ក្រុងឡុងដ៍ៈ គ្រូបង្វឹកក្រុមបាល់ទាត់នារីអង់គ្លេសលោក Phil Neville ជឿថា កីឡាករបាល់ទាត់គួរតែធ្វើពហិការប្រព័ន្ធផ្សព្វផ្សាយសង្គមក្រោយពីខ្សែបម្រើ Paul Pogba នៅក្លិប Man Utd បានក្លាយជាកីឡាករចុងក្រោយបំផុតដែលរងការបៀតបៀនពូជសាសន៍តាមប្រព័ន្ធអ៊ីនធឺណិត។
កីឡាករ Pogba ត្រូវបានគេចាប់អារម្មណ៍ខ្លាំងក្រោយពីការស៊ុតបាល់ពិន័យរបស់គេត្រូវបានសង្គ្រោះបានយ៉ាងល្អដែលធ្វើឲ្យលទ្ធផលប្រកួតស្មើគ្នា១-១ រវាងក្រុម Man Utd និង ក្លិប Wolves កាលពីថ្ងៃចន្ទនៅរយៈពេលប៉ុន្មានថ្ងៃក្រោយពីខ្សែប្រយុទ្ធ Tammy Abraham នៅក្លិប Chelsea បានរងគ្រោះដោយការបៀតបៀនដូចគ្នានេះដែរ។
លោក Neville បាននិយាយពីថ្ងៃពុធថា៖ «ខ្ញុំគិតថា យើងប្រហែលជាត្រូវចាត់វិធានការឲ្យខ្លាំងឥឡូវនេះក្នុងនាមជាសហគមន៍បាល់ទាត់ព្រោះថា កូនក្រុមរបស់ខ្ញុំធ្លាប់បានរងគ្រោះនៅតាមប្រព័ន្ធផ្សព្វផ្សាយសង្គម ហើយតារាបាល់ទាត់នៅ Premier League និង Championship ក៏ធ្លាប់រងគ្រោះបែបនេះដែរ»។
គ្រូបង្វឹករូបនេះបានបន្ថែមថា៖ «ខ្ញុំគ្រាន់តែឆ្ងល់ថា ក្នុងនាមជាសហគមន៍បាល់ទាត់ ហេតុអ្វីបានជាយើងមិនព្រមបញ្ឈប់ប្រព័ន្ធផ្សព្វផ្សាយសង្គម? ព្រោះប្រព័ន្ធ Twitter នឹងមិនធ្វើអ្វីដើម្បីដោះស្រាយរឿងនេះទេ ហើយប្រព័ន្ធ Instagram ក៏នឹងមិនធ្វើអ៊ីចឹងដែរដោយ ពួកគេគ្រាន់តែផ្ញើអ៊ីមែលទៅអ្នកនិយាយថា ពួកគេនឹងស៊ើបអង្កេត ប៉ុន្តែស្ងាត់ឈឹង»។
លោក Neville បានបន្ថែមទៀតថា៖ «ខ្ញុំបានបាត់បង់ទំនុកចិត្តទាំងស្រុងចំពោះអ្នកដែលគ្រប់គ្រងផ្នែកប្រព័ន្ធផ្សព្វផ្សាយសង្គម ដូច្នេះចូរយើងផ្ញើសារខ្លាំងៗ៖ ឈប់ប្រើប្រព័ន្ធផ្សព្វផ្សាយសង្គមរយៈពេល ៦ ខែ ហើយយើងរង់ចាំមើលផលដែលមាននៅតាមក្រុមហ៊ុនផ្សព្វផ្សាយសង្គមទាំងនេះ»។
ខ្សែបម្រើ Harry Maguire នៅក្រុម Man Utd ក៏បានអំពាវនាវឲ្យក្រុមហ៊ុនផ្សព្វផ្សាយសង្គម Twitter និង Instagram មានភាពសកម្មថែមទៀត ក្នុងការបញ្ឈប់ «សកម្មភាពអសីលធម៌»។
កីឡាករ Maguire ជាខ្សែបម្រើមានតម្លៃខ្លួនថ្លៃបំផុតក្នុងពិភពលោកដែលក្លិប Man Utd បានចំណាយរហូតដល់ ៨០ លានផោន ប្រហែល ៩៧ លានដុល្លារ ដើម្បីទិញពីក្រុម Leicester នៅដើមខែនេះ បាននិយាយតាមប្រព័ន្ធ Twitter ថា៖ «គួរឲ្យស្អប់ខ្ពើមណាស់ដូច្នេះហើយប្រព័ន្ធផ្សព្វផ្សាយសង្គមត្រូវតែធ្វើអ្វីម្យ៉ាងដើម្បីដោះស្រាយរឿងនេះ»។
កីឡាកររូបនេះបានបន្ថែមថា៖ «គ្រប់ការបង្កើតគណនីទាំងអស់គួរតែត្រូវផ្ទៀងផ្ទាត់ដោយលិខិតឆ្លងដែន ឬបណ្ណបើកបរ ហើយសូមបញ្ឈប់សកម្មភាពអសីលធម៌ដោយបង្កើតគណនីមួយចំនួនដើម្បីបៀតបៀនមនុស្សតាម Twitter និង Instagram ទៀតទៅ»។
គណនីមួយចំនួនដែលបង្កើតឡើងដើម្បីវាយប្រហារ Pogba នោះក្រោយមកត្រូវបានលុបចោលវិញ ចំណែកមួយចំនួនទៀតទំនងជានឹងត្រូវបានចាត់វិធានការជាបណ្ដើរៗហើយ។
លក្ខខណ្ឌប្រព័ន្ធ Twitter ចែងថា គេ «នឹងចាត់វិធានការប្រឆាំងទៅនឹងទង្វើដែលមានបំណងវាយប្រហារបុគ្គលក្នុងលក្ខណៈស្អប់ខ្ពើម»។
ក្រុម Man Utd បាននិយាយក្នុងរបាយការណ៍ថា ពួកគេត្រូវបាន «ស្អប់ខ្ពើម» តាមរយៈការបៀតបៀនពូជសាសន៍ដោយអះអាងថា៖ «អ្នកបញ្ចេញមតិយោបល់ទាំងនេះមិនបង្ហាញពីតម្លៃនៃក្លិបអស្ចារ្យរបស់យើងទេ ប៉ុន្តែវាថែមទាំងកំពុងជំរុញឲ្យអ្នកគាំទ្ររបស់យើងកាន់តែរិះគន់ខ្លាំងឡើងនៅតាមប្រព័ន្ធផ្សព្វផ្សាយសង្គមផងដែរ»។
ក្រុមបិសាចក្រហមនេះបានបន្ថែមថា៖ «ក្រុម Man Utd មិនទទួលយកការរើសអើងពូជសាសន៍គ្រប់ទម្រង់ទាំងអស់ ហើយប្ដេជ្ញាបង្កើតយុទ្ធនាការប្រឆាំងនឹងបញ្ហានេះតាមរយៈគំនិតផ្ដួចផ្ដើមរបស់យើង All Red All Equal»។
ក្រុមនេះបានបន្ថែមទៀតថា៖ «យើងនឹងធ្វើការវែកមុខអ្នកដែលពាក់ព័ន្ធនឹងរឿងនេះ និងចាត់វិធានការខ្លាំងបំផុតតាមលទ្ធភាពរបស់យើង ហើយយើងក៏សូមជំរុញឲ្យក្រុមហ៊ុនប្រព័ន្ធផ្សព្វផ្សាយសង្គមចាត់វិធានការហ្មត់ចត់ក្នុងករណីទាំងនេះផងដែរ»។
សូមបញ្ជាក់ថា អ្នករិះគន់ជាច្រើននិយាយថា Pogba គួរតែទុកឲ្យកីឡាករ Marcus Rasford ស៊ុតបាល់ពិន័យក្នុងការប្រកួតជាមួយក្រុម Wolves ដោយសារកីឡាកររូបនេះ បានស៊ុតចូលយ៉ាងល្អក្នុងការប្រកួតបើកឆាករដូវកាលថ្មីនេះជាមួយក្លិប Chelsea កាលពីចុងសប្ដាហ៍មុន៕ AFP/SN