.jpg)
កីឡាករ Lenglet (ស្ដាំ) លោតតែតបាល់កាត់មុខគូប្រជែងខ្លួន ដើម្បីរកជ័យជម្នះឲ្យក្រុម Barcelona។ AFP
អេស្ប៉ាញៈ ក្រុម Barcelona កំពុងខិតទៅរកការលើកពានលើកទី៨ នៃក្របខ័ណ្ឌអេស្ប៉ាញ LaLiga ក្នុងរយៈពេល ១១ ឆ្នាំនេះក្រោយពីកីឡាករ Clement Lenglet និង Jordi Alba រកបានម្នាក់ ១ គ្រាប់ជួយឲ្យឈ្នះក្រុម Real Sociedad ២-១ កាលពីថ្ងៃសៅរ៍។
ជ័យជម្នះនេះមានន័យថាក្រុម Barcelona គ្រាន់តែផ្ដួលក្រុម Alaves នៅថ្ងៃអង្គារបន្ទាប់មកត្រូវបន្តយកឈ្នះក្រុម Levante នាថ្ងៃសៅរ៍នៅកីឡដ្ឋាន Camp Nou នោះពួកគេនឹងអាចគ្រងជាម្ចាស់ជើងឯក La Liga ខណៈការដណ្ដើមបាន ៣ ពិន្ទុពីក្រុម Alaves ធ្វើឲ្យក្រុមនេះលែងខ្វល់ពីការចាញ់ឈ្នះរវាងក្រុម Atletico Madrid និង Valencia នៅថ្ងៃពុធ។
មិនថានៅពេល ៣ ថ្ងៃ ឬ ១ សប្ដាហ៍ទៀតនោះទេគឺវាច្បាស់រួចហើយថា ក្រុមរបស់លោក Ernesto Valverde បានការពារម្ចាស់ជើងឯករបស់ខ្លួនដោយជោគជ័យរួចហើយ ខណៈក្រុម Atletico តាមពីក្រោយក្រុមនេះ ៩ ពិន្ទុបន្ទាប់ពីយកឈ្នះក្រុម Eibar កាលពីថ្ងៃសៅរ៍។
លោក Valverde និយាយថា៖ «យើងត្រូវកម្ចាត់វាចេញពីក្បាលយើង ខណៈយើងបាននាំមុខគេ ៩ ពិន្ទុដាច់ ហើយឥឡូវយើងនៅសល់ពេល ៣ ថ្ងៃទៀតទេ ដើម្បីប្រកួតម្ដងទៀតជាពេលវេលាដ៏ពិបាកមួយ»។
ទន្ទឹមនេះដែរ Barcelona កំពុងតែផ្ដោតទៅរកការលើកពាននៃក្របខ័ណ្ឌ Champions League ដែលអាចនឹងត្រូវប្រកួតចុងក្រោយជាមួយក្រុម Liverpool ដែលក្រុមនេះបាននឹងកំពុងប្រជែងយកលេខ ១ ជាមួយក្រុម Manchester City ក្នុងក្របខ័ណ្ឌ Premier League។
យ៉ាងណាក៏ដោយនេះមិនមែនជាការបន្ថយល្បឿននោះទេ ព្រោះក្រុម Real Sociedad បានតាមស្មើវិញនៅក្នុងតង់ទី ២ ដែលរកបានដោយខ្សែប្រយុទ្ធ Juanmi ប៉ុន្តែ ២ នាទីក្រោយមក Alba បានបន្ថែម ១ គ្រាប់ទៀតធ្វើឲ្យ Barcelona ឈ្នះ Real Sociedad ២-១។
Lionel Messi មិនបានស៊ុតបញ្ចូលទីក៏ពិតមែន ប៉ុន្តែគាត់បានជួយក្រុមយ៉ាងច្រើនដោយបញ្ជូនបាល់យ៉ាងស្អាតឲ្យ Alba ស៊ុតបញ្ចូលទីយ៉ាងល្អ។
នេះជាការប្រកួតលីកលើកទី ២១ ហើយរបស់ Barcelona នៅរដូវកាលនេះដោយគ្មានការចាញ់ម្ដងណាឡើយ ខណៈក្រុមនេះបាននាំមុខ Real Madrid ១៦ ពិន្ទុនៅមុនពេលប្រកួតជាមួយក្រុម Athletic Bilbao ក្នុងទឹកដីខ្លួននៅយប់ថ្ងៃអាទិត្យកន្លងមកនេះ។
លោក Valverde បានថ្លែងបញ្ជាក់ថា៖ «អ្នកតែងតែទន្ទឹងរង់ចាំមើលការប្រកួតរបស់ក្រុម Real Madrid ព្រោះអ្នកតែងចាត់ទុកពួកគេថា ជាគូប្រជែងដ៏ខ្លាំងមួយ។ នៅក្នុងករណីនេះពួកគេអាចគិតពីរដូវកាលក្រោយទៀត»៕ SN
