ក្រុងឡុងដ៍: ខ្សែបម្រើស្លាប Willian របស់ក្លិប Chelsea បានទទួលស្គាល់ថា វានឹងគ្មាន «ឱកាសឡើយ» ដែលរូបគេនឹងនៅតែបន្តនៅក្នុងក្លិបនេះ ប្រសិនបើអតីតអ្នកចាត់ការទូទៅលោក Antonio Conte មិនត្រូវបានជំនួសដោយលោក Maurizio Sarri កាលពីខែមុនទេនោះ។
លោក Conte ត្រូវបានបណ្តេញចេញត្រឹមតែរយៈពេល ៤ សប្តាហ៍ នៅមុនពេលចាប់ផ្តើមរដូវកាលនេះ បើទោះបីបានឈ្នះពាន Premier League ក្នុងរដូវកាលទី១របស់លោក និងពាន FA Cup កាលពីរដូវកាលមុនក៏ដោយ។
ប៉ុន្តែ ទោះបីជាយ៉ាងណា គ្រូបង្វឹកសញ្ជាតិអ៊ីតាលីរូបនេះ បានទទួលឥទ្ធិពលអាក្រក់ពីការមិនចុះសម្រុងជាមួយនឹងកីឡាករជាច្រើន និងមិនអាចដឹកនាំឲ្យក្រុមខ្លួនឈ្នះកៅអីទៅលេងក្នុងក្របខ័ណ្ឌ Champions League នៅពេលដែលលោកត្រូវបានបណ្តេញចេញ ក្រោយពីពាក្យចរចាមអារ៉ាមជាច្រើនជុំវិញអនាគតរបស់លោក។
Willian ក៏ត្រូវបានទាក់ទងជាមួយនឹងការផ្ទេរចេញពីកីឡដ្ឋាន Stamford Bridge ខណៈដែលក្លិប Chelsea បានច្រានចោលសំណើដេញថ្លៃមួយពីសំណាក់ក្លិប Barcelona ក្នុងរដូវកាលនេះ។
ប៉ុន្តែ រូបគេនឹងត្រូវបន្តនៅក្នុងទីក្រុងឡុងដ៍ ខណៈដែលទីផ្សារដោះដូរកីឡាករសម្រាប់ក្លិបស្ថិតក្នុងក្របខ័ណ្ឌ Premier League បច្ចុប្បន្នបានបិទរួចជាស្រេច ដែលមានន័យថា Chelsea ប្រហែលជាមិនទទួលសំណើណាមួយពីក្លិបនៅក្រៅប្រទេសឡើយ។
នៅពេលដែលត្រូវបានចោទសួរថា រូបគេនៅតែស្ថិតក្នុងក្លិបនេះ ឬយ៉ាងណា ប្រសិនបើលោក Conte នៅតែបន្តដឹកនាំ ខ្សែបម្រើស្លាបអន្តរជាតិប្រេស៊ីលរូបនេះបានប្រាប់ទូរទស្សន៍ ESPN ថា៖ «គ្មានឱកាសនោះឡើយ»៕ IS