អាមេរិកៈ ខ្សែប្រយុទ្ធវ័យក្មេង Edward Nketiah រកបាន ១ គ្រាប់ ចុងក្រោយនៅរយៈពេល ២ នាទី មុនពេលបញ្ចប់ការប្រកួតដែលជួយឲ្យក្លិបកាំភ្លើងធំ Arsenal ឈ្នះក្លិប Bayern Munich ២-១ នៅក្នុងការប្រកួតមិត្តភាពមុនរដូវកាលនៅរដ្ឋកាលីហ្វ័រញ៉ាសហរដ្ឋអាមេរិកកាលពីថ្ងៃពុធ។
ក្រុមកាំភ្លើងធំបាននាំមុខ ១ គ្រាប់ដោយសារក្រុម Bayern ធ្វើឲ្យចូលទីខ្លួនឯងនៅនាទីទី៤៩ ហើយក្នុងនាទីទី៧១ កីឡាករ Louis Poznanski រកបាន ១ គ្រាប់វិញប៉ុន្តែនៅនាទីទី៨៨ កីឡាករ Nketiah រកបាន ១ គ្រាប់ ធ្វើឲ្យក្រុមកាំភ្លើងធំឈ្នះក្លិប Bayern ២-១។
ជ័យជម្នះនេះបានធ្វើឲ្យលោក Unai Emery ជាគ្រូបង្វឹករបស់ក្លិប Arsenal បានប្ដេជ្ញាចិត្តថានឹងផ្ដល់ឱកាសឲ្យបានច្រើនសម្រាប់កីឡាករវ័យក្មេងក្រោយពីកីឡាករវ័យ ២០ ឆ្នាំ Nketiah រកបាន ១ គ្រាប់ចុងក្រោយ ជួយឲ្យក្រុម Arsenal ឈ្នះក្នុងការប្រកួតមិត្តភាពនេះ។
គ្រូបង្វឹករូបនេះបាននិយាយថា៖ «យើងមានទទួលខុសត្រូវជាមួយកីឡាករក្មេងៗ ដើម្បីផ្ដល់ឱកាសដល់ពួកគេបន្ថែមទៀតព្រោះយើងចង់ឲ្យកីឡាករក្មេងៗមួយចំនួនជួយយើង»។
លោក Emery បានបន្ថែមថា៖ «កីឡាករមួយចំនួននឹងនៅជាមួយយើងក្នុងការប្រកួតមុនរដូវកាលនេះ ខណៈមួយចំនួនទៀតនឹងនៅជាមួយយើងក្នុងការប្រកួតក្នុងរដូវកាលព្រោះពួកគេបានបង្ហាញទម្រង់លេងបានល្អនៅគ្រប់នាទីទាំងអស់នៅពេលប្រកួតជាមួយក្រុមធំមួយនេះ»។
គ្រូបង្វឹកសញ្ជាតិអេស្ប៉ាញរូបនេះបានបន្តថា៖ «ទំនួលខុសត្រូវរបស់យើងសម្រាប់ប្រវត្តិសាស្ត្រ បច្ចុប្បន្នកាល និងអនាគតកាលរបស់ក្លិបនេះ គឺត្រូវផ្ដល់ឱកាសដល់កីឡាករក្មេងៗថែមទៀត»៕ AFP/SN