៥ឆ្នាំ បានទទួលជ័យជម្នះក្នុងការប្រកួតជម្រុះដណ្តើមលេខរៀងលើទីលានទាំង ៥ លើកកាលពីមុន នៅលើទីលាននៃទីក្រុង Austin ខណៈដែលរូបគេបានឈ្នះការប្រណាំង MotoGP ជាលើកទី ១ របស់គេនៅលើទីលាននេះ កាលពីឆ្នាំ ២០១៣ មុននឹងបន្តស្ថិតនៅលើលេខរៀងទី ១ លើទីលានសម្រាប់ឆ្នាំទី ៦ ជាប់ៗគ្នា។
ប៉ុន្តែ កីឡាករសញ្ជាតិអេស្ប៉ាញរូបនេះ បានចាប់ផ្តើមប្រណាំងដោយស្ថិតលើលេខរៀងទី ៤ លើទីលាន ក្រោយពីរងពិន័យកាត់ ៣ លេខរៀង សម្រាប់ការបន្ថយល្បឿន និងផ្តល់ការរំខានដល់ Vinales លើផ្លូវល្បឿនលឿន ក្នុងការប្រកួតជម្រុះកាលពីថ្ងៃសៅរ៍។
Marquez ដណ្តើមបានលេខរៀងទីភ្លាមៗក្នុងពេលចាប់ផ្តើមប្រណាំង ហើយបន្តដណ្តើមការនាំមុខ នៅមុនពេលជុំទី ១ បញ្ចប់ ខណៈដែលរូបគេបានរក្សាការនាំមុខរហូតដល់បញ្ចប់ការប្រណាំង។
Marquez បានឲ្យដឹងថា៖ «វាជាយុទ្ធសាស្ត្ររបស់ខ្ញុំក្នុងការចាប់ផ្តើម និងជំរុញឆ្ពោះទៅមុខ។ ខ្ញុំមិនមានការជឿជាក់ក្នុងការប្រជែងឡើយ។ ខ្ញុំគ្រាន់តែឆ្ពោះទៅមុខ និងបើកឲ្យមានគម្លាតមួយ ហើយជាការរំពឹងទុក ខ្ញុំនាំមុខដាច់»៕