ភ្នំពេញ៖ គ្រូបង្វឹកក្រុមណាហ្គាវើល លោក មាស ចាន់ណា បានអះអាងថា ការផ្ទះឡើងម្តងហើយម្តងទៀតនៃវិបត្តិជំងឺកូវីដ ១៩ នៅកម្ពុជា បានក្លាយជាបញ្ហាប្រឈមយ៉ាងធំមួយ ទៅដល់ក្រុមរបស់លោកក្នុងការពង្រឹងសមត្ថភាពត្រៀមការប្រកួតរដូវកាលថ្មី ជាពិសេសការប្រកួតលីគកំពូលកម្ពុជា ឆ្នាំ ២០២១ ដែលនឹងចាប់ដំណើរការប្រកួតនៅថ្ងៃទី ៦ ខែមីនា ចុងសប្តាហ៍នេះ។
លោក មាស ចាន់ណា មិនបានគិតថា ក្លិបធំៗ មានដូចជា បឹងកេត ព្រះខ័នរាជស្វាយរៀង វិសាខា ភ្នំពេញក្រោន អង្គរថាយហ្គឺ សមាគមកីឡាបាល់ទាត់កងយោធពលខេមរភូមិន្ទ (ទ័ព) និងក្លិបមួយចំនួនទៀត ដែលមានទីលាន ឬកីឡដ្ឋាន ផ្ទាល់ខ្លួន គឺមិនជួបការលំបាកក្នុងការរកទីតាំងហ្វឹកហាត់ ដូចក្រុមណាហ្គាវើលនោះទេ។
គ្រូបង្វឹករូបនេះ បានប្រាប់ ភ្នំពេញ ប៉ុស្តិ៍ កាលពីថ្ងៃអាទិត្យថា៖ «ការត្រៀមខ្លួនរបស់យើងមិនសូវជាបានល្អប៉ុន្មានទេ ព្រោះបញ្ហាជំងឺកូវីដ ១៩ បានធ្វើឱ្យយើងមានការលំបាកមែនទែន ដោយយើងត្រូវរត់រកទីលានហ្វឹកហាត់រហូត គឺម្តងហាត់នៅទីនេះ ម្តងនៅទីនោះ ចំណែកក្រុមមួយចំនួនទៀត មិនសូវមានការប៉ះពាល់ប៉ុន្មានទេ ទាក់ទងនឹងការហ្វឹកហាត់នេះ ដោយសារគេមានទីលានផ្ទាល់ខ្លួន និងមានស្តាតផ្ទាល់ខ្លួន»។
លោក ចាន់ណា បានបន្តថា៖ «យើងនៅមិនទាន់មានទីលានផ្ទាល់ទេ ដោយសារកីឡដ្ឋានខេត្តកំពង់ស្ពឺ កំពុងតែសាងសង់ អ៊ីចឹងយើងនៅមិនទាន់មានទីតាំងមួយជាប់លាប់ឡើយ ដោយយើងដូររហូត គឺយើងហាត់នៅតាមសាលា តែសាលាគេបិទ ហើយពេលប្តូរទៅហាត់នៅកន្លែងផ្សេង គេបិទទៀត ហេតុនេះយើងមានការពិបាកមែនទែន ប៉ុន្តែបើយើងមានទីលានខ្លួនឯង គឺយើងហាត់នៅតែ ១ កន្លែង ហើយកីឡាករក៏នៅតែ ១ កន្លែង អ៊ីចឹងវាមានការងាយស្រួលដល់យើង»។
យ៉ាងណាក៏ដោយ នៅរដូវកាលនេះ ក្រុមណាហ្គាវើល បាននាំយកកីឡាករក្នុងស្រុកសម្បូរបទពិសោធជាច្រើននាក់រួមមាន នុប តុលា, សំអឿន ពិដោរ, នេន សុធារដ្ឋ ដែលធ្លាប់លេងឱ្យក្រុមព្រះខ័នរាជស្វាយរៀង ខ្សែប្រយុទ្ធ តាំង សុភ័ក្រ និង ពេជ្រ សុវណ្ណខេមរិន្ទ ដែលធ្លាប់លេងឱ្យក្រុមអង្គរថាយហ្គឺរ មកចាប់ដៃលេងជាមួយកីឡាករជើងចាស់របស់ខ្លួន គួច សុកុម្ភៈ, វ៉ា ខ្វិនទីន, សុះ ស៊ូហាណា, ឃឹម បូរី, សារី ម៉ាត់ណូរ៉ូទីន និងកីឡាករមួយចំនួនទៀត។
បន្ថែមលើនេះ ណាហ្គាវើល ក៏បាននាំយកខ្សែប្រយុទ្ធកម្ពស់ ១,៩៣ ម៉ែត្រសញ្ជាតិម៉ុលដាវី Leuca Petru ខ្សែបម្រើជប៉ុន Fumiya Kogure ដែលទើបចាកចេញពីក្រុមសូលទីឡូអង្គរ ខ្សែការពារជនជាតិអេស្ប៉ាញ Manuel Herrera Lopez និងបានរក្សាទុកខ្សែប្រយុទ្ធឆ្នើមជនជាតិប្រស៊ីល Marcio សម្រាប់ជួបក្រុមផងដែរ គឺអាចនិយាយបានថា នៅរដូវកាលនេះ ណាហ្គាវើលពេញជើងទាំងការប្រកួតពានរង្វាន់សម្តេច ហ៊ុន សែន និងលីគកំពូលកម្ពុជា ហើយបុរសជនជាតិប្រេស៊ីលសម្បូរបទពិសោធលោក Jose Alves ក៏ត្រូវបានតែងតាំងជានាយកបច្ចេកទេស សម្រាប់ជួយជ្រោមជ្រែងដល់ក្លិបណាហ្គាវើល ផងដែរ។
ទាក់ទងទៅនឹងការនាំយកធនធានកីឡាករល្អទាំងនេះ មកជួយក្រុមក្នុងរដូវកាលនេះ លោក មាស ចាន់ណា បញ្ជាក់ថា៖ «ការនាំយកកីឡាករសម្បូរបទពិសោធមកចូលរួមជាមួយក្រុម ក្នុងរដូវកាលនេះ គឺយើងផ្តោតទាំងទៅលើការប្រកួតពានរង្វាន់សម្តេច ហ៊ុន សែន និងលីគកំពូលកម្ពុជា ប៉ុន្តែការប្រកួតប្រជែងនៅរដូវកាលនេះ ពិតជាតានតឹងណាស់ ដោយសារក្រុមមួយៗបានពង្រឹងទៅលើគុណភាពកីឡាករ ពិសេសកីឡាករបរទេស ដែលមានការពង្រឹងខ្លាំងមែនទែន»៕