.jpg)
លោក ហុក សុជីវ័ន បានសម្លឹងមើលកូនក្រុមរបស់លោក(ខៀវ) ប្រជែងយកបាល់ជាមួយកីឡាកររបស់ក្រុមស្វាយរៀង ក្នុងការប្រកួតក្រោមតំណក់ទឹកភ្លៀង ក្នុងជើងទី២ កាលពីយប់ថ្ងៃពុធ ម្សិលមិញ។ ស្រេង ម៉េងស្រ៊ុន
ភ្នំពេញៈ ក្រុមវិសាខា និងអគ្គិសនីកម្ពុជា (EDC) សុទ្ធតែមិនអាចសម្រេចគោលដៅ ក្នុងការវាយបកយកឈ្នះលើក្រុមព្រះខ័នរាជស្វាយរៀង និង ភ្នំពេញក្រោន ក្នុងការប្រកួតកាត់សេចក្តីជើងទី ២ វគ្គ ១៦ ក្រុមថ្នាក់ជាតិ ពានរង្វាន់សម្តេច ហ៊ុន សែន លើកទី ១២ ឆ្នាំ ២០១៨ កាលពីយប់ថ្ងៃពុធ ម្សិលមិញ ដែលធ្វើឲ្យក្រុមទាំង២នេះ បាត់បង់ឱកាសទៅវគ្គបន្តដូចគ្នា។
ផ្ទុយពីនេះក្រុមប៉ូលិស និងអង្គរថាយហ្គឺរ សុទ្ធតែបានរកឃើញនូវជ័យជម្នះរៀងៗខ្លួន ដើម្បីលុបចោលនូវលទ្ធផលស្មើ សម្រាប់ការប្រកួតជើងទី ១ ជាមួយក្រុមគិរីវង់អេហ្វស៊ី និងសូលទីឡូអង្គរ។ លទ្ធផលនេះបានជួយឲ្យក្រុមប៉ូលិស និងអង្គរថាយហ្គឺរ បានឡើងទៅវគ្គ ៨ ក្រុមជាមួយក្រុមបឹងកេត ក្រសួងការពារជាតិ ព្រះខ័នរាជស្វាយរៀង ភ្នំពេញក្រោន និងណាហ្គាវើល។
សម្រាប់ការប្រកួត នៅកីឡដ្ឋានស្តាតចាស់ កាលពីយប់ថ្ងៃពុធ ម្សិលមិញនោះ ខ្សែការពារជើងចាស់ ទៀន ទីនី បានជួយឲ្យក្រុមវិសាខា នាំមុខក្រុមស្វាយរៀង ១-០ នៅនាទីទី ៧៣ ប៉ុន្តែ លី សារ័ត្ន បានស៊ុតតាមស្មើឲ្យក្រុមស្វាយរៀង នៅនាទីទី ៧៧ ហើយលទ្ធផលស្មើគ្នា ១-១ នេះបានជួយឲ្យក្រុមម្ចាស់ជើងឯក ស្វាយរៀង ឡើងទៅវគ្គ ៨ ក្រុមបន្ត តែក្រុមវិសាខា បានធ្លាក់ត្រឹមវគ្គ ១៦ ក្រុមនេះ ព្រោះការប្រកួតជើងទី ១ ពួកគេបានចាញ់ក្រុមស្វាយរៀង ១-០។
ទាក់ទៅនឹងលទ្ធផលនេះ លោក ហុក សុជីវ័ន គ្រូបង្វឹកក្រុមវិសាខា បានប្រាប់ភ្នំពេញ ប៉ុស្តិ៍ មុននេះបន្តិចថា៖ «យើងបានដាក់គំនាបគេច្រើន ប៉ុន្តែខ្សែប្រយុទ្ធរបស់យើងនៅមានកម្រិតនូវឡើយ អត់សូវមានធ្វើអីឲ្យគេបារម្ភទេ ហើយតំបន់កណ្តាលរបស់យើង ក៏លេងមិនសូវយល់ចិត្តគ្នាប៉ុន្មានដែរ ដោយសារយើងបានដាក់កីឡាករថ្មីៗ ឲ្យចូលលេងជាមួយគ្នា ដោយមិនបានហ្វឹកហាត់រួមគ្នា និងធ្លាប់លេងជាមួយគ្នា កន្លងមក»។
ទោះបីជាយ៉ាងណា លោក ហុក សុជីវ័ន មិនបានបង្ហាញការសោកស្តាយ ចំពោះការចាញ់ក្រុមស្វាយរៀង និងបានធ្លាក់ពីពានសម្តេចហ៊ុន សែន ត្រឹមវគ្គ ១៦ ក្រុមនេះទេ។ លោកបាននិយាយថា៖ «ការទទួលបានលទ្ធផលប៉ុណ្ណោះ គឺសម្រាប់ខ្ញុំ វាល្អហើយ ព្រោះយើងមិនមែនមកប៉ះក្រុមមួយ ដែលអត់ជាងយើងនោះទេ គឺយើងជួបក្រុម ដែលសម្បូរកីឡាករល្អ ហើយធនធានរបស់គេ បានលេងជាមួយគ្នារាប់ឆ្នាំមកហើយ មិនក្រោម ៥ ឆ្នាំទេ អ៊ីចឹងការទទួលបានលទ្ធផលប៉ុណ្ណឹង វាល្អសម្រាប់ក្រុមរបស់យើងហើយ»។
ដូចគ្នានេះដែរ ក្រុមអគ្គិសនីកម្ពុជា ដែលរំពឹងថា អាចវាយបកយកឈ្នះក្រុមភ្នំពេញក្រោន ដើម្បីលុបចោលការចាញ់ ១-០ ក្នុងជើងទី ១ នោះ គឺបានជួបការខកចិត្តកាន់តែខ្លាំង ព្រោះពួកគេ បានបន្តចាញ់ភ្នំពេញក្រោន ៤-០ បន្ថែមទៀត ហើយការចាញ់សរុប ៥-០ នេះបានធ្វើឲ្យក្រុមធ្លាប់ទទួលបានលេខ ៣ កាលពីឆ្នាំ ២០១៧ អគ្គិសនីកម្ពុជា ធ្លាក់ពីការប្រកួតនៅឆ្នាំនេះ ត្រឹមវគ្គ ១៦ ក្រុម ដ៏គួរឲ្យសោកស្រាយ។
ផ្ទុយពីនេះក្រុមក្រសួងការពារជាតិ បានលត់ក្រុមអាស៊ីអឺរ៉ុប ៧-១ បន្ថែមទៅលើការឈ្នះ ៣-១ ក្នុងជើងទី ១ ហើយក្នុងការប្រកួតនេះ មានហេតុការណ៍ដ៏កម្រមួយបានកើតឡើង គឺក្រុមអាស៊ីអឺរ៉ុប បានដាក់ខ្សែបម្រើ ម៉េត សុភ័ក្ត្រា ឲ្យចូលចាំទី នៅនាទីទី ៨៤ ខណៈអ្នកចាំទី គា ធារ៉ា បានទទួលកាតក្រហម ស្របពេលអាស៊ីអឺរ៉ុប បានប្តូរកីឡករឲ្យចូលលេងគ្រប់ចំនួន តាមការកំណត់នោះ។
ចំណែកក្រុមម្ចាស់ផ្ទះបឹងកេត បានបន្តយកឈ្នះលើក្រុមវេស្ទើន ១-០ បន្ថែមទៅលើការឈ្នះ ៥-១ កាលពីជើងទី១ ដើម្បីឡើងទៅវគ្គបន្ត។ រីឯក្រុមប៉ូលិស បានយកឈ្នះក្រុមម្ចាស់ផ្ទះគិរីវង់ ១-០ បន្ថែមទៅលើការស្មើគ្នា ២-២ ក្នុងជើងទី ១ ចំណែកក្រុមអង្គរថាយហ្គឺរ បានឈ្នះក្រុមសូលទីឡូអង្គរ ១-០ បន្ថែមទៅស្មើ ២-២ ក្នុងជើងទី ១ ដូចគ្នា ដើម្បីបានឡើងទៅវគ្គបន្ត។
ដោយឡែកជំនួបលើកទី ២ រវាងក្រុមណាហ្គាវើល និងក្រុមខេត្តកំពត ដែលត្រូវបានលើកពេលពីថ្ងៃពុធ ធ្វើនៅព្រឹកថ្ងៃព្រហស្បតិ៍នេះ គឺកីឡាករ ឡេង មករា បានជួយឲ្យក្រុមណាហ្គាវើល តាមស្មើក្រុមកំពត ១-១ នៅនាទីទី ៨០។ ទោះលទ្ធផលនេះ មិនសូវសមទំនងទៅនឹងកម្រិតលេងរបស់ណាហ្គាវើល ប៉ុន្តែការឈ្នះក្រុមកំពត ៥-១ កាលពីជើងទី ១ វាគ្រប់គ្រាន់ ក្នុងការជួយឲ្យក្រុមណាហ្គាវើល ឡើងទៅវគ្គ៨ក្រុមទៅហើយ៕
