ភ្នំពេញៈ កីឡាករកម្ពុជា ចាន់ សំអាត បានយំដូចកូនក្មេង និងបានចោទចៅក្រមថាជាចោរលួចប្រាក់រង្វាន់របស់ខ្លួន បន្ទាប់ពីរូបគេត្រូវបានប្រកាសឲ្យចាញ់ថៃ Phat Ngarm ក្នុងការប្រកួតវគ្គពាក់កណ្តាលផ្តាច់ព្រ័ត្រ ដណ្តើមខ្សែក្រវាត់ខារ៉ាបាវទម្ងន់ ៦០ គីឡូក្រាមនៅលើសង្វៀន SEATV កាលពីល្ងាចថ្ងៃសៅរ៍ ចំណែកជើងខ្លាំង សុខ សាវិន បានទាត់ថៃ Den Sayam ឲ្យសន្លប់ត្រឹមទឹកទី ១ ដើម្បីឡើងទៅវគ្គផ្តាច់ព្រ័ត្រ។
ក្រោយប្រកាសលទ្ធផលជាផ្លូវការរបស់គណៈកម្មការតាមរយៈពិធីករ ហេរ៉ូ នោះកីឡាករ ចាន់ សំអាត មិនបានបង្ហាញកាយវិការមិនសមរម្យណាមួយតាមរយៈការផ្សាយផ្ទាល់នោះទេ ប៉ុន្តែពេលចុះពីលើសង្វៀនភ្លាម កីឡាកររូបនេះបានយំសឹងតែបោកខ្លួនព្រមទាំងបានហៅពួកចៅក្រមដែលផ្តល់ពិន្ទុឲ្យរូបគេចាញ់ថា «ជាចោរលួចលុយប្រាក់រង្វាន់»។
ចាន់ សំអាត របស់ក្លិបអន្លង់វែងខេត្តឧត្តរមានជ័យដែលគេដាក់រហស្សនាមថា «អ្នកលេងមកពីភ្នំដងរែក» នោះគឺមានដើរហែរហមដោយអ្នកគាំទ្ររួមមាន លោក ហ៊ុន ចាន់រាជ និងកីឡាករ MMA មួយចំនួន ព្រមទាំងអ្នកគ្រូ សុខុម ប្រពន្ធលោក ម៉ា សេរី ជាអ្នកគ្រប់គ្រងផង ហើយអ្នកទាំងនោះសុទ្ធតែបានអះអាងថាការផ្តល់ពិន្ទុនេះជាគម្រោងរៀបចំឲ្យចាញ់តែម្តងព្រោះពិន្ទុនៃការប្រកួតត្រូវបានគេមើលឃើញថា ចាន់ សំអាត មានប្រៀបជាងកីឡាករថៃ។
ចំណែក ចាន់ សំអាត ដែលបានយំរយៈពេលយូរ និងមិនទទួលស្គាល់ការដាក់ពិន្ទុបែបនេះបានបញ្ជាក់ប្រាប់ភ្នំពេញ-ប៉ុស្តិ៍ ថា៖ «ថៃវ៉ៃជង្គង់មិនចូលខ្ញុំទេ គឺខ្ញុំការពារបានទាំងអស់ ហើយខ្ញុំទាត់វាដួលច្រើនសឹងតែខូចជើង ប៉ុន្តែទីបញ្ចប់ វាឈ្នះគឺមិនយុត្តិធម៌សោះ»។
នៅពេលសួរថា តើនឹងមានការប្តឹងតវ៉ាពីលទ្ធផលឬយ៉ាងណា? ចាន់ សំអាត បានប្រាប់ថា៖«ខ្ញុំមិនប្តឹងតវ៉ាទេ ប៉ុន្តែខ្ញុំមិនចង់មកប្រកួតទៀតឡើយ»។ យ៉ាងណាក៏ដោយអ្នកស្រី សុខុម និងអ្នកគាំទ្របានទៅជួប លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរនិយាយពីបញ្ហានេះ ប៉ុន្តែមិនទាន់ដឹងពីលទ្ធផលយ៉ាងណានោះទេ។
ចំពោះស្ថានភាពប្រកួតជាក់ស្តែងវិញត្រូវបានគេមើលឃើញថា ចាន់ សំអាត មានប្រៀបលើកីឡាករថៃ Phat Ngarm នៅក្នុងទឹកទី ១ និងទឹកទី ២ ព្រោះ សំអាត បានទាត់កីឡាករថៃរូបនេះឲ្យដួលច្រើនលើកច្រើនសា ខណៈទឹក ៣ និងទឹកទី ៥ ជាឱកាសរបស់ Phat Ngarm ក្នុងការប្រើជង្គង់យកប្រៀប ឯទឹកទី ៤ មានលក្ខណៈប្រហាក់ប្រហែលគ្នា។ ចំណែកអ្នកទស្សនាភាគច្រើនបានហៅការកាត់ក្តីនេះថា គ្មានជាតិនិយម និងលើកស្ទួយខ្មែរដូចគ្នា ព្រោះនៅថៃឲ្យតែលទ្ធផលប្រហែលគ្នា គេលើកស្ទួយជាតិសាសន៍របស់គេឲ្យឈ្នះហើយ។
ជុំវិញបញ្ហានេះលោក រាជ សុផែន ស្នងការប្រកួតប្រចាំសង្វៀន SEATV បានបកស្រាយថា៖ «លទ្ធផលគូប្រកួតដណ្តើមខ្សែក្រវាត់ជាសិទ្ធិសម្រេចរបស់ចៅក្រមទាំង ៥ គឺប្រធានវិនិច្ឆ័យ និងស្នងការប្រកួត មិនអាចកែប្រែលទ្ធផលនោះបានទេ ប៉ុន្តែបើមានការប្តឹងតវ៉ាណាមួយ ហើយបានរកឃើញថាមិនប្រក្រតីគឺចៅក្រមផ្ទាល់ជាអ្នកទទួលទណ្ឌកម្ម ឬវិន័យខ្លួនឯង។ ហេតុនេះខ្ញុំមិនមានអត្ថាធិប្បាយអ្វីទេ ព្រោះបទបញ្ជាប្រកួតចែងមកយ៉ាងនេះ ហើយគ្រប់ភាគីសុទ្ធតែបានពិនិត្យមើលនូវលក្ខខណ្ឌនោះ និងទទួលខុសត្រូវរៀងៗខ្លួន»។
ដោយឡែក សុខ សាវិន បានចំណាយពេលតែ ១ ទឹកក្នុងការផ្តួលថៃ Den Sayam ឲ្យសន្លប់ ហើយយោងតាមលទ្ធផលនេះ សាវិន ត្រូវឡើងទៅជួប Phat Ngarm នៅវគ្គផ្តាច់ព្រ័ត្រ ដើម្បីដណ្តើមយកខ្សែក្រវាត់នឹងប្រាក់រង្វាន់ ៤០០០ ដុល្លារសម្រាប់អ្នកឈ្នះ និង ២០០០ ដុល្លារសម្រាប់អ្នកចាញ់៕