ក្លិបកីឡាបាល់ទាត់អង់គ្លេស Tottenham Hotspur នឹងលេងនៅលើទឹកដីសិង្ហបុរីនៅខែកក្កដាក្នុងនាមជាផ្នែកនៃការត្រៀមខ្លួនរបស់ពួកគេសម្រាប់រដូវកាលឆ្នាំ ២០១៩-២០២០។ នេះបើយោងទៅតាមការប្រកាសរបស់ក្លិបកាលពីថ្ងៃអង្គារ។
ក្លិប Spurs បានប្រកាសនៅលើគេហទំព័ររបស់ខ្លួនថា៖ «យើងពិតជារីករាយណាស់ក្នុងការប្រកាសថាក្រុមឈុតទី ១ នេះនឹងធ្វើដំណើរទៅកាន់សិង្ហបុរី និងស៊ាងហៃក្នុងនាមជាផ្នែកនៃការប្រកួតមុនបើករដូវកាលរបស់យើងនៅខែកក្កដាដើម្បីត្រៀមសម្រាប់រដូវកាលឆ្នាំ ២០១៩-២០២០។
ក្រុមរបស់ក្របខ័ណ្ឌ Premier League មួយនេះបានធ្វើដំណើរទៅកាន់ទឹកដីសិង្ហបុរីជាលើកចុងក្រោយក្នុងឆ្នាំ ១៩៩៥ ដែលនៅពេលនោះពួកគេបានប្រកួតជាមួយនឹងក្រុមជម្រើសជាតិសិង្ហបុរី។ Spurs ក៏នឹងធ្វើដំណើរទៅកាន់ទីក្រុងស៊ាងហៃជាលើកទី ១ ផងដែរអំឡុងនៃការត្រៀមមុនបើករដូវកាល៕ IS