ក្រុងម៉ាឌ្រីដ: ខ្សែបម្រើ David Silva របស់ក្លិប Manchester City កាលពីថ្ងៃចន្ទ បានប្រកាសពីការបញ្ចប់អាជីពជាអន្តរជាតិរយៈពេល១២ឆ្នាំរបស់គេជាមួយនឹងក្រុមបាល់ទាត់ជម្រើសជាតិអេស្ប៉ាញ។
ក្រោយពីត្រូវបានជ្រើសរើសឲ្យចូលក្នុងក្រុមជម្រើសជាតិជាលើកទី១កាលពីខែវិច្ឆិកា ឆ្នាំ២០០៦ ខ្សែបម្រើវ័យ៣២ឆ្នាំរូបនេះ បានជួយឲ្យប្រទេសរបស់គេឈ្នះពានពិភពលោក នៅអាហ្វ្រិកខាងត្បូង កាលពីឆ្នាំ២០១០ និងបានឈ្នះពាន Euro ក្នុងឆ្នាំ២០០៨ និងឆ្នាំ២០១២។
កីឡាកររូបនេះសរសេរសារមួយនៅលើបណ្តាញសង្គមថា៖ «ខ្ញុំចាកចេញទាំងមានមោទនភាព និងរីករាយ ក្រោយពីបានបញ្ចប់ពេលវេលាមួយដែលពោរពេញដោយការរំជួលចិត្ត និងការចងចាំ ដូចជាលោក Luis Aragones ដែលជាគ្រូបង្វឹកដ៏ឆ្នើមម្នាក់ដែលមិនមាននរណាបំភ្លេចឡើយ»។
Silva បានប្រាប់បន្ថែមទៀតថា៖ «ខ្ញុំបានរស់នៅ និងសុបិនជាមួយនឹងក្រុមមួយដែលនឹងត្រូវគេចងចាំជារៀងរហូត។ ខ្ញុំបានចំណាយពេលជាច្រើនថ្ងៃ និងជាច្រើនសប្តាហ៍ ដើម្បីពិចារណាទៅលើបញ្ហានេះ។ ក្រុមជម្រើសជាតិបានផ្តល់ឲ្យខ្ញុំនូវរាល់អ្វីៗទាំងអស់ និងបានជួយឲ្យខ្ញុំអភិវឌ្ឍក្នុងនាមជាកីឡាករម្នាក់ និងមនុស្សម្នាក់»។
ការប្រកាសរបស់ Silva បានកើតឡើង ក្រោយពីការប្រកាសពីការចូលនិវត្តន៍របស់ខ្សែការពារកណ្តាល Gerard Pique កាលពីសប្តាហ៍មុន៕ IS