.jpg)
Quartararo (២០) នាំមុខគេ ក្នុងការប្រណាំងនៅអេស្ប៉ាញកន្លងមក។ AFP
ក្រុងប៊ឺណូ៖ កីឡាករប្រណាំងម៉ូតូអាជីព Fabio Quartararo កំពុងសម្លឹងមើលនូវការមានជ័យជម្នះ ៣ ដំណាក់កាលបន្តបន្ទាប់គ្នា ពេលទៅចូលរួមប្រណាំងកម្មវិធី Czech Republic Grand Prix នៅឯក្រុងប៊ឺណូ ប្រទេសឆែក នាថ្ងៃអាទិត្យចុងសប្ដាហ៍នេះ ខណៈម្ចាស់ជើងឯកចាស់កម្មវិធីនេះ កីឡាករ Marc Marquez បានត្រឹមតែឈរមើលក្រៅទីលាន ក្រោយឆ្លងកាត់ការវះកាត់ដៃបាក់ជាលើកទី២។
កីឡាករបារាំង Quartararo របស់ក្រុមប្រណាំង Yamaha ដែលឈរនៅទីកំពូលក្នុងតារាងពិន្ទុសរុបនៃកម្មវិធី MotoGP ដោយមាន ៥០ ពិន្ទុ ក្រោយបញ្ចប់បាន ២ ដំណាក់កាល មិនធ្លាប់បានឡើងទៅឈរនៅលើវេទិកានៅក្រុងប៊ឺណូនេះទេ តែជ័យជម្នះនៅទីលាននាក្រុង Jerez ក្នុងខែកក្កដា បានធ្វើឲ្យកីឡាករវ័យ ២១ ឆ្នាំរូបនេះ ក្លាយជាអ្នកកាច់ចង្កូតម៉ូតូ ១ រូប ត្រូវបានគ្រប់គ្នាតាមសម្លឹងដោយមិនដាក់ភ្នែក នៅឯទីលានប្រណាំងចម្ងាយ ៥,៤ គ.ម នាក្រុងទី ២ របស់ប្រទេសសាធារណរដ្ឋឆែកនេះ។
កីឡាករ Quartararo បាននិយាយមុនការប្រណាំងកើតឡើងថា៖ «ទីលាននៅប៊ឺណូនេះ គឺជាផ្លូវប្រណាំង ដែលខ្ញុំពិតជាចូលចិត្តមែនទែន។ យើងមានបទពិសោធកាលពីឆ្នាំមុន ដែលធ្វើឲ្យយើងដឹងថា យើងអាចបើកបរលឿននៅទីលាននោះបាន ហើយជឿថា យើងធ្វើបាន បើទោះបីមិនមែនជាទីលានល្អបំផុតសម្រាប់ម៉ូតូយើងក៏ដោយ»។
កីឡាករ Quartararo បានបន្ថែមថា៖ «វាជារឿងអស្ចារ្យណាស់ ដែលបានទៅប្រណាំងនៅទីនោះ ក្រោយឈ្នះបាន ២ ដំណាក់កាល ហើយយើងកំពុងចង់ធ្វើយ៉ាងណាឡើងទៅឈរនៅលើវេទិកានាចុងសប្ដាហ៍នេះ។ ក្ដីរំពឹងរបស់យើង ទំនងជាខ្ពស់បន្តិច តែមិនអីទេ ខ្ញុំអាចចាំបាន»។
ក្រោយបញ្ចប់ការប្រណាំង ២ ដំណាក់កាល គឺកម្មវិធី Spanish Grand Prix និង Andalusian Grand Prix នៅប្រទេសអេស្ប៉ាញ ឃើញថា កីឡាករ Quartararo កំពុងនាំមុខក្នុងតារាងពិន្ទុសរុប ១០ ពិន្ទុ លើមិត្តរួមក្រុម គឺអ្នកប្រណាំងសញ្ជាតិអេស្ប៉ាញ Maverick Vinales រីឯអ្នកឈ្នះកម្មវិធីប្រណាំងនៅក្រុងប៊ឺណូនេះ ក្នុងឆ្នាំ ២០១៨ និងជាអ្នកមកដល់ទីលំដាប់ទី២ កាលពីឆ្នាំមុន កីឡាករសញ្ជាតិអ៊ីតាលី Andrea Dovizioso របស់ក្រុម Ducati ឈរនៅចំណាត់ថ្នាក់លេខ ៣។
ចំណែកកីឡាករអន្តរជាតិអេស្ប៉ាញ Marquez ដែលជាម្ចាស់ជយលាភីឆ្នាំ ២០១៩ នៅប៊ឺណូនេះ និងជាជើងឯកពិភពលោក ៦ សម័យកាល អត់បានចូលរួមប្រណាំងទេឆ្នាំនេះ ដោយសារបាក់ដៃស្ដាំ ក្រោយមានឧបទ្ទវហេតុដ៏ធ្ងន់មួយក្នុងថ្ងៃបើករដូវកាលនាក្រុង Jerez ហើយបើទោះជាទទួលការវះកាត់ដល់ទៅ ២ ដង ក៏កីឡាករវ័យ ២៧ ឆ្នាំ នៅមិនទាន់មានភាពរឹងប៉ឹង ១០០ ភាគរយនៅឡើយទេ។
មិនខុសពីការប្រណាំង ២ លើកដំបូងដែរ ការប្រណាំងនឹងត្រូវរៀបចំដោយឥតមានទស្សនិកជនចូលរួមឡើយ ដោយសារបារម្ភពីការឆ្លងជំងឺកូវីដ ១៩ ដែលបានប៉ះពាល់យ៉ាងធ្ងន់ធ្ងរដល់កាលវិភាគនៃកម្មវិធីប្រណាំង MotoGP នៅឆ្នាំនេះ ដោយក្នុងនោះមានព្រឹត្តិការណ៍ប្រណាំងតែ ១៣ ដំណាក់កាលប៉ុណ្ណោះ ដែលត្រូវបានអះអាងថា នឹងកើតឡើងរដូវកាលនេះ ហើយកម្មវិធីនៅក្រៅតំបន់អឺរ៉ុបទាំងអស់ត្រូវរំសាយចោល។
ក្រោយបញ្ចប់ការប្រណាំងនៅប្រទេសឆែក នាចុងសប្ដាហ៍នេះ កម្មវិធី MotoGP នឹងធ្វើដំណើរទៅកាន់ប្រទេសក្បែរខាងអូទ្រីស ដែលនឹងត្រូវរៀបចំ ២ កម្មវិធី គឺនៅថ្ងៃទី ១៦ ខែសីហា ម្ដង និងថ្ងៃទី ២៣ ខែសីហា ម្ដង៕ AFP/VN
