.jpg)
ការហ្វឹកហាត់ទូកកាយ៉ាក់របស់កីឡាករអាមេរិក Tyler Uthus ត្រៀមអូឡាំពិក ដែលត្រូវពន្យារពេល។ AFP
ក្រុងតូក្យូ៖ ក្រុមគណៈកម្មាធិការរៀបចំកីឡាអូឡាំពិក នៅទីក្រុងតូក្យូរបស់ប្រទេស ជប៉ុន កំពុងពិចារណាយកខែកក្កដា ឆ្នាំ ២០២១ ជាថ្ងៃចាប់ផ្ដើមសម្រាប់ព្រឹត្តិការណ៍ ដែលត្រូវបានប្រកាសឲ្យផ្អាកនេះ។ នេះបើតាមការឲ្យដឹងពីប្រព័ន្ធផ្សព្វផ្សាយក្នុងប្រទេស ជប៉ុន ដែលបានរាយការណ៍ឲ្យដឹងកាលពីម្សិលមិញ ក្រោយពីមានការសម្រេចជាប្រវត្តិសាស្ត្រឲ្យធ្វើការពន្យារពេល ដោយសារការរាតត្បាតវីរុសកូរ៉ូណា។
ដោយការរាលដាលនៃជំងឺនៅតែបន្តមាន ហើយនិងត្រូវការពេលត្រៀមផង គម្រោងដែលទំនងកើតមានបំផុតសម្រាប់ចាប់ផ្ដើមការប្រកួតប្រជែងកីឡានេះ គឺនៅថ្ងៃទី ២៣ ខែ កក្កដា ឆ្នាំ ២០២១។ នេះបើតាមការផ្សាយឲ្យដឹងពីទូរទស្សន៍របស់រដ្ឋ NHK ដោយយោងតាមប្រភពពីផ្ទៃក្នុងរបស់ក្រុមអ្នករៀបចំ។
រឿងនេះកើតមាន ក្រោយពីអភិបាលក្រុងតូក្យូ លោកស្រី Yuriko Koike បានលើកជាគំនិតឡើងកាលពីថ្ងៃសុក្រ ឲ្យផ្លាស់ព្រឹត្តិការណ៍នេះ ទៅពេលដែលសីតុណ្ហភាពប្រចាំឆ្នាំមិនសូវក្ដៅ និងត្រជាក់បន្តិច។
លោកស្រីអភិបាលក្រុងបានលើកហេតុផលថា ការធ្វើបែបនេះ នឹងធ្វើឲ្យការប្រកួតលើវិញ្ញាសារត់ម៉ារ៉ាតុង និងការប្រកួតកីឡាផ្សេងៗទៀតងាយស្រួលនឹងសម្របខ្លួនបាន ពោលគឺមានន័យថា ពួកគេអាចរៀបចំក្នុងរាជធានីតែម្ដង ជាជាងប្ដូរទៅធ្វើនៅទីក្រុង Sapporo ដែលគណៈកម្មាធិការអូឡាំពិកអន្តរជាតិ (IOC) បានសម្រេចឲ្យអត្តពលិកទៅប្រកួតទីនោះ។
យោងតាមកាសែត Asahi Shimbun បានឲ្យដឹងថា ក្រុមអ្នករៀបចំកីឡាអូឡាំពិក Tokyo 2020 ដែលដឹកនាំដោយ លោក Yoshiro Mori បាននិងកំពុងពិភាក្សាជាមួយ IOC ហើយ សម្រាប់ពេលវេលាដែលអាចឲ្យព្រឹត្តិការណ៍នេះ ចាប់ផ្ដើមដំណើរការ។ កាលពីចុងសប្ដាហ៍មុន លោក Mori បានថ្លែងទៅកាន់ស្ថានីយទូរទស្សន៍មួយរបស់ជប៉ុនថា៖ «ការសរុបផ្នែកខ្លះ អាចនឹងធ្វើឡើង ក្នុងរង្វង់មួយសប្ដាហ៍ទៀត»។
ដំបូងឡើយ កីឡាអូឡាំពិកគ្រោងប្រារព្ធបើកជាផ្លូវការនៅថ្ងៃទី ២៤ ខែកក្កដា ឆ្នាំនេះ ហើយបន្ទាប់មកប៉ារ៉ាឡាំពិក នៅថ្ងៃទី ២៥ ខែសីហា ប៉ុន្តែកាលពីសប្ដាហ៍កន្លងទៅ ប្រទេស ជប៉ុន ដែលដេញថ្លៃបានសិទ្ធិរៀបចំព្រឹត្តិការណ៍ដ៏ធំលើលោក ដែលតែងកើតមាន ៤ឆ្នាំម្ដងនេះ បានប្រកាសដោយមានការយល់ស្របពី IOC ថា ផ្អាកជាបណ្ដោះអាសន្នសិន ដែលនេះជាការសម្រេចជាប្រវត្តិសាស្ត្រមិនធ្លាប់មានពីមុនមក ក្នុងពេលវេលាសន្តិភាពបែបនេះ។
លោកនាយករដ្ឋមន្ត្រី Shinzo Abe បានថ្លែងថា ព្រឹត្តិការណ៍នេះ នឹងត្រូវរៀបចំប្រហែល ១ ឆ្នាំទៀត ហើយពេលកើតឡើងការប្រកួតកីឡាដ៏ធំនេះ នឹងក្លាយជាសក្ខីភាពសម្រាប់ជ័យជម្នះរបស់មនុស្សជាតិលើជំងឺឆ្លងដ៏កាចសាហាវ ដែលកំពុងកើតមាននេះ។
តែជាមួយនឹងការសម្រេចពន្យារពេលនេះ ត្រូវបានគេមើលឃើញថា បានផ្ដល់ឱកាសយ៉ាងច្រើនដល់ទីក្រុងតូក្យូ ដោយប្រធាន IOC លោក Thomas Bach បាននិយាយថា៖ «គ្រប់ជម្រើសទាំងអស់ ត្រូវបានយកមកពិភាក្សា ហើយការកំណត់ពេលវេលាឡើងវិញ មិនទាន់ច្បាស់ ១០០ ភាគរយនោះទេ គ្រាន់តែពេលនេះ ខែក្ដៅឆ្នាំក្រោយ ជាជម្រើសទី ១»។
ទន្ទឹមនឹងនេះដែរ ទូរទស្សន៍ NHK បានផ្សាយថា ភ្លើងគប់អូឡាំពិកនឹងត្រូវដាក់តាំងបង្ហាញរយៈពេល ១ ខែ នៅឯមជ្ឈមណ្ឌលកីឡា នាទីក្រុង Fukushima ដែលទីនោះត្រូវបានប្រើជាកន្លែងមូលដ្ឋានសម្រាប់ក្រុមកម្មករជំនួយរាប់ពាន់នាក់ ដែលស្ថិតក្នុងសម្លៀកបំពាក់ការពារការសាយភាយវិទ្យុសកម្ម អំឡុងគ្រោះមហន្តរាយនុយក្លេអ៊ែកាលពីឆ្នាំ ២០១១៕ AFP/VN
