.jpg)
លោក Wenger លើកពានរង្វាន់ 2019 Laureus World Sports កាលពីថ្ងៃទី១៨ ខែកុម្ភៈ។ រូបថត AFP
ក្រុងលូសាន៖ លោក Arsene Wenger ត្រូវបានប្រកាសតែងតាំងជាប្រធានអភិវឌ្ឍន៍បាល់ទាត់ពិភពលោករបស់សហព័ន្ធបាល់ទាត់ពិភពលោក ហៅកាត់ FIFA។
លោក Wenger អាយុ ៧០ ឆ្នាំ បានចំណាយពេល ២២ ឆ្នាំក្នុងការដឹកនាំក្លិប Arsenal រហូតដល់ឆ្នាំ ២០១៨ និងត្រូវបានទាក់ទងឲ្យកាន់តំណែងគ្រប់គ្រងនៅក្លិប Bayern Munich ក្នុងពេលប៉ុន្មានសប្ដាហ៍ថ្មីៗនេះ ប៉ុន្តែផ្ទុយមកវិញ គាត់បានសម្រេចចិត្តយកតួនាទីថ្មីមួយជាមួយស្ថាប័នបាល់ទាត់ពិភពលោកមួយនេះទៅវិញ។
ក្នុងអំឡុងពេលគាត់ស្ថិតនៅក្នុងក្រុមកាំភ្លើងធំ Arsenal លោក Wenger ត្រូវបានចាត់ទុកថា ជាអ្នកចាត់ការដ៏ឆ្នើមម្នាក់ក្នុងពិភពលោក និងបានឈ្នះពានរង្វាន់ក្របខ័ណ្ឌ Premier League ចំនួន ៣ លើក រួមជាមួយពានរង្វាន់ FA Cup ចំនួន ៧ ដងផងដែរ។
បុរសសញ្ជាតិបារាំងរូបនេះបានកសាងកេរ្តិ៍ឈ្មោះដ៏អស្ចារ្យចំពោះទម្រង់លេងគិតឆ្ពោះទៅមុខ និងការអភិវឌ្ឍកីឡាករវ័យក្មេង ហើយក្នុងតំណែងថ្មីនេះ លោក Wenger នឹងមានភារកិច្ច «ជំរុញកំណើន» សម្រាប់បាល់ទាត់បុរស និងនារីនៅទូទាំងពិភពលោក។
សហព័ន្ធ FIFA បាននិយាយថា លោក Wenger ក៏នឹងត្រូវបានចាត់ទុកជា «អាជ្ញាធរឈានមុខគេលើបញ្ហាបច្ចេកទេស» ក្នុងនាមជាសមាជិកនៃគណៈកម្មាធិការប្រឹក្សាបាល់ទាត់ និងបច្ចេកទេសដោយចូលរួមក្នុងដំណើរការសម្រេចចិត្តនៃការផ្លាស់ប្តូរច្បាប់ជាសក្តានុពលនៅក្នុងវិស័យកីឡានេះ។
តួនាទីរបស់លោក Wenger ភាគច្រើនគឺពាក់ព័ន្ធនឹងការផ្តោតលើការអប់រំបង្វឹក និងកម្មវិធីមួយទៀតដែលគ្រោងនឹងលើកទឹកចិត្តអតីតកីឡាករឲ្យក្លាយជាអ្នកចាត់ការក្លិបពេលពួកគេចូលនិវត្តន៍។
អតីតគ្រូបង្វឹករូបនេះបាននិយាយទាក់ទងនឹងការតែងតាំងនេះថា៖ «ខ្ញុំទន្ទឹងរង់ចាំទទួលយកបទពិសោធសំខាន់មួយនេះមិនត្រឹមតែដោយសារខ្ញុំតែងតែចាប់អារម្មណ៍ក្នុងការវិភាគបាល់ទាត់ពីទស្សនៈទូលំទូលាយប៉ុណ្ណោះទេ ប៉ុន្តែថែមទាំងដោយសារបេសកកម្មរបស់សហព័ន្ធ FIFA ក្នុងនាមជាស្ថាប័នគ្រប់គ្រងបាល់ទាត់ពិភពលោកផងដែរ។
លោក Wenger បាននិយាយថា៖ «ខ្ញុំជឿថា សហព័ន្ធ FIFA ថ្មីដែលយើងបានឃើញលេចធ្លោក្នុងរយៈពេលប៉ុន្មានឆ្នាំថ្មីៗនេះ បានគិតគូរពីវិស័យបាល់ទាត់យ៉ាងខ្លាំង និងបានប្ដេជ្ញាចិត្តអភិវឌ្ឍការប្រកួតក្នុង គូប្រជែងផ្សេងៗជាច្រើន។ ខ្ញុំដឹងថា ខ្ញុំអាចបន្តតួនាទីនេះ និងលះបង់កម្លាំងកាយចិត្តចំពោះតួនាទីនេះផងដែរ»។
ប្រធានសហព័ន្ធ FIFA គឺលោក Gianni Infantino ជឿជាក់ថា បទពិសោធរបស់លោក Wenger នឹងធ្វើឲ្យគាត់មានគំនិតភ្លឺស្វាងបំផុតក្នុងវិស័យកីឡា និងជឿទៀតថា ការតែងតាំងនេះ គឺជាភ័ស្តុតាងនៃកិច្ចខិតខំប្រឹងប្រែងរបស់ស្ថាប័ននេះចំពោះបាល់ទាត់ ក្រោយពីមានភាពចម្រូងចម្រាសជាច្រើនឆ្នាំមកនេះ។
លោក Infantino បាននិយាយថា៖ «ចំណេះដឹង និងឆន្ទៈជ្រាលជ្រៅរបស់លោក Arsene Wenger ចំពោះទិដ្ឋភាពនៃការប្រកួតកីឡារបស់យើងបានធ្វើឲ្យគាត់ក្លាយជាមនុស្សម្នាក់ដែលមានបុគ្គលិកលក្ខណៈគួរឲ្យគោរពបំផុតក្នុងវិស័យបាល់ទាត់»។
ប្រធានសហព័ន្ធ FIFA រូបនេះបានបន្ថែមថា៖ «ខ្ញុំពេញចិត្តនឹងស្វាគមន៍គាត់មកកាន់ក្រុមនេះ ហើយតាំងពីខ្ញុំមកគ្រប់គ្រង FIFA យើងបានដាក់បាល់ទាត់ជាចំណុចស្នូលនៃបេសកកម្មរបស់យើង ដោយខិតខំរៀនសូត្រពីអ្នកដែលមានបទពិសោធន៍ស៊ីជម្រៅក្នុងវិស័យនេះផងដែរ»៕ AFP/SN
