ភ្នំពេញៈ ម្ចាស់មេដាយមាសកីឡាស៊ីហ្គេម ឃុន ឌីម៉ា (ឃីម ឌីម៉ា) បានបង្កើតកំណត់ត្រាថ្មីមួយទៀត នៅលើទឹកដីប្រទេសបារាំង បន្ទាប់ពីរូបគេ បានឈ្នះខ្សែក្រវាត់ ក្នុងព្រឹត្តិការណ៍ដ៏ធំរបស់ប្រទេសនេះ គឺ Ruhu Fight II 2018 កាលពីយប់ថ្ងៃសៅរ៍ ឯជើងខ្លាំង ឡៅ ចន្ទ្រា និង ម៉ឺន សុភា ក៏បានយកឈ្នះក្នុងការប្រកួតនោះដែរ។ ចំណែកជើងខ្លាំង រឿង សោភ័ណ្ឌ នឹងនាំយកខ្សែក្រវាត់២ និងពាន១ មកដល់កម្ពុជា យប់ថ្ងៃអាទិត្យនេះ។
សម្រាប់ការប្រកួតអន្តរជាតិ Rahu Fight II 2018 ដែលត្រូវបានធ្វើឡើង នៅទីក្រុង Bussy St. Georges ប្រទេសបារាំង កាលពីយប់ថ្ងៃសៅរ៍នោះ ឃីម ឌីម៉ា បានយកឈ្នះកីឡាករម្ចាស់ផ្ទះ Vieira Brandon ដោយពិន្ទុ ទាំងលំបាកបំផុត។ ឃីម ឌីម៉ា បានធាក់ ទាត់ និងវាយកែងចូលបានល្អ ដើម្បីយកប្រៀបលើកីឡាករ Vieira Brandon នៅទឹកទី ១ និងទឹកទី ២ ប៉ុន្តែភាពរឹងមាំរបស់បារាំងម្នាក់នេះ ដែលវាយចូលច្រើន តែមិនទាន់ជ្រាយ ហើយថែមទាំងចូលវាយសម្រុកកាន់តែខ្លាំងនោះ បានធ្វើឲ្យ ឃីម ឌីម៉ា មានការធ្លាក់កម្លាំងចុះគួរឲ្យកត់សម្គាល់ ហើយក៏ហាក់ចាញ់បៀប Vieira Brandon វិញនៅទឹកទី ៤ ផងដែរ។
ទោះបីជាយ៉ាងណា នៅទឹកទី ៥ ឃីម ឌីម៉ា បានជម្នះការវាយកែង ចំពោះការចូលវាយលុករបស់ Vieira Brandon បានយ៉ាងល្អ ហើយការព្យាយាមទាំងត្រដាបត្រដួសនេះ បានធ្វើឲ្យចៅក្រមផ្តល់ជ័យជម្នះទៅ ឃីម ឌីម៉ា ដើម្បីឈ្នះបានខ្សែក្រវាត់ ជាលើកដំបូង នៅលើទឹកដីប្រទេសបារាំង ប៉ុន្តែ Vieira Brandon ហាក់មិនសូវពេញចិត្ត ចំពោះការសម្រេចឲ្យរូបគេ ចាញ់ពិន្ទុ ឃីម ឌីម៉ា នោះទេ។
សម្រាប់ការប្រកួតនៅយប់ថ្ងៃសៅរ៍នោះដែរ ជើងខ្លាំង ឡៅ ចន្ទ្រា បានយកឈ្នះកីឡាករបារាំង Kassem Yanis ក្នុងការប្រកួតមិត្តភាពអន្តរជាតិ ដែលមានត្រឹម ៣ ទឹក។ ចន្ទ្រា បានឈ្នះ Kassem Yanis ដោយពិន្ទុដាច់តែម្តង ហើយការបុកកែង និងជង្គង់ រួចបន្ថែមដោយជង្គង់ហោះ នៅទឹកទី ៣ ចុងក្រោយរបស់គេ ក៏សឹងតែធ្វើឲ្យបារាំងម្នាក់នេះសន្លប់ឈរផងដែរ។
ចំណែកអ្នកលេងកណ្តាប់ដៃធ្ងន់ ម៉ឺន សុភា បានយកឈ្នះកីឡាករបារាំង Babovin Guillaume ដោយពិន្ទុទាំងលំបាក ព្រោះបារាំងម្នាក់នេះ មានភាពរឹងមាំ និងមានក្បាច់ជង្គង់ល្អ ហើយបានវាយសម្រុកម៉ឺន សុភា រហូត។ រីឯ ផាន់ គ្រាន់ បានត្រឹមស្មើពិន្ទុជាមួយកីឡាករបារាំង Monteiro Jeremy ក្រោយការប្រកួតយ៉ាងតានតឹងចំនួន ៣ ទឹក បានបញ្ចប់។
ដោយឡែក កីឡាករជើងខ្លាំងរបស់កម្ពុជា រឿង សោភ័ណ្ឌ នឹងនាំយកខ្សែក្រវាត់ ២ និងពាន ១ ដែលរូបគេដណ្តើមបាន ពីការប្រកួតនៅប្រទេសបារាំង មកដល់កម្ពុជាវិញ នៅព្រលានយន្តហោះអន្តរជាតិភ្នំពេញ នាយប់ម៉ោង ១០ ថ្ងៃអាទិត្យនេះ បន្ទាប់ពីរូបគេ បានចេញទៅប្រកួតនៅបារាំង តាំងពីថ្ងៃទី ៥ ខែមេសា ឆ្នាំ ២០១៨។
តាមលោក មៀម ស៊ីសារ៉ា ប្រធានសហព័ន្ធកីឡាប្រដាល់ប្រចាំប្រទេសបារាំង បានសរសេរបង្ហោះនៅលើហ្វេសប៊ុករបស់ខ្លួន បានឲ្យដឹងថា ជើងខ្លាំង រឿង សោភ័ណ្ឌ បានបញ្ចប់បេសកកម្មនៅប្រទេសបារាំង ជាផ្លូវការហើយ ដោយក្នុងនោះគេប្រកួតបាន ៣ លើក ឈ្នះទាំង ៣ គឺឈ្នះបានខ្សែក្រវាត់ ២ និងពាន ១៕