.jpg)
Nadal លើកពាននៅក្រុងរ៉ូមជាលើកទី១០ បន្ទាប់ពីផ្ដួល Djokovic កាលពីថ្ងៃអាទិត្យ។ រូបថត AFP
ក្រុងរ៉ូម៖ កីឡាករវាយកូនបាល់អាជីព (តិន្នីស) សញ្ជាតិអេស្ប៉ាញ Rafael Nadal បានផ្ដួលកីឡាករលេខ ១ ពិភពលោក Novak Djokovic របស់ស៊ែប៊ី ដើម្បីឈ្នះពានក្នុងកម្មវិធី Italian Open កាលពីថ្ងៃអាទិត្យ និងបង្កើតបាននូវសញ្ញាដ៏សំខាន់នៅមុន ២ សប្ដាហ៍ ពីការធ្វើយុទ្ធនាការការពារតំណែងជើងឯក Roland Garros (French Open) របស់ខ្លួន។
កីឡាករ Nadal ដែលមានចំណាត់ថ្នាក់លេខ ២ ក្នុងកម្មវិធីនេះ ដណ្ដើមបានជ័យជម្នះពី Djokovic ដែលជាជើងឯកចាស់ ជាមួយនឹងលទ្ធផល ២ សិតទល់ ១ គឺ ៧-៥ ១-៦ និង ៦-៣ ដោយប្រើពេល ២:៤៩ ម៉ោង ខណៈនេះជាការជួបគ្នាលើកទី៥៧ រវាងកីឡាករឆ្នើមទាំង ២ ក្នុងការប្រកួតអាជីព។
កីឡាករលេខ ៣ ពិភពលោក Nadal បាននិយាយថា៖ «វាជារឿងវិសេសវិសាលណាស់ ដែលខ្ញុំកាន់ពានរង្វាន់នេះជាលើកទី១០។ ជារឿងពិបាកនឹងស្រមើស្រមៃណាស់។ ខ្ញុំចាំបានថា ខ្ញុំឈ្នះវគ្គផ្ដាច់ព្រ័ត្រលើកទី១ នៅទីក្រុងរ៉ូមនេះ កាលពីឆ្នាំ ២០០៥ ពេលនោះប្រកួតជាមួយ (Guillermo) Coria ដែលប្រើរយៈពេលដល់ទៅ ៥ ម៉ោង ព្រោះត្រូវលេងដល់ទៅ ៥ សិត»។
កីឡាករ Djokovic និង Nadal ជួបគ្នាលើកចុងក្រោយ នៅមុននេះ គឺក្នុងវគ្គផ្ដាច់ព្រ័ត្រនៃកម្មវិធី French Open 2020 ដែលកីឡាករអេស្ប៉ាញវ័យ ៣៤ ឆ្នាំ ឈ្នះទាំង ៣ សិតត្រួត។ កីឡាករកំពូលទាំង ២ លើកពានកម្មវិធី Italian Open នេះ ដល់ទៅ ១៥ លើកហើយក្នុងចំណោម ១៧ ដងចុងក្រោយ។
ចំណែកផ្នែកនារី ពានរង្វាន់នេះ បានធ្លាក់ទៅក្នុងដៃរបស់កីឡាការិនីសញ្ជាតិប៉ូឡូញ Iga Swiatek ក្រោយពីបានយកឈ្នះកីឡាការិនីរបស់ឆែក Karolina Pliskova ៦-០ និង ៦-០៕ AFP/VN
