ក្រុងឡុងដ៍: លោក Arsene Wenger ដែលជាអ្នកចាត់ការទូទៅរបស់ Arsenal នឹងមានក្លិបជាច្រើនដែលចាប់អារម្មណ៍ទៅលើការជួលសេវាកម្មរបស់លោក ក្រោយពីគ្រូបង្វឹករូបនេះ ចាកចេញពីក្រុមកាំភ្លើងធំ។ នេះបើយោងទៅតាមការបញ្ជាក់របស់លោក David Dein អតីតអនុប្រធានក្លិបរបស់ក្របខ័ណ្ឌ Premier League។
លោក Dein គឹជាអ្នកដែលបានជួលលោក Wenger ឲ្យដឹកនាំ Arsenal កាលពីឆ្នាំ ១៩៩៦ ហើយក្រោយពីការដឹកនាំអស់រយៈពេលច្រើនជាង ២ ទសវត្សរ៍ គ្រូបង្វឹកសញ្ជាតិបារាំងរូបនេះ បានប្រកាសថា លោកនឹងលាលែងពីតំណែងរបស់លោកនៅចុងរដូវកាលនេះ។
លោក Dein បានប្រាប់ទូរទស្សន៍ Sky Sports ថា៖ «លោកនឹងឈានចូលវ័យ ៦៩ ឆ្នាំ នៅខែតុលា ហើយលោកនឹងមានភាពស័ក្តិសមដ៏អស្ចារ្យ។ លោកមានស្មារតីដ៏រស់រវើក និងមានចំណេះដឹងដ៏អស្ចារ្យក្នុងកីឡាមួយនេះ»។
លោក Dein បានបន្ថែមទៀតថា៖ «ក្នុងរយៈពេលប៉ុន្មានឆ្នាំចុងក្រោយនេះ ខ្ញុំដឹងថា គាត់ត្រូវផ្តល់សំណើដោយក្លិបធំៗជាច្រើនក្នុងពិភពលោក។ ខ្ញុំគិតថា ក្លិប Real Madrid, Paris St Germain និងក្រុមបាល់ទាត់ជម្រើសជាតិអង់គ្លេស សុទ្ធសឹងចង់បានរូបលោកក្នុងដំណាក់កាលណាមួយ។ វានឹងមានការផ្តល់សំណើការងារជាច្រើន»។
លោក Wenger វ័យ ៦៨ ឆ្នាំ បានដឹកនាំឲ្យក្រុម Arsenal ឈ្នះពានក្របខ័ណ្ឌ Premier League ចំនួន ៣ លើក និងពាន FA Cup ចំនួន ៧ លើក ប៉ុន្តែ Arsenal បានជួបភាពត្រដាបត្រដួសក្នុងរយៈពេលប៉ុន្មានឆ្នាំចុងក្រោយនេះ និងកំពុងតែស្ថិតក្នុងចំណាត់ថ្នាក់លេខ ៦ នៅលើតារាងលីក នៅរដូវកាលនេះ។
លោក Dein នៅតែជឿជាក់ថា លោក Wenger គឺជាអ្នកចាត់ការទូទៅដ៏អស្ចារ្យបំផុតរបស់ក្រុម Arsenal។ លោក Dein បានបន្ថែមទៀតថា៖ «ខ្ញុំគិតថា វាជាការកោតសរសើរដ៏ស័ក្តិសមពីសំណាក់លោក Richard Scudamore ប្រធានក្របខ័ណ្ឌ Premier League កាលពីដើមសប្តាហ៍នេះ។ កេរដំណែលរបស់លោកមិនមែនសម្រាប់តែ Arsenal ឡើយ៕