ក្រុងសារាំងគ៍: ជប៉ុន បានក្លាយជាក្រុមអាស៊ីដំបូងគេ ក្នុងការយកឈ្នះលើក្រុមមួយរបស់អាមេរិកខាងត្បូង ក្នុងយុទ្ធនាការ World Cup កាលពីថ្ងៃអង្គារ តាមរយៈការផ្តួលក្រុមជម្រើសជាតិកូឡុំប៊ី ដែលនៅសល់សមាជិកត្រឹមតែ១០នាក់ ក្នុងលទ្ធផល ២-១ ដើម្បីបំពេញការសងសឹកដ៏ផ្អែមល្ហែម សម្រាប់ការរងបរាជ័យដ៏ឈឺចាប់នៅប្រេស៊ីល កាលពីឆ្នាំ២០១៤។
គ្រាប់បាល់ឈ្នះនៅនាទី ទី៧៣របស់ខ្សែប្រយុទ្ធ Yuya Osako បានផ្តល់នូវការធូរស្រាលដ៏ធំមួយសម្រាប់ជប៉ុន ដែលបានរងបរាជ័យក្នុងលទ្ធផល ៤-១ ក្រោមស្នាដៃក្រុមជម្រើសជាតិកូឡុំប៊ី កាលពី៤ឆ្នាំមុន អំឡុងពេលយុទ្ធនាការដ៏ត្រដាបត្រដួសមួយ ដោយក្នុងពេលនោះ ពួកគេមិនបានកត់ត្រាជ័យជម្នះសូម្បីតែ១លើក។
ភាពស្វិតស្វាញនៃការប្រកួតក្នុងទីក្រុង Saransk ត្រូវបានប្ដូរយ៉ាងឆាប់រហ័ស នៅពេលដែលខ្សែការពារកូឡុំប៊ី Carlos Sanchez បានទទួលការពិន័យកាតក្រហមជាលើកទី១ក្នុង World Cup នៅរុស្ស៊ី ឆ្នាំ២០១៨ សម្រាប់ការយកដៃវាយបាល់នៅរយៈពេល៣នាទីដំបូងនៃការប្រកួតនេះ។
ខ្សែប្រយុទ្ធ Shinji Kagawa បានស៊ុតបាល់ប៉េណាល់ទីចូលទីយ៉ាងល្អ ហើយបើទោះបីខ្សែបម្រើ Juan Quintero បានរកគ្រាប់បាល់តាមស្មើវិញនៅចុងតង់ទី១ក៏ដោយ ប៉ុន្តែ ក្រុមជម្រើសជាតិជប៉ុន បានបង្ហាញពីទម្រង់លេងយ៉ាងល្អ ខណៈដែល Osako បានតែតបាល់បញ្ចូលទីយ៉ាងល្អ ពីការស៊ុតបាល់ចេញពីជ្រុងម្ខាង ដើម្បីកត់ត្រាជ័យជម្នះតែម្តង។
Osako បានឲ្យដឹងថា៖ «ការរកបានគ្រាប់បាល់បញ្ចូលទី១គ្រាប់ក្នុង World Cup បានក្លាយជាសុបិនមួយសម្រាប់ខ្ញុំ ចាប់តាំងពីខ្ញុំនៅតូចម្លេ៉ះ ហេតុនេះ ខ្ញុំពិតជារីករាយណាស់»។
ជាមួយគ្នា ក្រុមជម្រើសជាតិសេណេហ្គាល់ បានផ្តួលក្រុមជម្រើសជាតិប៉ូឡូញ ក្នុងលទ្ធផល ២-១ ក្នុងការប្រកួតពូល H ដូចគ្នានេះ៕ IS