ភ្នំពេញៈ គ្រូបង្វឹកក្រុមក្រសួង ការពារជាតិ (ទ័ព បានចាត់ទុកការវាយបកតាមស្មើក្រុមវេស្ទើន ក្នុងការប្រកួតជើងទី ២ លីកកំពូលកម្ពុជា កាលពីថ្ងៃអាទិត្យម្សិលមិញថា ជាលទ្ធផលដ៏អាក្រក់បំផុត ដែលស្ទើរតែមិនអាចទទួលយកបាន ប៉ុន្តែក្រុមបឹងកេត និងវិសាខា សុទ្ធតែទទួលបាន ៣ ពិន្ទុបន្ថែម ដើម្បីពង្រឹងឱកាស ក្នុងការប្រកួតយកពានលីកកំពូលកម្ពុជា ឆ្នាំ ២០១៨ នេះ។
លោក ភា សុភ័ក្ត្រា គ្រូបង្វឹកក្រុមទ័ព បានប្រាប់ភ្នំពេញ ប៉ុស្តិ៍ ក្រោយ ការប្រកួតថា៖ «បើយើងប្រៀបធៀបលទ្ធផលជើងទី ១ និងលទ្ធផលការប្រកួតជើងទី ២ នេះ គឺវាជាលទ្ធផលដែលអាក្រក់បំផុត ស្ទើរតែមិនអាចទទួលយកបាន»។
គួររំឭកថា ក្រុមទ័ព បានលត់វេស្ទើន ៨-០ ក្នុងជើងទី ១ ប៉ុន្តែការវិលមកជួបគ្នាក្នុងជើងទី ២ នៅកីឡដ្ឋានវេស្ទើន កាលពីថ្ងៃអាទិត្យ ទ័ព បានវាយបកតាមស្មើក្រុមវេស្ទើន ៣-៣ នៅនាទីទីបន្ថែម ៩០+៤។ ក្រុមវេស្ទើន បាននាំមុខ ២-០ នៅតង់ទី ១ ដែលសម្រេចបានដោយខ្សែប្រយុទ្ធ Yuspen Uopdana នៅនាទីទី ១៤ និងយ៉ាន់ សុខា នៅនាទីទី ៣៤ ប៉ុន្តែ Yoo Jaeho និង រ៉ឹង ប៊ុនហៀង រកបានម្នាក់ ១ គ្រាប់ តាមពីក្រោយនៅនាទីទី ៥៧ និងនាទីទី ៦៩។
ការតាមស្មើ ២-២ នេះបានធ្វើឲ្យអ្នកទស្សនា គិតថា ក្រុមទ័ព អាចនឹងរកបានគ្រាប់បាល់បន្ថែមទៀត ដើម្បីយកឈ្នះក្រុមវេស្ទើន បន្ថែមទៅលើជោគជ័យយ៉ាងធំធេងរបស់ពួកគេនៅជើងទី ១ ប៉ុន្តែក្តីបារម្ភបែរជាបានកើតឡើងចំពោះក្រុមទ័ព ទៅវិញ ខណៈកីឡាករទើបដាក់ឲ្យចូលលេង កែវ ឧត្តម បានរកឃើញគ្រាប់បាល់ទី ៣ ឲ្យវេស្ទើន នៅនាទីទី ៨៦ នោះ តែ រ៉ឹង ប៊ុនហៀង បានរកឃើញគ្រាប់បាល់តាមស្មើឲ្យក្រុមទ័ព នៅនាទីទីបន្ថែម ៩០+២។
លោក ភា សុភ័ក្ត្រា បានបន្ថែមថា៖ «យើងលេងជាក្រុមបានល្អ ហើយខ្សែប្រយុទ្ធរបស់យើងក៏លេងបានល្អដែរ ប៉ុន្តែយើង error ខ្សែការពារម្នាក់ៗ ប៉ុន្តែកំហុសនេះ ក៏មកពីទីលានផងដែរ ព្រោះទីលានមិនស្មើ នាំឲ្យយើងពិបាកប៉ាន់ស្មានខ្យល់បាល់ គឺបាល់ធ្លាក់មកវាខុសទៅនឹងទិសដៅដែលយើងខំពាំងយកបាល់ ហើយនាំឲ្យខាងគេអាចឆក់បាល់នោះបាន និងស៊ុតបញ្ចូលទីរបស់យើងដល់ ទៅ ៣ គ្រាប់»។
ទោះបីជាយ៉ាងណា គ្រូបង្វឹករូបនេះបានបន្ថែមទៀតថា៖ «ខ្ញុំមិនបន្ទោសកូនក្រុមខ្ញុំនោះទេ គឺយើងមានតែលើកទឹកចិត្តឲ្យពួកគាត់ខំប្រឹងបន្ថែមទៀត ហើយខ្ញុំទទួលស្គាល់ថា សមត្ថភាពលេងរបស់វេស្ទើន ក្នុងជើងទី ២ នេះ មិនមែនជាសមត្ថភាពពេលប្រកួតជើងទី ១ នោះទេ គឺពួកគាត់មានកីឡាករបរទេស ដែលមានល្បឿន គឺទោះពួកគាត់ មិនដែលឈ្នះក្រុមគេពីមុនមក តែក្នុងជើងទី ២ នេះ វេស្ទើន លេងគ្រោះថ្នាក់ជាងមុន»។
ផ្ទុយពីនេះក្រុមបឹងកេត បានវាយបកយកឈ្នះក្រុមសូលទីឡូអង្គរ ២-១ ដើម្បីបំពេញការខកចិត្តចំពោះលទ្ធផលស្មើគ្នា ១-១ កាលពីជើងទី ១ កន្លងមក ហើយ Oiboh Julius និង Gbenga ជាអ្នកជួយឲ្យបឹងកេត ឈ្នះលើកនេះ ឯ ១ គ្រាប់របស់សូលទីឡូអង្គរ រកបានដោយ Bata។ លទ្ធផលនេះបានជួយឲ្យបឹងកេត បន្តឈរនៅលេខ ១ មាន ៣៩ ពិន្ទុ។
ចំណែកក្រុមវិសាខា បានឈ្នះក្រុមអាស៊ីអឺរ៉ុប ៤-២ ដើម្បីសម្រេចការសងសឹករបស់ខ្លួន ចំពោះការចាញ់អាស៊ីអឺរ៉ុប ២-០ កាលពីជើងទី ១។ ខ្សែប្រយុទ្ធ កូរ៉េខាងជើង Kyong Hun Kim, Hyok Chol Ri កែវ សុខផេង និង ម៉ាត់ សាក់រ៉ូវី សុទ្ធតែរកបានម្នាក់ ១ គ្រាប់ ជួយឲ្យ វិសាខា ឈ្នះអាស៊ីអឺរ៉ុប ៤-២ លើកនេះ ឯ ២ គ្រាប់របស់អាស៊ីអឺរ៉ុប រកបានដោយ George Kelechi និង Privat។
ការសម្រេចសងសឹក លើក្រុមអាស៊ីអឺរ៉ុប លើកនេះ បានជួយឲ្យ វិសាខា ឡើងទៅឈរនៅលេខរៀងទី ២ ជាបណ្តោះអាសន្ន ដោយមាន ៣៥ ពិន្ទុ ខណៈក្រុមមាន ៣២ ពិន្ទុស្រាប់ ណាហ្គាវើល បានលើកពេលប្រកួតជាមួយក្រុមភ្នំពេញក្រោន នោះ។
ចំណែកក្រុមព្រះខ័នរាជស្វាយរៀង បានវាយបកតាមស្មើក្រុមម្ចាស់ផ្ទះអង្គរថាយហ្គឺរ ១-១ នៅលើទឹកដីខេត្តសៀមរាប ហើយលទ្ធផលស្មើនេះ វាជារឿងដ៏ល្អមួយចំពោះក្រុមស្វាយរៀង ព្រោះកាលប្រកួតជើងទី ១ ពួកគេបានចាញ់ក្រុមអង្គរថាយហ្គឺរ ៤-១។ រីឯក្រុមប៉ូលិស បានយកឈ្នះក្រុមអគ្គិសនីកម្ពុជា ៤-១ កាលពីយប់ថ្ងៃអាទិត្យ ម្សិលមិញ៕