ភ្នំពេញ៖ ការប្រកួតកីឡាទ្រីយ៉ាត្លុងជ្រើសរើសជើងឯកជាតិ ប្រចាំឆ្នាំ ២០២០ ដែលមិនអាចរៀបចំបានដោយសារវិបត្តិជំងឺកូវីដ ១៩ នោះ ត្រូវបានសហព័ន្ធកីឡាទ្រីយ៉ាត្លុងកម្ពុជា លើកយកមកធ្វើឡើងវិញនាថ្ងៃទី ២០ ដល់ថ្ងៃទី ២២ ខែ មករា ឆ្នាំ ២០២១ នៅមាត់សមុទ្រ ក្នុងខេត្តកែប ដើម្បីសម្រិតសម្រាំងជ្រើសរើសយកអត្តពលិក ដែលមានសមត្ថភាព និងទេពកោសល្យល្អៗចំនួន ១៤ នាក់ ត្រៀមទៅចូលរួមប្រកួតស៊ីហ្គេមលើកទី៣១ ឆ្នាំ ២០២១ នេះ នៅប្រទេសវៀតណាម។
ជាមួយនឹងគោលដៅសម្រិតសម្រាំងបានអត្តពលិកមានសមត្ថភាពដ៏ពិតប្រាកដនេះ សហព័ន្ធកីឡាទ្រីយ៉ាត្លុងកម្ពុជាបានសម្រេចកាត់បន្ថយចំនួនអ្នកចូលរួមនៅក្រោយ ៧០ នាក់ ហើយអ្នកដែលមិនបានហ្វឹកហាត់ត្រឹមត្រូវមិនត្រូវបានអនុញ្ញាតឱ្យចូលរួមប្រកួតនោះទេ ព្រោះសហព័ន្ធខ្លាចមានគ្រោះថ្នាក់ជាយថាហេតុ។
លោក ងិន សុខបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជាបានប្រាប់ថា៖ «ការរៀបចំការប្រកួតនេះ ធ្វើក្រោមគម្រោងថវិកាគាំទ្ររបស់ក្រសួងអប់រំ យុវជន និងកីឡា ប៉ុន្តែយើងមានវិស័យឯកជនជួយឧបត្ថម្ភខ្លះ ដើម្បីពន្លឿនការអភិវឌ្ឍកីឡាទ្រីយ៉ាត្លុង ឆ្ពោះទៅសម្រេចគោលដៅបានលទ្ធផលល្អនៅស៊ីហ្គេមខាងមុខ ពិសេសក្នុងឱកាសកម្ពុជាទទួលរៀបចំធ្វើជាម្ចាស់ផ្ទះស៊ីហ្គេមលើកទី ៣២ ឆ្នាំ ២០២៣»។
លោកបានបន្ថែមថា៖ «ឆ្នាំនេះ យើងសម្រិតសម្រាំងយកអ្នកចូលរួមតិច ដើម្បីពង្រឹងគុណភាពការប្រកួត គឺមានក្លិបចូលរួមចំនួន ៩ ក្លិប និងមានអត្តពលិកជាង ៥០ នាក់ (ស្រី ១៨ នាក់) ហើយយើងប្រកួតប្រជែងយកអ្នកឆ្នើមចំនួន ១៤ នាក់ ដោយពុំគិតពីក្រុមធំជម្រើសជាតិ ឬក្រុមថ្នាល ដូចឆ្នាំមុនៗទៀតនោះទេ ដើម្បីយកមកបង្វឹកជាប្រចាំ និងដាក់ឱ្យពួកគេប្រកួតជើងឯកជាតិ ប្រចាំឆ្នាំ ២០២១ មុនខែតុលា ម្តងទៀត រួចទើបចេញទៅប្រកួតស៊ីហ្គេម លើកទី៣១ នៅវៀតណាម នៅខែវិច្ឆិកា ឆ្នាំ ២០២១ នេះ»។
សម្រាប់ការប្រកួតកីឡាទ្រីយ៉ាត្លុងជ្រើសរើសជើងឯកថ្នាក់ជាតិ ឆ្នាំ ២០២០ នេះ គឺមានការប្រកួតប្រជែងលើ ៣ វិញ្ញាសា ទី១ វិញ្ញាសាទ្រីយ៉ាត្លុង (TRIATHLON) ទាំងផ្នែកបុរស និងនារី មិនកំណត់អាយុ ដោយហែលទឹកចម្ងាយ ៧៥០ ម៉ែត្រ រួចជិះកង់ចម្ងាយ ២០ គីឡូម៉ែត្រ និងរត់ប្រណាំង ៥ គីឡូម៉ែត្រ ទី២ វិញ្ញាសាឌូអាត្លុង (DUATHLON) ទាំងផ្នែកបុរស និងនារី មិនកំណត់អាយុ ដោយរត់ប្រណាំង ៥ គីឡូម៉ែត្រ រួចជិះកង់ចម្ងាយ ២០ គីឡូម៉ែត្រ និងរត់ប្រណាំង ២,៥ គីឡូម៉ែត្រ ចំណែកទី៣ វិញ្ញាសាអាគ័តត្លុង (AQUATHLON) ទាំងផ្នែកបុរស-នារី កំណត់អាយុក្រោម ១៦ ឆ្នាំ ដោយហែលទឹក ៣៥០ ម៉ែត្រ និងរត់ប្រណាំង ២,៥ គីឡូម៉ែត្រ។
លោក ងិន សុខបញ្ញា បានប្រាប់បន្ថែមថា ក្រុមអត្តពលិក និងក្រុមការងារ ដែលចូលរួមការប្រកួតថ្នាក់ជាតិនេះ ត្រូវបានផ្តល់ជូនការស្នាក់នៅ ហូបចុក និងការធ្វើដំណើរ ដោយយើងមានការសហការល្អ ពីសាលាខេត្តកែប ព្រមទាំងវិស័យឯកជនចូលរួមឧបត្ថម្ភ និងផ្តល់រង្វាន់ជាសម្ភារបន្ថែម ដូចជាក្រុមហ៊ុន Giant, Ford និង Online ជាដើម ខណៈដែលប្រាក់រង្វាន់ចំណាត់ថ្នាក់លេខ ១ ទទួលបាន ៤០ ម៉ឺនរៀល លេខ ២ បាន ៣០ ម៉ឺនរៀល និងលេខ ៣ បាន ២០ ម៉ឺនរៀល៕