.jpg)
លោក ប្រាក់ សុវណ្ណារ៉ា និងសមាជិកក្រុម U21 ជម្រើសជាតិកម្ពុជា ពេលហ្វឹកហាត់ នៅលើទឹកដីប្រទេសប្រ៊ុយណេ កាលពីព្រឹកថ្ងៃអង្គារនេះ។ រូបភាព សហការី
ភ្នំពេញៈ ក្រុមជម្រើសជាតិកម្ពុជាអាយុក្រោម ២១ ឆ្នាំ (U21) បានធ្វើដំណើរចាកចេញពីមាតុប្រទេស កាលពីព្រឹកថ្ងៃចន្ទ ម្សិលមិញ ដើម្បីទៅចូលរួមការប្រកួតពានរង្វាន់ស្តេចប្រ៊ុយណេ Hassanal Bolkiah Trophy 2018 ដែលនឹងប្រព្រឹត្តទៅពីថ្ងៃទី ២៣ ខែមេសា ដល់ថ្ងៃទី ៦ ខែឧសភា។
យ៉ាងណាក៏ដោយ ការផ្អាកការប្រកួតលីកកំពូលកម្ពុជា ឆ្នាំ ២០១៨ ចំនួន ២ សប្តាហ៍ជាប់គ្នា ដើម្បីទុកពេលឲ្យកីឡាករជម្រើសជាតិចំនួន ២២ នាក់ ទៅចូលរួមការប្រកួតនេះ បានធ្វើឲ្យមានការរិះគន់មួយចំនួន ពីអ្នកនិយមទស្សនាការប្រកួតបាល់ទាត់នៅកម្ពុជា ដោយពួកគេបានលើកឡើងបែបចំអកដល់សហព័ន្ធកីឡាបាល់ទាត់កម្ពុជាថា «គ្រាន់តែការប្រកួតពានរង្វាន់មិត្តភាពក្រៅផ្លូវការរបស់គេសោះ សុខចិត្តផ្អាកការប្រកួតលីកកំពូលរបស់ខ្លួនឯង ដល់ទៅ២ សប្តាហ៍។ បើយ៉ាងនេះៗ ធ្វើម៉េចបាល់ទាត់ខ្មែររីកចម្រើនទៅកើត?»។
ប៉ុន្តែគ្រូបង្គោល លោក ប្រាក់ សុវណ្ណារ៉ា ដែលជាអ្នកដឹកនាំក្រុមជម្រើសជាតិកម្ពុជា ទៅចូលរួមការប្រកួតពានរង្វាន់ Hassanal Bolkiah Trophy 2018 នេះ បានធ្វើការច្រានចោលចំពោះការរិះគន់ទាំងនោះ ដោយលោកបានអះអាងថា ការចេញទៅប្រកួតពានរង្វាន់ស្តេចប្រ៊ុយណេនេះ មិនបានធ្វើឲ្យប៉ះពាល់ដល់ការប្រកួតលីកកំពូលកម្ពុជា នោះទេ។
លោក សុវណ្ណារ៉ា បានប្រាប់ភ្នំពេញ ប៉ុស្តិ៍ មុនពេលលោកដឹកនាំក្រុមU21កម្ពុជា ចេញទៅប្រទេសប្រ៊ុយណេថា៖«អ្នករិះគន់ ចេះតែលើកឡើង ប៉ុន្តែតាមកម្មវិធីប្រកួតលីកកំពូល យើងគ្រាន់តែមិនមានការសម្រាក គឺកម្មវិធីចប់ដដែលហ្នឹង»។
លោកបានបញ្ជាក់ថា៖«តាមកម្មវិធីចាស់របស់លីកកំពូលកម្ពុជា គឺក្រោយចប់ជើងទី ១ យើងត្រូវសម្រាក ២ សប្តាហ៍ អ៊ីចឹងបើយើងបានសម្រាក ២ សប្តាហ៍នេះហើយ ពេលចប់ប្រកួតជើងទី ១ យើងមិនបាច់សម្រាកទៀតទេ គឺយើងលេងបន្តរហូតទៅ ដូច្នេះកម្មវិធីប្រកួតលីកកំពូល នឹងបញ្ចប់តាមគម្រោងដដែលទេ»។
នៅពេលសួរថា តើការចេញទៅប្រកួតពានស្តេចប្រ៊ុយណេនេះ វាមានសារៈសំខាន់ដល់ក្រុមជម្រើសជាតិកម្ពុជា ដែរទេ? លោក ប្រាក់ សុវណ្ណារ៉ា បានឆ្លើយតបថា៖«នៅតាមបណ្តាប្រទេសផ្សេងៗ ក្នុងតំបន់អាស៊ាន ខ្ញុំមិនដឹងថា គេគិតយ៉ាងម៉េចចំពោះពាននេះទេ ប៉ុន្តែចំពោះខ្មែរយើង គឺសំខាន់ ដោយសារកីឡាកររបស់យើង ត្រូវត្រៀមស៊ីហ្គេម នៅឆ្នាំក្រោយផង»។
លោកបានបន្ថែមថា៖ «វាមិនមែនសំដៅតែទៅលើពាននេះមួយទេ តែជាការលើកទឹកចិត្តដល់កីឡាករ និងការថ្លឹងថ្លែងមើលពីកម្រិតលេងរបស់ក្រុមយើង និងប្រទេសជិតខាង តើកម្រិតលេងរបស់យើងនៅត្រឹមណា? ដើម្បីយើងអាចត្រៀមលក្ខណៈឲ្យបានល្អ សម្រាប់ស៊ីហ្គេម ឆ្នាំ ២០១៩ ព្រោះពានមួយនេះ គឺខាងប្រ៊ុយណេ ធ្វើឡើងដើម្បីត្រៀមទៅស៊ីហ្គេមនេះឯង»។
ក្រុម U21 ជម្រើសជាតិកម្ពុជា បានធ្វើដំណើរទៅប្រទេសប្រ៊ុយណេ កាលពីព្រឹកថ្ងៃចន្ទ ប៉ុន្តែខ្សែប្រយុទ្ធ ឃួន ឡាបូរ៉ាវី, លី វ៉ាហេទ និង សេត រ៉ូស៊ីប ដែលមានឈ្មោះត្រូវទៅប្រកួតពានរង្វាន់ស្តេចប្រ៊ុយណេនោះដែរ គឺមិនបានរួមដំណើរទៅជាមួយទេ ដោយសារអ្នកទាំង៣នេះ ជាប់ភារកិច្ចជួយក្រុមបឹងកេត ដែលត្រូវទៅចូលរួមការប្រកួតបង្រ្គប់កិច្ចជាមួយក្រុមម្ចាស់ផ្ទះមីយ៉ាន់ម៉ា Shan United ក្នុងវគ្គចែកពូលពានរង្វាន់ AFC Cup 2018 នាថ្ងៃទី២៥ ខែមេសា ខាងមុខនេះ។
គួរបញ្ជាក់ថា ការប្រកួតពានរង្វាន់ Hassanal Bolkiah Trophy 2018 នេះ ក្រុមកម្ពុជា ឈរនៅពូល B ជាមួយក្រុម U21 ឡាវ និងសិង្ហបុរី ខណៈពូល A មានក្រុមម្ចាស់ផ្ទះប្រ៊ុយណេ ថៃ មីយ៉ាន់ម៉ា និងទីម័រខាងកើត ហើយសម្រាប់ការប្រកួតបើកឆាក កាលពីថ្ងៃចន្ទម្សិលមិញ ក្រុមម្ចាស់ផ្ទះប្រ៊ុយណេ បានចាញ់ក្រុមទីម័រខាងកើត ១-០ ឯក្រុមមីយ៉ាន់ម៉ា ត្រូវជួបក្រុម U21 ថៃ នៅល្ងាចថ្ងៃអង្គារនេះ៕
