.jpg)
ឡុង ជិន ហាក់បារម្ភនឹងភាពខ្លាំងរបស់ ឡៅ ចិត្ត្រា មុនជួបគ្នា នៅថ្ងៃអាទិត្យ។ ភ្នំពេញ ប៉ុសិ៍្ត
ភ្នំពេញ៖ អតីតកីឡាករជើងខ្លាំង ឡៅ ស៊ីណាត ដែលជាបងប្រុសបង្កើតរបស់ជើងខ្លាំងវ័យក្មេង ឡៅ ចិត្រ្តា បានអះអាងថា ចិត្ត្រា បានត្រៀមលក្ខណសម្បត្តិរួចរាល់អស់ហើយ ក្នុងការយកឈ្នះលើអ្នកប្រដាល់ ឡុង ជិន សម្រាប់ប្រកួតវគ្គពាក់កណ្តាលផ្តាច់ព្រ័ត្រ នៅលើសង្វៀនរបស់ PNN នារសៀលថ្ងៃអាទិត្យ ដើម្បីទទួលបានឱកាសឡើងទៅប្រកួតយកខ្សែក្រវាត់មាស អមជាមួយប្រាក់រង្វាន់ ១ ម៉ឺនដុល្លារ នៅវគ្គផ្តាច់ព្រ័ត្រ។
អតីតជើងខ្លាំង ដែលបានវិវឌ្ឍខ្លួនទៅធ្វើជាគ្រូបង្វឹក ឡៅ ស៊ីណាត បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «ឡៅ ចិត្ត្រា បានត្រៀមពេញល្អណាស់ ហើយជ័យជម្នះ នៅក្នុងការប្រកួតនេះ នឹងធ្លាក់មកលើយើង គឺខ្ញុំមានសង្ឃឹមលើប្អូនរបស់ខ្ញុំរហូតដល់ ៨០ ភាគរយ»។
ឡៅ ស៊ីណាត ដែលជាអ្នកបង្ហាត់ ឡៅ ចិត្ត្រា ដោយផ្ទាល់ដៃនោះបានបញ្ជាក់ថា៖ «អ្នកទាំងនេះ មានសមត្ថភាពប្រកួតប្រកួតប្រហាក់ប្រហែលគ្នាដែរទេ ប៉ុន្តែការខិតខំហ្វឹកហាត់ខ្លាំងរបស់ ឡៅ ចិត្ត្រា នឹងធ្វើឲ្យការវាយចេញរបស់គេ កាន់តែមានប្រសិទ្ធភាពខ្ពស់ថែមទៀត ហើយការប្រឹងប្រែងនេះ ព្រោះយើងចង់ឆ្ពោះទៅរកការដណ្តើមយកខ្សែក្រវាត់មាស»។
នៅមុនការឡើងមកជួប ឡុង ជិន នៅវគ្គពាក់កណ្តាលផ្តាច់ព្រ័ត្រដណ្តើមខ្សែក្រវាត់មាសនេះ ឡៅ ចិត្ត្រា បានផ្តួលកីឡាករថៃឲ្យសន្លប់យ៉ាងផុយស្រួយ បំផុត ដើម្បីឈ្នះបានខ្សែក្រវាត់ប្រាក់ ដោយក្នុងនោះរូបគេ បានផ្តួល Jaroenlaph ឲ្យសន្លប់ក្នុងទឹកទី ១ ក្នុងវគ្គជម្រុះ និងបន្តវ៉ៃថៃ Kongsiam ឲ្យសន្លប់ទឹកទី២ ក្នុងវគ្គផ្តាច់ព្រ័ត្រ។
ភាពខ្លាំងរបស់ ឡៅ ចិត្ត្រា បានធ្វើឲ្យកីឡាករ ឡុង ជិន កំពុងបង្ហាញភាពមិនប្រាកដ សម្រាប់ការប្រឈមមុខដាក់គ្នាលើកនេះ។ សិស្សគណក្លិបខ្លារខិនមានរិទ្ធរូបនេះ បានប្រាប់កាលពីម្សិលមិញថា៖ «កាលពី ២ ឆ្នាំមុន ខ្ញុំធ្លាប់បានចាញ់ពិន្ទុ ឡៅ ចិត្ត្រា ម្តងហើយ ហើយមកដល់ពេលនេះ ចិត្ត្រា កាន់តែល្អជាងមុនទៅទៀត ហេតុនេះការជួបគ្នាលើកនេះ នឹងមានការលំបាកច្រើន»។
ឡុង ជិន ក៏បានឈ្នះខ្សែក្រវាត់ប្រាក់ ១ ផងដែរ បន្ទាប់ពីរូបគេបានយកឈ្នះកីឡាករថៃក្នុងវគ្គជម្រុះ និងបានឈ្នះជនរួមជាតិ តាញ់ មករា នៅវគ្គផ្តាច់ព្រ័ត្រ។ តែទោះបីជាយ៉ាងណា ឡុង ជិន បានចាត់ទុកការចាប់ឆ្នោតជួប ឡៅ ចិត្ត្រា ក្នុងវគ្គនេះ ថាជារឿងស៊យមួយ ចំពោះរូបគេ។
ឡុង ជិន បង្ហើបថា បើសិនជារូបគេចាប់ឆ្នោតប៉ះ កីឡាករ លន បញ្ញា ឬ សុខ សាវិន នោះ គេនឹងមានសង្ឃឹមច្រើន បានឡើងទៅវគ្គផ្តាច់ព្រ័ត្រ ព្រោះអ្នកទាំង ២ នេះ សុទ្ធតែធ្លាប់បានចាញ់ ឡុង ជិន កន្លងមក។
ឡុង ជិន បានបន្ថែមថា៖ «ខ្ញុំហ្វឹកហាត់ត្រៀមបាន ១០០ ភាគរយ ប៉ុន្តែលទ្ធផលទៅជាបែបណានោះ ខ្ញុំមិនទាន់ហ៊ានថាទុកមុនទេ ព្រោះ ចិត្ត្រា ល្អមួយចប់ទៅហើយ។ ខ្ញុំសង្ឃឹមត្រឹម ៥០ ភាគរយទេ ប៉ុន្តែខ្ញុំនឹងខិតខំប្រឹងប្រែងប្រកួតឲ្យអស់ពីសមត្ថភាព ព្រោះខ្ញុំក៏ចង់ឈ្នះ ដើម្បីបានទៅដណ្តើមខ្សែក្រវាត់មាសដែរ»។
ដោយឡែកកីឡាករកម្ពុជា ចាន់ សំអាត និង ហ៊ីម សេរី ក៏ត្រូវបានដាក់ឲ្យប្រកួតមិត្តភាពអន្តរជាតិជាមួយថៃ នៅថ្ងៃអាទិត្យនោះផងដែរ ដោយក្នុងនោះ សំអាត ត្រូវប៉ះកីឡាករទម្ងន់ ៦០ គីឡូក្រាម Bovy Lookmuangpetc ហើយ ហ៊ីម សេរី ត្រូវប្រកួតនៅក្នុងទម្ងន់ ៥១ គីឡូក្រាមជាមួយថៃ Nokkrachib Sitphoet៕
