.jpg)
ឃីម ឌីម៉ា នឹងទទួលបាននូវមហាកិត្តិយស ដើម្បីតបស្នងការដណ្តើមបានមេដាយមាស នៅស៊ីហ្គេម។ ស្រេង ម៉េងស្រ៊ុន
ភ្នំពេញៈ កីឡាករគុនខ្មែរ ឃីម ឌីម៉ា ដែលជាម្ចាស់មេដាយមាសនៅស៊ីហ្គេម ឆ្នាំ ២០១៧ ត្រូវបានស្ថាប័នកីឡាកំពូលរបស់កម្ពុជា ផ្តល់មហាកិត្តិយសដ៏ធំមួយ តាមរយៈការជ្រើសរើសយករូបគេឲ្យទទួលភ្លើងគប់ពីព្រះករុណា ព្រះបាទសម្តេច ព្រះបរមនាថ នរោត្តម សីហមុនី នៅក្នុងពិធីបើកកីឡាជាតិ លើកទី ២ នៅថ្ងៃទី ២៥ ខែឧសភា ខាងមុខ ហើយអត្តពលិកមានស្នាដៃ និងល្បីៗមួយចំនួនទៀត នឹងទទួលភ្លើងគប់បន្តពី ឌីម៉ា ដើម្បីមកប្រគល់ជូនដល់លោកនាយករដ្ឋមន្ត្រី។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានថ្លែងប្រាប់ប្រព័ន្ធផ្សព្វផ្សាយ ក្នុងការសាកល្បងពិធីបើកកីឡាជាតិ លើកទី ២ នៅពហុកីឡដ្ឋានជាតិ កាលពីថ្ងៃសៅរ៍ថា ការជ្រើសរើសយក ឃីម ឌីម៉ា ឲ្យទទួលភ្លើងគប់ពីព្រះមហាក្សត្រនេះ ត្រូវបានធ្វើឡើងទៅតាមអនុសាសន៍ណែនាំរបស់លោករដ្ឋមន្ត្រី ថោង ខុន ប្រធាន NOCC ដែលលោកចង់បានអត្តពលិក ដែលមានគុណសម្បត្តិ និងស្ថិតក្នុងប្រភេទកីឡា ជាអត្តសញ្ញាណជាតិ វប្បធម៌ជាតិ និងជាព្រលឹងជាតិរបស់យើង។
លោកបានថ្លែងថា៖ «តាមអនុសាសន៍ដ៏ខ្ពង់ខ្ពស់របស់ឯកឧត្តមប្រធាន ថោង ខុន យើងបានសម្រេចយកកីឡាគុនខ្មែរ ដែលទើបដណ្តើមបានមេដាយ ពីការប្រកួតស៊ីហ្គេម កាលពីឆ្នាំមុន ហើយជាប្រវត្តិសាស្ត្រដែលគុនខ្មែរ បានមេដាយក្នុងស៊ីហ្គេម អ៊ីចឹង ឃីម ឌីម៉ា ដែលបាន មេដាយមាស លើកដំបូង និងជាកីឡាករគុនខ្មែរនោះ គឺគាត់ស័ក្តិសម នឹងទទួលនូវព្រះរាជទានភ្លើងគប់ពីព្រះមហាក្សត្រ នៅព្រះបរមរាជវាំង»។
ទាក់ទងនឹងប្រវត្តិភ្លើងគប់នេះ លោក ចំរើន បានរៀបរាប់ថា ការរៀបចំឲ្យមានពិធីរបស់ព្រះមហាក្សត្រ ដើម្បីព្រះរាជទានភ្លើងនេះ គេហៅថា «ភ្លើងអាទិទេព» ដែលមានប្រវត្តិនៅអូឡាំពិកបុរាណ តាំងពី ៤០០០ ឆ្នាំ មុនគ្រិស្តសករាជ គឺគេតែងតែសុំភ្លើងពីអាទិទេព ព្រោះស្តេចក្រិក ជឿលើអាទិទេពហើយកាលជំនាន់នោះ ដើម្បីបានភ្លើងពីព្រះអាទិត្យ គេយកស្លឹកអូលីវងាប់ៗ ដាក់ធ្វើចំណាំងប្លាតជាមួយព្រះអាទិត្យឲ្យវាឆេះ នឹងយកភ្លើងពីស្លឹកហ្នឹងមក ដោយគេហៅថា ភ្លើងអាទិទេព។
លោកបន្ថែមថា៖ «ភ្លើងអាទិទេពនេះ ជាភ្លើងសម្រាប់ដុតបំភ្លឺដល់ការប្រកួតកីឡា ដែលធ្វើឲ្យមានចិត្តក្លាហាន និងមានកម្លាំងខ្លាំងចេញពីធម្មជាតិមក ព្រោះគេជឿថា ភ្លើងអាទិទេព ធ្វើឲ្យជីវិតមានភាពរស់រវើក ខ្លាំង និងពូកែ អ៊ីចឹងហើយទើបមានប្រវត្តិ ត្រូវសុំយាងព្រះមហាក្សត្រ ដែលយើងចាត់ទុកព្រះអង្គ ជាអង្គព្រះអាទិទេព នៅលើផែនដីរបស់យើងនេះ ដើម្បីព្រះរាជទានភ្លើង នេះ ហើយនេះជាអត្ថន័យ និងជាការផ្តល់នូវមហាកិត្តិយស សម្រាប់ពិធីបើកកីឡាជាតិ នៅឆ្នាំនេះ»។
ជាមួយគ្នានោះ លោក តូ រិទ្ធីយ៉ា ម្ចាស់មេដាយមាសពិភពលោក កែ ឡេង កីឡាករ ចាន់ វឌ្ឍនាកា ប្រាក់ មុន្នីឧត្តម ម្ចាស់មេដាយមាសកីឡាអាស៊ី ស៊ន សៀវម៉ី និងអត្តពលិកមានស្មាដៃ ក៏ត្រូវបានជ្រើសរើសយកមករត់ភ្លើងគប់ បន្តពី ឃីម ឌីម៉ា ដើម្បីយកមកប្រគល់ជូនលោកនាយករដ្ឋមន្ត្រី ហ៊ុន សែន ដែលរង់ចាំនៅលើវេទិកានៃគណៈអធិបតី ក្នុងពហុកីឡដ្ឋានជាតិ នាថ្ងៃបើកកីឡាជាតិ លើកទី ២ នេះផងដែរ។
លោក វ៉ាត់ ចំរើន បានបង្ហើប ត្រួសៗថា៖ «ការរត់ភ្លើងគប់នេះ យើងមានអត្តពលិកល្បីៗរបស់យើង គឺបន្ទាប់ពី ឃីម ឌីម៉ា មក មានក្រុមកីឡាអត្តពកម្ម រួមទាំងកីឡាករ ចាន់ វឌ្ឍនាកា, ប្រាក់ មន្នីឧត្តម ហើយពេលចូលមកដល់ស្តាត យើងមានលោក តូ រិទ្ធីយ៉ា ជាអ្នកល្បីល្បាញផ្នែករត់ម៉ារ៉ាតុង នាទស្សវត្សរ៍ ៨០ និង ៩០ រួមជាមួយកីឡាការិនីមេដាយមាសពិភពលោក កែ ឡេង, អ៊ុក ស្រីមុំ និងមានខាងវ៉ូវីណាម ដែរ ហើយចុងក្រោយកញ្ញា ស៊ន សៀវម៉ី ដែលតំណាងឲ្យស្មារតីកីឡាអូឡាំពិក នឹងនាំយកភ្លើងគប់នេះទៅប្រគល់ជូនសម្តេចតេជោ ដើម្បីឲ្យសម្តេចលើកភ្លើងនេះ អុជខ្សែកាំជ្រួច បាញ់ចេញពីវេទិកាគណៈអធិបតី ទៅឆេះនៅថាសភ្លើងគប់តែម្តង»៕
