ភ្នំពេញៈ គ្រូបង្វឹកក្រុមជម្រើសជាតិម៉ាឡេស៊ីអាយុក្រោម ២២ ឆ្នាំលោក Ong Kim Swee ហាក់មានការចាប់អារម្មណ៍ទៅលើភាពរីកចម្រើននៃវិស័យបាល់ទាត់នៅកម្ពុជា ហើយលោកបានគិតថាការជួបក្រុមម្ចាស់ផ្ទះកម្ពុជាក្នុងការប្រកួតបើកឆាកពានរង្វាន់ AFF U22 LG Cup 2019 នៅពហុកីឡដ្ឋានជាតិ នាល្ងាចថ្ងៃចន្ទនេះវាមិនមែនជារឿងងាយស្រួលសម្រាប់ក្រុមរបស់លោកនោះទេ។
លោក Ong Kim Swee បាននិយាយនៅក្នុងសន្និសីទកាសែតស្តីពីការប្រកួតពាន AFF U22 LG Cup 2019 កាលពីថ្ងៃសៅរ៍ថា៖ «យើងមើលឃើញហើយថា វិស័យបាល់ទាត់នៅកម្ពុជាកំពុងមានការរីកចម្រើនគួរកត់សម្គាល់អ៊ីចឹងការជួបក្រុម U22 កម្ពុជាលើកនេះវាមិនមែនជារឿងងាយស្រួលនោះទេ»។
យ៉ាងណាក៏ដោយគ្រូបង្វឹកជនជាតិម៉ាឡេស៊ីលោក Ong Kim Swee ដែលបានដឹកនាំក្រុមជម្រើសជាតិម៉ាឡេស៊ី យកឈ្នះក្រុមកម្ពុជា ៣-២ ក្នុងការប្រកួត AFF Championship 2016 រូបនេះបានបន្ថែមថា៖ «ក្រុមកម្ពុជាកំពុងមានការវិវឌ្ឍខ្លួនផងដែរ អ៊ីចឹងជំនួបលើកនេះនឹងក្លាយជាការប្រកួតដ៏ចាប់អារម្មណ៍មួយ ប៉ុន្តែយើងនឹងទទួលបានលទ្ធផលល្អតាមការរំពឹងទុក»។
គួររំឭកថាសម្រាប់ការជួបគ្នា ២ លើកចុងក្រោយកាលពីឆ្នាំ ២០១៨ កន្លងមកនេះក្រុមជម្រើសជាតិកម្ពុជាបានចាញ់ក្រុមជម្រើសជាតិម៉ាឡេស៊ី ៣-១ ក្នុងការប្រកួតមិត្តភាព និងបានបន្តចាញ់ ១-០ ក្នុងការប្រកួតផ្លូវការពានរង្វាន់ AFF Championship 2018 ហើយកីឡាករវ័យក្មេងរបស់ម៉ាឡេស៊ីមួយចំនួនដែលបានចូលរួមកាលនោះក៏មានវត្តមាននៅក្នុងក្រុម U22- ម៉ាឡេស៊ីលើកនេះផងដែរគឺដូចគ្នាទៅនឹងក្រុម U22 កម្ពុជាដែរ។
លោក Felix Dalmas គ្រូបង្វឹកក្រុមជម្រើសជាតិកម្ពុជាបាននិយាយថា៖ «ម៉ាឡេស៊ីគឺជាក្រុមខ្លាំងមួយ។ កាលពីមុនកម្រិតលេងក្រុមរបស់យើងមានគម្លាតពីក្រុមម៉ាឡេស៊ី តែការខិតខំប្រឹងប្រែងអភិវឌ្ឍខ្លួនរបស់យើងមកដល់ពេលនេះបានធ្វើឲ្យយើងមានភាពរីកចម្រើនដែលប្រកៀកនឹងក្រុមម៉ាឡេស៊ីដែរហើយ អ៊ីចឹងការជួបគ្នាលើកនេះ យើងអាចនឹងលេងបានល្អ ហើយយើងនឹងប្រឹងប្រែងលេងឲ្យអស់ពីសមត្ថភាព»។
គួរបញ្ជាក់ថាក្រុម U22 កម្ពុជា និងក្រុម U22 ម៉ាឡេស៊ីនឹងត្រូវប្រកួតដណ្តើម ៣ ពិន្ទុគ្នានៅពហុកីឡដ្ឋានជាតិនៅល្ងាចម៉ោង ៦:៣០ ថ្ងៃចន្ទនេះ ចំណែកក្រុមឈរនៅពូល B ជាមួយគ្នាគឺមីយ៉ាន់ម៉ា និង U22 ឥណ្ឌូនេស៊ីក៏នឹងត្រូវប្រកួតប្រជែងដណ្តើមយក ៣ ពិន្ទុនៅរសៀលម៉ោង ៣:៣០ ថ្ងៃចន្ទនេះផងដែរ៕