.jpg)
ខ្សែបម្រើអន្តរជាតិអង់គ្លេស Alex Oxlade-Chamberlain របស់ Liverpool សម្តែងនូវការឈឺចាប់ក្នុងពេលមានរបួស។ AFP
ក្រុងឡុងដ៍: ខ្សែបម្រើ Alex Oxlade-Chamberlain របស់ក្លិប Liverpool អាចនឹងត្រូវអវត្តមានក្នុងរដូវកាលទាំងមូលខាងមុខនេះ ខណៈដែលក្លិបស្ថិតក្នុងក្របខ័ណ្ឌ Premier League មួយនេះ បានបញ្ជាក់កាលពីថ្ងៃពុធថា ពួកគេបានដឹងពីរយៈពេលនៃការអវត្តមាននេះរួចជាស្រេច។
ខ្សែបម្រើវ័យ២៤ឆ្នាំរូបនេះ បានរងរបួសយ៉ាងធ្ងន់ត្រង់ជង្គង់ អំឡុងពេលនៃការប្រកួតជើងទី១ក្នុងក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជាមួយនឹងក្រុម Roma កាលពីខែមេសា និងទទួលការវះកាត់យ៉ាងជោគជ័យ ក្នុងរយៈពេល៨ថ្ងៃក្រោយ។
ក្លិប Liverpool បានឲ្យដឹងក្នុងសេចក្តីថ្លែងការណ៍មួយថា៖ «រយៈពេលនៃការអវត្តមានរបស់គេ មិនត្រូវបានប្រកាសឲ្យដឹងក្នុងពេលនោះឡើយតាមការស្នើសុំពី Oxlade-Chamberlain ដែលមិនចង់ឲ្យព័ត៌មាននេះ រំខានដល់យុទ្ធនាការក្នុងក្របខ័ណ្ឌ Champions League របស់ក្រុមហង្សក្រហម និងការរំភើបនានាជុំវិញយុទ្ធនាការនេះ»។
ខ្សែបម្រើអន្តរជាតិអង់គ្លេស Alex Oxlade-Chamberlain (ឆ្វេង) របស់ Liverpool រងរបួស ក្រោមការប្រជែងដណ្តើមបាល់ពីខ្សែការពារស៊ែប៊ី Aleksandar Kolarov របស់ Roma។ AFP
លោក Jurgen Klopp ដែលជាអ្នកចាត់ការទូទៅ បានប្រាប់គេហទំព័រ liverpoolfc.com ថា លោកបានដឹងថា អតីតតារាឆ្នើមរបស់ក្លិប Arsenal រូបនេះ អាចនឹងត្រូវអវត្តមានសម្រាប់រដូវកាលឆ្នាំ២០១៨-២០១៩។
លោក Klopp បានឲ្យដឹងថា៖ «វាបង្ហាញថា ពេលនេះ គឺជាពេលដ៏ស័ក្តិសមក្នុងការប្រាប់គ្រប់គ្នាថា Ox នឹងផ្តោតលើការសម្រាកព្យាបាល និងការវិលទៅរកភាពរឹងមាំវិញ នៅរដូវកាលខាងមុខនេះ»៕ IS
