.jpg)
Mario Balotelli ស្ថិតក្នុងការតាមដានសម្រាប់ការដាក់ឲ្យលេងក្នុងក្រុមជម្រើសជាតិអ៊ីតាលី។ AFP
អ៊ីតាលី: គ្រូបង្វឹកសញ្ជាតិអ៊ីតាលី លោក Roberto Mancini បាននិយាយ កាលពីថ្ងៃចន្ទថាលោកបានមើលរំលងទៅលើខ្សែប្រយុទ្ធ Mario Balotelli សម្រាប់វគ្គជម្រុះពានរង្វាន់ Euro 2020 នៅពេលខាងមុខនេះដោយសារកីឡាកររបស់ក្រុម Marseille រូបនេះមិនទាន់មានសមត្ថភាពនៅឡើយ។
ទោះបីជា Balotelli បានជួយរកគ្រាប់បាល់ ៥ គ្រាប់ឲ្យក្រុម Marseille ក្នុងការចាប់ផ្តើម ៧ ប្រកួតក៏ដោយ ក៏មិនបានធ្វើឲ្យលោក Mancini ភ្ញាក់ផ្អើលនោះដែរ ហើយលោកក៏មិនបានចាប់អារម្មណ៍ចំពោះខ្សែប្រយុទ្ធវ័យ ២៥ ឆ្នាំរូបនេះដែលរកបាន ១០ គ្រាប់ឲ្យក្រុម Torino ក្នុងការប្រកួតលីកកំពូលរបស់អ៊ីតាលី Serie A នោះដែរ។
លោក Mancini បាននិយាយថា៖ «Mario មិនទាន់ស្ថិតក្នុងលក្ខខណ្ឌល្អបំផុតក្នុងការលេងឲ្យក្រុមជម្រើសជាតិនេះនៅឡើយទេ។ កាយសម្បទាគាត់មានការរីកចម្រើនច្រើន បើធៀបនឹងខែកញ្ញាឆ្នាំមុន ប៉ុន្ដែគាត់នៅតែមានការខ្វះខាតច្រើន ព្រោះខ្ញុំត្រូវការលក្ខខណ្ឌច្រើន។ ឥឡូវនេះគាត់មានអាយុជិត ២៩ ឆ្នាំគឺជាពេលមួយដែលគាត់មានកម្លាំងខ្លាំង ហើយក្នុងនាមជាក្រុមជម្រើសជាតិ គាត់ត្រូវតែប្រឹងប្រែងឲ្យខ្លាំងមែនទែន»។
អតីតគ្រូបង្វឹកក្រុម Manchester City រូបនេះបានបន្ថែមថា៖ «គុណសម្បត្តិក្រុមជម្រើសជាតិគឺគ្រប់គ្នាអាចបង្ហាញពីគំនិតផ្ទាល់ខ្លួន ហើយខ្ញុំសម្រេចថា Belotti គឺដូចជាអ្នកដែលនៅផ្ទះអ៊ីចឹងនៅពេលនេះ។ គាត់អាចធ្វើបានល្អប្រសើរ ហើយត្រឡប់ទៅក្រុមជម្រើសជាតិវិញ។ គាត់ជាកីឡាករវ័យក្មេងគាត់កំពុងរីកចម្រើននៅក្របខ័ណ្ឌលីកហើយគាត់ពិតជាអាចវិលត្រឡប់មកវិញបាន»។
ចំណែកខ្សែប្រយុទ្ធជើងចាស់ Fabio Quagliarella ត្រូវបានកោះហៅឲ្យចូលក្រុមវិញនៅអាយុ ៣៦ ឆ្នាំនៅពេលគាត់បានដឹកនាំក្រុមស៊ុតបញ្ចូលទីក្នុងការប្រកួតក្របខ័ណ្ឌ Serie A ដោយប្រឹងស៊ុតបាន ២១ លើកក្នុង ២៨ ប្រកួត។ បន្ថែមលើនេះក្រុមអ៊ីតាលីក៏នឹងនាំយកខ្សែបម្រើ Nicolo Zaniolo កំពុងលេងនៅក្លិប Roma និងកីឡាករ Moise Kean របស់ក្រុម Juventus ផងដែរ ខណៈអ្នកទាំង ២ មានអាយុ ១៩ ឆ្នាំ។
លោក Mancini បានបន្តថា៖ «ខ្ញុំបានទូរស័ព្ទទៅកីឡាករពីរបីនាក់ដែរ ព្រោះខ្ញុំពិតជាមិនដឹងពីស្ថានភាពរបស់កីឡាករគ្រប់គ្នាទេ ហើយចង់ស្គាល់ពួកគេឲ្យបានច្បាស់ជាងមុន។ យើងមានកីឡាករវ័យក្មេងដែលកំពុងរីកចម្រើន ហើយយើងសូមអរគុណគ្រូបង្វឹកក្នុងក្រុមជម្រើសជាតិអាយុក្រោម ២១ ឆ្នាំគឺលោក Di Biagio ព្រោះយើងបានយកកីឡាករជាច្រើនរបស់គាត់សម្រាប់ការប្រកួតពានអឺរ៉ូ»។
«Zaniolo ពិតជាអាចបង្ហាញខ្លួនជាលើកដំបូងសម្រាប់យើង។ ចំណែក Moise Kean បានឈ្នះច្រើនប្រកួតសម្រាប់ជីវិតរបស់គាត់។ ចូរសង្ឃឹមថាគាត់ចាប់ផ្តើមដូច Balotelli ដែលធ្វើបានល្អណាស់»។
លោក Mancini បានបញ្ជាក់ថា៖ «ខ្ញុំជឿជាក់ចំពោះការប្រកួតរបស់យើង នឹងធ្វើឲ្យយើងឆ្ពោះទៅរកការលើកពាន European Championship ដូច្នេះយើងត្រូវតែធ្វើឲ្យបានល្អចំពោះរឿងនេះ ព្រោះយើងមានកីឡាករល្អៗជាច្រើន ហើយឥឡូវនេះក្រុមនេះគឺត្រូវខ្លាំង ខណៈ Jorginho លេងបានល្អច្រើន»។
គួររំឭកថាក្រុមជម្រើសជាតិអ៊ីតាលីធ្លាប់បានឈ្នះជើងឯកពានការប្រកួតអឺរ៉ូតែម្ដងគត់ក្នុងឆ្នាំ ១៩៦៨ ហើយក្រុមនេះបានលេខ ២ នៅឆ្នាំ ២០០០ និងឆ្នាំ ២០១២។ ពេលនេះក្រុមអ៊ីតាលីបានចាប់ផ្ដើមយុទ្ធនាការហ្វឹកហាត់របស់ខ្លួន នៅទីក្រុង Udine កាលពីថ្ងៃសៅរ៍ដើម្បីត្រៀមប្រជែងឡើងទៅដល់វគ្គផ្ដាច់ព្រ័ត្រនៃការប្រកួតបាល់ទាត់អឺរ៉ូដែលនឹងប្រកួតនៅលើទឹកដីប្រទេសហ្វាំងឡង់លើកនេះ បន្ទាប់ពីក្រុមមួយនេះមិនបានទៅលេងការប្រកួតបាល់ទាត់ World Cup 2018 ហើយនេះជាការបាត់បង់ឱកាសជាលើកដំបូងមិនធ្លាប់មានក្នុងរយៈពេល ៦០ ឆ្នាំរបស់អ៊ីតាលី៕ SN
