.jpg)
Pogba ស៊ុតបាល់ពិន័យមិនបានល្អក្នុងការប្រកួតពីថ្ងៃចន្ទ។ រូប AFP
ក្រុងឡុងដ៍ៈ គ្រូបង្វឹកក្លិប Man Utd លោក Ole Gunnar Solskjaer មិនស្ដីបន្ទោសកីឡាករ Paul Pogba ក្រោយពីតារាបាល់ទាត់រូបនេះបានស៊ុតបាល់ពិន័យ ១១ ម៉ែត្រ មិនចូលធ្វើឲ្យក្រុម Man Utd ប្រកួតស្មើគ្នា ១-១ ជាមួយក្រុម Wolves ពីព្រឹកថ្ងៃចន្ទ។
ក្នុងការប្រកួតរវាងក្រុមទាំង ២ នេះ ក្រុមបិសាចក្រហម Man Utd បាននាំមុខ ១ គ្រាប់មុន ដោយកីឡាករ Martial ក្នុងនាទីទី ២៧ ប៉ុន្តែនៅក្នុងនាទីទី ៥៥ កីឡាករ Neves របស់ក្រុម Wolves រកបាន ១ គ្រាប់វិញ ធ្វើឲ្យក្រុមទាំង ២ នេះស្មើគ្នា ១-១។
តាមពិតទៅ ក្រុមបិសាចក្រហមសឹងតែរកបាន ១ គ្រាប់ទៀត ដើម្បីឈ្នះក្រុមឆ្កែចចកនៅពេលក្រុមបិសាចក្រហមទទួលបានបាល់ពិន័យ ១១ មែត្រ ប៉ុន្តែកីឡាករ Pogba ស៊ុតមិនបានល្អដោយអ្នកចាំទីក្រុម Rui Patricio សង្គ្រោះបានយ៉ាងល្អ។
នេះជាការស៊ុតបាល់ពិន័យ ១១ ម៉ែត្រ មិនបានល្អលើកទី៤ របស់កីឡាករ Pogba តាំងពីចាប់ផ្ដើមរដូវកាលមុន ហើយលើកនេះប្រហែលជារូបគេចង់ធ្វើឲ្យដូចកីឡាករ Rashford ដែលបានស៊ុតចូលទីយ៉ាងល្អនៅពេលប្រកួតជាមួយក្រុម Chelsea កាលពីចុងសប្ដាហ៍មុន។
គ្រូបង្វឹកលោក Solskjaer បាននិយាយថា គាត់អនុញ្ញាតឲ្យកីឡាករ Pogba និង Rashford ជាអ្នកស៊ុតបាល់ពិន័យនេះ។
លោក Solskjaer បាននិយាយថា៖ «ពួកគេទាំង ២ ត្រូវបានចាត់តាំងឲ្យស៊ុតបាល់ពិន័យនេះ ហើយវាអាស្រ័យលើពួកគេជាអ្នកសម្រេចចិត្ត»។
គ្រូបង្វឹករូបនេះបានបន្ថែមថា៖ «ពេលខ្លះកីឡាករមានអារម្មណ៍ថា ពួកគេទុកចិត្តខ្លួនឯងក្នុងការស៊ុតបញ្ចូលទី ហើយ Pogba ធ្លាប់រកបានគ្រាប់បាល់ជាច្រើនសម្រាប់ពួកយើង ប៉ុន្តែថ្ងៃនេះ កីឡាករ Rui Patricio ធ្វើការសង្គ្រោះបានយ៉ាងល្អ»។
គ្រូបង្វឹកដដែលនេះបានបន្ថែមទៀតថា៖ «ពួកគេទាំង ២ សុទ្ធតែមានទំនុកចិត្ត ហើយខ្ញុំចូលចិត្តកីឡាករដែលមានទំនុកចិត្ត និងគិតថា ខ្លួនឯងអាចធ្វើបាន»។
កីឡាករ Rashford បានអះអាងថា កីឡាករ Pogba បាននិយាយថា គាត់ចង់ស៊ុតបាល់ពិន័យនេះ ដូច្នេះហើយរូបគេបានប្រគល់នាទីនេះឲ្យកីឡាករ Pogba ជាអ្នកស៊ុតតែម្ដងទៅ។
ខ្សែប្រយុទ្ធរូបនេះនិយាយថា៖ «Pogba ចង់សាក ហើយវាជាធម្មតាដែលគ្រប់គ្នាក៏អាចស៊ុតមិនចូលបែបនេះដែរ។ គាត់បានស៊ុតបាល់ចូលទីរាប់មិនអស់សម្រាប់យើងដូច្នេះវាធម្មតាដែលគាត់ស៊ុតមិនចូលម្ដងនោះ។ ខ្ញុំបានស៊ុតពីសប្ដាហ៍មុនហើយដូច្នេះទុកឲ្យគាត់ស៊ុតម្ដងនៅពេលនេះ ប៉ុន្តែស្ដាយដែលគាត់ធ្វើមិនបានល្អ ប៉ុន្តែមិនថ្វីទេយើងនឹងធ្វើឲ្យបានល្អនៅខាងមុខទៀត»។
នេះជាលទ្ធផលគួរឲ្យសោកស្ដាយមួយសម្រាប់ក្រុម Man Utd ក្រោយពីពួកគេគ្រប់គ្រងបាល់នៅពេលចាប់ផ្ដើម ហើយលោក Solskjaer បានទទួលស្គាល់ថា ពួកគេបានវង្វេងផ្លូវ «ទាំងស្រុង» នៅក្នុងតង់ទី២។
លោក Solskjaer បាននិយាយថា៖ «តង់ទី១ គឺលេងបែបចាស់ទុំប៉ុន្តែតង់ទី២ គឺងងឹតមុខឈឹងតែម្ដង ហើយយើងនឹងពង្រឹងសមត្ថភាពថែមទៀតព្រោះយើងជាក្រុមក្មេងមួយដែលត្រូវរៀនសូត្រពីការប្រកួតនៅថ្ងៃនេះ»។
គ្រូបង្វឹករូបនេះបានបន្តថា៖ «ក្រុម Wolves ប្រហែលជាបានសម្រេចបំណងដែលពួកគេសមនឹងទទួលបាន ហើយខ្ញុំបានគិតថា យើងបានគ្រប់គ្រងម្ដងទៀត និងអាចបានឈ្នះ»។
គ្រូបង្វឹករូបនេះបានបន្ថែមទៀតថា៖ «យើងទទួលបានបាល់ពិន័យដែលធម្មតានឹងធ្វើឲ្យយើងទទួលបាន ២ គ្រាប់ ប៉ុន្តែពេលខ្លះអ្នកចាំទីក៏សង្គ្រោះបានល្អផងដែរ»។
លទ្ធផលនេះធ្វើឲ្យក្រុម Man Utd មាន ៤ ពិន្ទុ និងនៅចំណាត់ថ្នាក់ទី៤ ខណៈក្រុម Wolves មាន ២ ពិន្ទុ និងនៅចំណាត់ថ្នាក់ទី១២ នៃក្របខ័ណ្ឌ Premier League៕ AFP/SN
