.jpg)
កីឡាកររបស់ក្រុមខេត្តព្រៃវែង បានលោតតែតបាល់ ក្នុងពេលពួកគេឈ្នះក្រុមខេត្តកោះកុង ៥-១។ CNCC
ភ្នំពេញ៖ ក្រុមខេត្តសៀមរាប និងខេត្តព្រៃវែង សុទ្ធតែទទួលបានជ័យជម្នះសម្រាប់ការប្រកួតជើងទី១ វគ្គ ៨ ក្រុមចុងក្រោយពានរង្វាន់សម្តេច ហ៊ុន សែន លើកទី ១៤ (ថ្នាក់ខេត្ត) ឆ្នាំ ២០២០ កាលពីថ្ងៃអង្គារ ចំណែកក្រុមខេត្តកំពង់ស្ពឺ មិនហ៊ានមើលស្រាលលើអតីតក្រុមជើងឯក ខេត្តត្បូងឃ្មុំ នៃជំនួបថ្ងៃពុធនេះ ប៉ុន្តែខេត្តកែប សង្ឃឹមខ្ពស់បំផុតក្នុងការយកឈ្នះក្រុមខេត្តកំពង់ឆ្នាំងនៅលើទឹកដីខ្លួនឯង។
តាមរយៈការប្រកួតបិទទ្វារ មិនអនុញ្ញាតឲ្យអ្នកគាំទ្រចូលរួមកាលពីម្សិលមិញនោះ ក្រុមម្ចាស់ផ្ទះខេត្តសៀមរាបបានយកឈ្នះក្រុមខេត្តកណ្តាល ៣-១ ហើយក្រុមខេត្តព្រៃវែង ដែលកីឡាករភាគច្រើនជាក្រុមយុវជនរបស់ក្លិបវិសាខានោះ បានលត់ក្រុមខេត្តកោះកុង ៥-១ នៅលើទឹកដីខ្លួនឯង ដើម្បីមានភាគរយខ្ពស់ក្នុងការប្រកួតកាត់សេចក្តីនៅជើងទី២ ខណៈការប្រកួតនេះកីឡាករ ស៊ីន មុន្នីឧត្តម របស់ខេត្តកោះកុង និង ញឹម លីហួរ របស់ខេត្តព្រៃវែង សុទ្ធតែបានទទួលកាតក្រហម ចំពោះការប៉ះទង្គិចគ្នា នៅនាទីទី ៧០។
ដោយឡែកក្រុមលេខ ១ ប្រចាំពូល D ខេត្តកំពង់ស្ពឺ នឹងត្រូវបើកកីឡដ្ឋានរបស់ខ្លួនស្វាគមន៍ក្រុមខេត្តត្បូងឃ្មុំ នៅរសៀលម៉ោង ៣ ថ្ងៃពុធនេះ។ សម្រាប់ការប្រកួតជម្រុះតាមពូលកន្លងមកនេះ ខេត្តកំពង់ស្ពឺ ធ្វើបានយ៉ាងល្អ ដោយឈ្នះ ២ និងស្មើ ២។
យ៉ាងណាក៏ដោយ ខេត្តកំពង់ស្ពឺ បានចាត់ទុកការជួបខេត្តត្បូងឃ្មុំ គឺជាការប្រកួតដ៏តានតឹងមួយ ដែលមិនអាចរំពឹងខ្ពស់បាននោះទេ។ ទោះបីជា ក្រុមម្ចាស់ជើងឯកថ្នាក់ខេត្តឆ្នាំ ២០១៩ ខេត្តត្បូងឃ្មុំបានឡើងមកដល់វគ្គ ៨ ក្រុមនេះ ត្រឹមជាក្រុមលេខ ២ ល្អប្រចាំពូល C ប៉ុន្តែក្នុងវគ្គជម្រុះតាមពូលខេត្តត្បូងឃ្មុំ មិនធ្លាប់ចាញ់ដូចគ្នា គឺពួកគេបានឈ្នះ ២ និងស្មើ ២ ដង ហើយចំណុចល្អនេះ នៅតែធ្វើឲ្យក្រុមខេត្តកំពង់ស្ពឺ មានការខ្លាចរអាមិនហ៊ានមើលរំលង។
លោក ម៉ម កុសល អ្នកចាត់ការក្រុមខេត្តកំពង់ស្ពឺ បាននិយាយថា៖ «យើងប្រមូលផ្តុំបានមួយសប្តាហ៍ ចំណែកកីឡាកររបស់យើងមួយចំនួន ដែលមានការងារនៅក្រៅខេត្ត និងជាប់រៀននៅភ្នំពេញ ហើយមិនបានមកហ្វឹកហាត់ជាមួយយើងនោះ ក៏អ្នកទាំងនោះ បានសុំគេហាត់នៅតាមក្លិបផ្សេងៗផងដែរ អ៊ីចឹងគិតមកដល់ពេលនេះ យើងបានពង្រឹងទាំងទៅលើសមត្ថភាព បច្ចេកទេស ទិចនិកប្រយុទ្ធ និងកម្លាំងរួចរាល់អស់ហើយ»។
យ៉ាងណាក៏ដោយ លោក ម៉ម កុសល មិនហ៊ានរំពឹងច្រើនទេ ដោយលោកបានបញ្ជាក់ថា៖ «ខ្ញុំមិនហ៊ានរំពឹងច្រើនទេ គឺត្រឹម ៥០ ទៅ ៦០ ភាគរយប៉ុណ្ណោះ ព្រោះខេត្តត្បូងឃ្មុំ ជាក្រុមជើងឯកកាលពីឆ្នាំមុន ហេតុនេះគេក៏ត្រៀមខ្លួនបានល្អដែរ។ ទោះយ៉ាងណាដោយសារនេះជាការប្រកួតនៅលើទឹកដីរបស់យើង អ៊ីចឹងយើងអាចមានប្រៀបខ្លះ ដ្បិតអីកីឡាកររបស់យើង គឺទាំងអ្នកជាប់ធ្វើការងារ និងជាប់រៀនសូត្រនឹងមកជុំគ្នា ដើម្បីជួយក្រុមសម្រាប់ការប្រកួតនេះ»។
ទន្ទឹមជាមួយគ្នានេះ ការជួបគ្នារវាងក្រុមលេខ ១ ពូល E ខេត្តកែប និងក្រុមលេខ ១ មកពីពូល A ខេត្តកំពង់ឆ្នាំងនៅកីឡដ្ឋានខេត្តកែប នារសៀលម៉ោង ៣ ថ្ងៃពុធនេះ វាបានក្លាយជាការប្រកួតដែលគេគិតថា នឹងមានភាពតានតឹងខ្លាំង ព្រោះក្រុមទាំង ២ នេះ សុទ្ធតែបានល្អ ក្នុងវគ្គជម្រុះតាមពូល ក្នុងនោះ ខេត្តកំពង់ឆ្នាំងបានឈ្នះ ២ និងស្មើ ៤ ដង ហើយខេត្តកែប ឈ្នះ ៤ ស្មើ ១ និងចាញ់ ១។
យ៉ាងណាក៏ដោយ លោក ស សុរ៉ា គ្រូបង្វឹកក្រុមខេត្តកែប បាននិយាយថា៖ «យើងត្រៀមបានល្អ និងប្រកួតសមជើងបានច្រើន ហើយយើងក៏មានអាទិភាពក្នុងនាមជាម្ចាស់ផ្ទះដែរ។ ដូច្នេះខ្ញុំសង្ឃឹមឈ្នះ ៩០ ភាគរយ។ យើងអត់សូវបារម្ភទៅលើទម្រង់លេងរបស់ខេត្តកំពង់ឆ្នាំងប៉ុន្មានទេ ដោយសារកីឡាករភាគច្រើនរបស់ក្រុមនេះ ចេញពីសិស្សសាលា ដែលខ្ញុំធ្លាប់ស្គាល់ និងធ្លាប់បានឈ្នះកន្លងមក»៕
