ក្រុងប៉ារីសៈ កីឡាករបាល់ឱប Akihito Yamada បាននិយាយពីថ្ងៃចន្ទថា រូបគេនៅតែផ្ដោតលើការឈ្នះពានបាល់ឱបពិភពលោក (Rugby World Cup) សម្រាប់ជម្រើសជាតិជប៉ុនក្រោយពីទៅចូលរួមនឹងក្លិបបាល់ឱបបារាំង Lyon ក្នុងលក្ខខណ្ឌខ្ចីជើង។
កីឡាករ Yamada អាយុ ៣៤ ឆ្នាំ ដែលបានចាប់ផ្ដើមនាំជ័យជម្នះឲ្យជម្រើសជាតិរបស់ខ្លួនដោយឈ្នះជម្រើសជាតិអាហ្វ្រិកកខាងត្បូងក្នុងការប្រកួតពី ៤ ឆ្នាំមុននោះ បានចុះកុងត្រាជាមួយក្រុម Lyon ពីខែសីហា សម្រាប់រយៈពេលបណ្ដោះអាសន្ន ២ ខែក្នុងលក្ខខណ្ឌខ្ចីជើង។
កីឡាករលេងអន្តរជាតិ ២៥ លើករូបនេះបាននិយាយថា រូបគេបាននិយាយជាមួយបុគ្គលិកបង្វឹកដែលដឹកនាំដោយអតីតក្រុមជម្រើសជាតិនូវែលសេឡង់លោក Jamie Joseph។
កីឡាកររូបនេះបានប្រាប់ AFP ថា៖ «ខ្ញុំកំពុងព្យាយាមត្រឡប់ទៅចូលរួមនឹងជម្រើសជាតិជប៉ុនវិញសម្រាប់ព្រឹត្តិការណ៍ World Cup ហើយខ្ញុំត្រូវតែខំប្រឹងហ្វឹកហាត់ជារៀងរាល់ថ្ងៃ»។
កីឡាករ Yamada បានបន្ថែមថា៖ «ខ្ញុំមកទីនេះដើម្បីទទួលបានអ្វីសមរម្យក្រែងលោមានការហៅឲ្យចូលលេងក្នុង ការប្រកួត World Cup ហើយ ប្រសិនបើមានរបួស ខ្ញុំបានប្រាប់គេថា សូមហៅខ្ញុំ»។
កីឡាកររូបនេះបាននិយាយថា រូបគេសង្ឃឹមថា ការឈ្នះនៅនាទីចុងក្រោយទៅលើជម្រើសជាតិអាហ្វ្រិកខាងត្បូងនៅឆ្នាំ ២០១៥ នឹងជួយឲ្យក្រុមបច្ចុប្បន្នល្អ»។
កីឡាករ Yamada បានបន្តថា៖ «វាជាបទពិសោធអស្ចារ្យមួយក្នុងនាមជាកីឡាករបាល់ឱបម្នាក់ ហើយខ្ញុំមានសំណាងដែលបាននៅទីនេះ។ សម្រាប់ក្រុមជម្រើសជាតិជប៉ុនវិញ វាជាថ្ងៃអស្ចារ្យមួយដែលយើងត្រូវប្រើបទពិសោធទាំងអស់សម្រាប់ជ័យជម្នះ World Cup នៅឆ្នាំ ២០១៩ នេះ»។
Yamada គឺជាកីឡាករជម្រើសជាតិជប៉ុនលើកទី២ ដែលបានចូលរួមនឹងក្រុមបាល់ឱបមួយនៅប្រទេស បារាំង នៅមុនពេលរដូវកាល Top ១៤ ថ្មីចូលមកដល់ ក្រោយពីកីឡាករ Takeshi Hino ត្រូវបានផ្ដល់ការសាកល្បងដោយម្ចាស់ជើងឯកនៅក្រុង Toulouse នេះ។
កីឡាករ Yamada ដែលរកបាន ១៩ គ្រាប់ ក្នុងអាជីពបាល់ឱបនោះ បាននិយាយថា រូបគេនឹងស្ថិតនៅជាមួយក្លិប Lyon ឲ្យបានយូរ ប្រសិនបើរូបគេមិនជាប់ឈ្មោះទៅលេង World Cup ទេនោះ។
កីឡាកររូបនេះបាននិយាយថា៖ «វាជាឱកាសអស្ចារ្យណាស់ដែលឆ្លងកាត់អាស៊ីមកចូលរួមក្លិបធំនៅទីនេះ ហើយខ្ញុំនឹងស្ថិតនៅទីនេះឲ្យបានយូរក្នុងរដូវកាលនេះព្រោះរដូវកាលជប៉ុននឹងចាប់ផ្ដើមនៅខែ មករា ឆ្នាំ ២០២០ ដូច្នេះហើយខ្ញុំមានពេលគ្រប់គ្រាន់»៕ AFP/SN