.jpg)
លោក Antonio Conte គ្រូបង្វឹករបស់ក្រុម Chelsea បញ្ជាក់ថា Man City អាចនឹងគ្រប់គ្រង Premier League រយៈពេលយូរ។ AFP
ក្រុងឡុងដ៍: លោក Antonio Conte បាននិយាយថា ក្រុម Manchester City អាចនឹងគ្រប់គ្រងកីឡាបាល់ទាត់អង់គ្លេស ក្នុងរយៈពេលយូរ ក្រោយពីក្រុមរបស់លោក Pep Guardiola បានទម្លាក់ក្រុម Chelsea ចេញពីម្ចាស់ជើងឯកក្របខ័ណ្ឌ Premier League។
Man City បានក្លាយជាម្ចាស់ជើងឯង កាលពីចុងសប្តាហ៍មុន ខណៈដែលនៅសល់ការប្រកួត ៥ លើកទៀតនៅរដូវកាលនេះ និងនាំមុខ ១៦ ពិន្ទុដាច់លើក្រុមឈរលេខ ២ Manchester United។
លោក Conte ដែលបានឈ្នះពានក្របខ័ណ្ឌ Premier League ក្នុងរដូវកាលទី ១ របស់លោក នៅឯកីឡដ្ឋាន Stamford Bridge នោះ បានឲ្យដឹងថា៖ «Manchester City គឺជាក្លិបមួយដែលអាចបន្តគ្រប់គ្រង ឈ្នះ មិនត្រឹមតែនៅអង់គ្លេសប៉ុណ្ណោះ ប៉ុន្តែ ក៏អាចប្រជែងពាន Champions League ផងដែរ»។
ខ្សែបម្រើអៀរឡង់ Robbie Brady (ឆ្វេង) របស់ Burnley ដណ្តើមបាល់ជាមួយនឹងខ្សែការពារដាណឺម៉ាក Andreas Christensen របស់ក្រុម Chelsea ក្នុងការប្រកួតកន្លងមក។ AFP
គ្រូបង្វឹកសញ្ជាតិអ៊ីតាលីរូបនេះបានបន្ថែមទៀតថា៖ «ពួកគេមានសមត្ថភាពក្នុងការធ្វើបែបនេះបាន។ វាជាក្លិបដ៏រឹងមាំមួយ ពួកគេមានក្រុមដ៏សំខាន់មួយ រួមជាមួយនឹងកីឡាករដ៏អស្ចារ្យជាច្រើន និងជាក្លិបដែលចង់បណ្តាក់ទុន និងអភិវឌ្ឍ។ មានរឿងជាច្រើនទៀតដែលកំពុងតែស្ថិតនៅលើផ្លូវដ៏ត្រឹមត្រូវ»។
Chelsea នឹងឈានទៅកាន់ការប្រកួតនៅរាត្រីនេះ ជាមួយនឹងក្រុម Burnley ខណៈដែលក្តីសង្ឃឹមនៃការប្រជែងចំណាត់ថ្នាក់លេខ ៤ របស់ពួកគេកំពុងតែស្ថិតក្នុងភាពស្តួចស្តើង។
ក្រុមតោខៀវមួយនេះ កំពុងតែដេញតាមពីក្រោយក្រុមឈរលេខ ៤ Tottenham ៨ ពិន្ទុ បើទោះបីក្រុម Spurs លេងការប្រកួតច្រើនជាង ១ ប្រកួតក៏ដោយ។
លោក Conte បានបញ្ជាក់ថា Chelsea នឹងធ្វើដំណើរឆ្ពោះទៅកាន់ការឈ្នះកៅអីទៅលេងក្នុងក្របខ័ណ្ឌ Champions League បើទោះស្ថិតក្នុងភាពស្តួចស្តើងក៏ដោយ។
ការប្រកួតនេះនឹងចាប់ផ្តើមនៅម៉ោង ១:៤៥ ទៀបភ្លឺ ម៉ោងនៅកម្ពុជា៕ IS
