ក្រុងរ៉ូមៈ គ្រូបង្វឹកក្លិប Roma លោក Paulo Fonseca បាននិយាយថា ក្លិបដែលលេងនៅក្របខ័ណ្ឌ Serie A នេះចង់ចុះកុងត្រាទិញផ្ដាច់កីឡាករខ្ចីជើង Chris Smalling និងកីឡាករ Henrikh Mkhitaryan។
កីឡាករ Smalling និង Mkhitaryan កំពុងជាប់កិច្ចសន្យាខ្ចីជើងរយៈពេលពេញ ១ រដូវកាលពីក្រុម ២ នៅក្របខ័ណ្ឌ Prmier League គឺក្រុម Man Utd និងក្រុម Arsenal។
ខ្សែបម្រើ Smalling ដែលខ្ចីជើងពីក្រុម Man Utd បានធ្វើឲ្យក្រុម Roma ចាប់អារម្មណ៍ខ្លាំងដោយបានប្ដេជ្ញាចិត្តថា នឹងទិញយកផ្ដាច់ជម្រើសជាតិអង់គ្លេសរូបនេះឲ្យលេងនៅក្នុងទីក្រុងរ៉ូមជាអចិន្ត្រៃយ៍។
លោក Fonseca បានប្រាប់ Sky Sports News ថា៖ «Chris គឺពិតជាកីឡាករឆ្នើមដ៏អស្ចារ្យមួយរូប»។
គ្រូបង្វឹករូបនេះបានបន្ថែមថា៖ «ការសម្របខ្លួនជាមួយបាល់ទាត់នៅប្រទេសអ៊ីតាលី គឺងាយស្រួលសម្រាប់គាត់ ហើយគាត់គឺជាកីឡាករម្នាក់ដែលគ្រប់គ្នាស្រឡាញ់ចូលចិត្តនៅក្នុងក្លិបនេះព្រោះគាត់ជាអ្នកមានវិជ្ជាជីវៈដ៏អស្ចារ្យ»។
លោក Fonseca បានបន្តថា៖ «ខ្ញុំចង់ឲ្យ Chris ស្ថិតនៅទីនេះ ហើយយើងកំពុងជជែកពីបញ្ហានេះ។ ខ្ញុំមិនដឹងថា តើវាអាចទៅរួចជាមួយក្រុម Man Utd ឬយ៉ាងណាទេប៉ុន្តែខ្ញុំពិតជាចង់ឲ្យ Chris ស្ថិតនៅទីនេះជាមួយយើងព្រោះគាត់ជាកីឡាករសំខាន់បំផុត»។
គ្រូបង្វឹកដដែលនេះបានបន្តទៀតថា៖ «គាត់ជាកីឡាករឆ្នើមម្នាក់ដែលមានអាកប្បកិរិយាល្អរាល់ថ្ងៃដូច្នេះហើយបានជាខ្ញុំពេញចិត្តនឹងឲ្យ Chris បន្តស្ថិតនៅជាមួយយើង»។
ចំណែកកីឡាករ Mkhitaryan ជាអតីតមិត្តរួមក្រុមរបស់កីឡាករ Smalling នៅក្លិប Man Utd វិញបានជួបការប្រកួតបង្កគ្រោះថ្នាក់នៅជាមួយក្រុម Roma ។
ទោះយ៉ាងណាក៏ដោយ ខ្សែបម្រើប្រយុទ្ធរូបនេះនៅតែអាចរកបាន ៥ គ្រាប់នៅក្របខ័ណ្ឌ Serie A និងបានជួយឲ្យគេស៊ុតចូលទីក្រោយពីរកបានគ្រាប់បាល់និងបានបង្កើតឱកាសផ្សេងទៀតនៅក្នុងជ័យជម្នះ ៤-០ ទៅលើក្រុម Lecce កាលពីថ្ងៃអាទិត្យ។
លោក Fonseca បាននិយាយថា៖ «Mkhi នៅក្នុងរដូវកាលនេះបានរងរបួសជាច្រើនលើក ប៉ុន្តែពេលនេះគាត់កំពុងត្រឡប់មកចូលរួមការប្រកួតវិញហើយ ហើយគាត់ក៏នឹងត្រូវបង្ហាញឲ្យឃើញពីគុណភាពរបស់គាត់ផងដែរ»។
គ្រូបង្វឹករូបនេះបានបន្ថែមទៀតថា៖ «ចូរក្រឡេកមើលនែ គាត់គឺជាកីឡាករម្នាក់ដែលមានការសម្រេចចិត្តល្អនៅលើទីលានប្រកួត ហើយខ្ញុំក៏ចង់ទុកឲ្យ Mkhi បន្តស្ថិតនៅក្នុងក្រុមរបស់យើងផងដែរ»។
គួររំឭកដែរថា ក្លិប Roma ស្ថិតនៅចំណាត់ថ្នាក់ទី ៥ ក្នុងក្របខ័ណ្ឌ Serie A និងតាមពីក្រោយ ៣ ពិន្ទុនៃក្រុម Atalanta ដែលឈរនៅលេខ ៤ និងកំពុងមានឱកាសឈ្នះការប្រកួតជើងទី ២ នៅក្នុងក្របខ័ណ្ឌ Champions League ផងដែរ៕ SN