ភ្នំពេញ៖ ក្លិបដែលមានមូលដ្ឋានរឹងមាំចំនួន ៤ មានព្រះខ័នរាជស្វាយរៀង ណាហ្គាវើល វិសាខា និងអង្គរថាយហ្គឺរ នឹងត្រូវវិលមកជួបគ្នានៅលើវាលស្មៅចុងសប្តាហ៍នេះ ដើម្បីប្រជែងគ្នាយក ៣ ពិន្ទុ សម្រាប់ការប្រកួតលីកកំពូលកម្ពុជាចំណែកខ្សែបម្រើ ម៉ាត់ យ៉ាម៉ីន ដែលត្រូវបានក្លិបបឹងកេតផ្តាច់កុងត្រាមុនពេលកំណត់នោះ រកបានទ្រនំថ្មីសម្រាប់ការវិលមកកាន់ទីលានប្រកួតវិញហើយ។
នៅក្នុងការប្រកួតប្រចាំសប្តាហ៍ទី ១១ នេះ ក្រុមណាហ្គាវើល នឹងត្រូវស្វាគមន៍ក្រុមលេខ ១ មិនទាន់ស្គាល់ការចាញ់ព្រះខ័នរាជស្វាយរៀង។ ក្រុមណាហ្គាវើល បានចាត់ទុកការជំនួបលើកនេះ គឺជាការប្រកួតដ៏ធំរបស់ពួកគេ ហើយណាហ្គាវើល បានបញ្ជាក់នៅលើផេចហ្វេសប៊ុករបស់ខ្លួនថា ពួកយើងបានត្រៀមខ្លួនរួចហើយសម្រាប់ទទួលភ្ញៀវដ៏ពិសេសក្នុងសប្តាហ៍នេះ។
ចំពោះការវិលមកជួបរវាងក្លិប យក្សទាំង ២ នេះ ក្រុមមាន ២៥ ពិន្ទុ ស្វាយរៀង ត្រូវការឈ្នះខ្លាំង ដើម្បីរក្សាតំបន់កំពូលតារាងពីការប្រជែងរបស់ក្រុមបឹងកេត ដែលកំពុងឈរនៅលេខ ២ មាន ២៣ ពិន្ទុ ព្រោះនៅសប្តាហ៍នេះ បឹងកេត នឹងឈ្នះបាន ៣ ពិន្ទុ ដោយគ្មានអ្វីត្រូវសង្ស័យនោះឡើយ ចំណែក ក្រុមមាន ២១ ពិន្ទុ ណាហ្គាវើល ក៏ត្រូវការឈ្នះ ៣ ពិន្ទុ ដើម្បីរក្សាទីតាំងលេខ ៣ របស់ពួកគេដូចគ្នា។
លោក ជូ សារឿន គ្រូជំនួយក្រុមស្វាយរៀង បានប្រាប់ថា៖ «យើងពិតជាចង់ឈ្នះ ៣ ពិន្ទុ ដើម្បីរក្សាតំបន់កំពូលរបស់យើង ប៉ុន្តែណាហ្គាវើល ជាឧបសគ្គ ១ ក្នុងចំណោមឧបសគ្គធំទាំង ២ ដែលយើងត្រូវប្រឈម សម្រាប់ការប្រកួតនៅសល់ក្នុងជើងទី ១ នេះ ហេតុនេះយើងត្រូវតែខំប្រឹងឲ្យអស់ពីសមត្ថភាព និងលេងដោយប្រុងប្រយ័ត្នបំផុតសម្រាប់ការប្រកួតលើកនេះ»។
ចំណែកក្រុមកំពុងឈរនៅលេខ ៤ មាន ១៩ ពិន្ទុ វិសាខា ត្រូវទទួលក្រុមមានមូលដ្ឋាននៅខេត្តសៀមរាប អង្គរថាយហ្គឺរ។ អង្គរថាយហ្គឺរ ដែលទើបធ្លាក់ទៅឈរនៅលេខ ៧ មាន ១៥ ពិន្ទុនោះ ពិតជាត្រូវការឈ្នះខ្លាំងបំផុត ដើម្បីអាចឡើងមកកាន់តំបន់កំពូលតារាងទាំង ៦ (Top6)វិញ ព្រោះមានតែក្រុម Top6 ប៉ុណ្ណោះ ដែលអាចមានសិទ្ធិប្រកួតប្រជែងយកពាននៅជើងទី២។
លោក អ៊ុំ ករុណា លេខាធិការក្លិបអង្គរថាយហ្គឺរ បានប្រាប់ភ្នំពេញប៉ុស្តិ៍ថា៖ «យើងត្រូវប៉ះក្រុមខ្លាំង អ៊ីចឹងយើងត្រូវតែខំប្រឹងឲ្យកាន់តែខ្លាំង ព្រោះយើងចង់ឡើងមកឈរនៅតំបន់ Top6 វិញ។ យើងដឹងថា វិសាខា ជាក្រុមខ្លាំងដែលជំនួប ៤ លើកចុងក្រោយនេះ យើងឈ្នះបានតែ ១ លើកគត់ និងចាញ់ ៣ លើក ប៉ុន្តែយើងនឹងខំប្រឹងឲ្យអស់ពីសមត្ថភាព ព្រោះយើងពិតជាចង់ឈ្នះ ៣ ពិន្ទុ ហើយយើងបានត្រៀមខ្លួនរួចរាល់អស់ហើយដោយសង្ឃឹមថា យើងនឹងទទួលបានលទ្ធផលល្អ»។
ដោយឡែក ខ្សែបម្រើដ៏មានសមត្ថភាព ម៉ាត់ យ៉ាម៉ីន ដែលត្រូវបានក្លិបបឹងកេតបញ្ចប់កុងត្រា មុនពេលកំណត់ កាលពីដើមខែកុម្ភៈ ឆ្នាំ ២០២០ បន្ទាប់ពី យ៉ាម៊ីន ត្រូវបានកម្លាំងសមត្ថកិច្ចឃាត់ខ្លួនទាំងកណ្តាលយប់ នៅក្នុងចំណោមមនុស្ស ៥២ នាក់ (ស្រី ១៨ នាក់) ជុំវិញការប្រើប្រាស់ថ្នាំគ្រវី នៅមណ្ឌលកម្សាន្តផ្លាយនោះ គឺពេលនេះរូបគេរកបានទ្រនំថ្មីហើយ។
ម៉ាត់ យ៉ាម៉ីន បានចុះកុងត្រាជាមួយក្លិបនគរបាលជាតិ កាលពីថ្ងៃព្រហស្បតិ៍ ហើយតាមរយៈកុងត្រា ១ រដូវកាលកន្លះនេះ យ៉ាម៉ីន នឹងត្រូវបង្ហាញវត្តមានសម្រាប់ការប្រកួតជើងទី២ នៃលីកកំពូលកម្ពុជា ឆ្នាំ ២០២០ នេះ រហូតដល់ឆ្នាំ ២០២១ ហើយលោក សារ៉េត ស៊ីដន នាយកផ្នែករដ្ឋបាលក្លិបនគរបាលជាតិ បានអះអាងប្រាប់ប្រព័ន្ធផ្សព្វផ្សាយក្នុងស្រុកថា នឹងផ្ដល់ឱកាសឲ្យ យ៉ាម៉ីន បានបង្ហាញសមត្ថភាព ដើម្បីមានឱកាសជាប់ជម្រើសជាតិវិញ៕
កម្មវិធីប្រកួតនៅថ្ងៃសៅរ៍
-គិរីវង់ v ភ្នំពេញក្រោន កីឡដ្ឋានគិរីវង់សុខសែនជ័យ ៣:៣០
-វិសាខា v អង្គរថាយហ្គឺរ កីឡដ្ឋានព្រីនស៍ ៦:០០
-ណាហ្គាវើល v ស្វាយរៀង កីឡដ្ឋានស្តាតចាស់ ៦:០០
៣ ប្រកួតនៅថ្ងៃអាទិត្យ
-សូលទីឡូអង្គរ v អគ្គិសនីកម្ពុជា កីឡដ្ឋាន SRU ៣:៣០
-នគរបាលជាតិ v អាស៊ីអឺរ៉ុប កីឡដ្ឋាន AEU ៣:៣០
-បឹងកេត v យុវជនបាល់ទាត់ជាតិ កីឡដ្ឋានខេមបូឌាអ៊ែរវ៉េ ៣:៣០