.jpg)
ខ្សែបម្រើស្លាបអន្តរជាតិអេហ្ស៊ីប Mohamed Salah របស់ក្រុម Liverpool កំពុងតែស្រេកឃ្លានក្នុងការរកគ្រាប់បាល់បញ្ចូលទីបន្ថែមទៀត។ AFP
ក្រុងឡុងដ៍: តារាឆ្នើម Mohamed Salah បានបញ្ជាក់ប្រាប់លោក Jurgen Klopp យ៉ាងច្បាស់ថា រូបគេចង់លេងការប្រកួតឲ្យបានច្រើនតាមដែលអាចដើម្បីព្យាយាមបង្កើតប្រវត្តិសាស្ត្រនៃការរកគ្រាប់បាល់សម្រាប់ក្រុម Liverpool ខណៈដែលពួកគេត្រៀមធ្វើដំណើរទៅជួបក្រុមបាតតារាងនៃក្របខ័ណ្ឌ Premier League គឺ West Bromwich Albion។
វាមានន័យថា ខ្សែបម្រើស្លាបអន្តរជាតិអេហ្ស៊ីបរូបនេះ កំពុងតែមានការស្ទាក់ស្ទើរតែក្នុងការសម្រាកសម្រាប់ការប្រកួតនៅថ្ងៃសៅរ៍នេះ នាកីឡដ្ឋាន The Hawthorns បើទោះបីលោក Klopp អ្នកចាត់ការទូទៅបស់ក្រុម Liverpool ត្រូវតែធ្វើការរៀបចំក្រុមមួយសម្រាប់ការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី១ ជាមួយនឹងក្រុម Roma នៅរាត្រីថ្ងៃអង្គារ សប្តាហ៍ក្រោយក៏ដោយ។
Salah បានក្លាយជាកីឡាករទី៣ក្នុងការរកគ្រាប់បាល់បាន៤០គ្រាប់ក្នុងរដូវកាលមួយសម្រាប់ Liverpool នៅពេលដែលរូបគេបានរកគ្រាប់បាល់បញ្ចូលទីក្នុងពេលក្រុមខ្លួនយកឈ្នះលើក្រុម Bournemouth ៣-០ កាលពីចុងសប្តាហ៍មុន។
Mohamed Salah (ស្តាំ) របស់ក្រុម Liverpool ដណ្តើមបាល់ជាមួយនឹងខ្សែបម្រើអង់គ្លេស Jake Livermore របស់ក្រុម West Bromwich។ AFP
បច្ចុប្បន្ន រូបគេនៅសល់ត្រឹមតែ៧គ្រាប់ទៀតប៉ុណ្ណោះក្នុងការតាមស្មើកំណត់ត្រារបស់ក្លិបដែលត្រូវបានបង្កើតឡើងដោយកីឡាករ Ian Rush ដែលរកបាន៤៧គ្រាប់សម្រាប់ Liverpool ក្នុងរដូវកាលឆ្នាំ១៩៨៣-១៩៨៤។
ប៉ុន្តែ លោក Klopp ត្រូវតែធ្វើការពិចារណាថា តើត្រូវប្រើប្រាស់ Salah សម្រាប់ការប្រកួតជាមួយនឹងក្រុម West Brom ឬយ៉ាងណា ខណៈដែលការប្រកួតនេះកើតឡើងត្រឹមតែ៣ថ្ងៃ នៅមុនពេលការប្រកួតជាមួយនឹង Roma ដែលជាអតីតក្លិបរបស់ខ្សែបម្រើស្លាបរូបនេះ។
ការប្រកួតនេះនឹងចាប់ផ្តើមនៅម៉ោង៦:៣០ល្ងាច៕ IS
