ក្រុងម៉ូស្គូ: បារាំង នឹងត្រូវទទួលស្វាគមន៍ការវិលត្រឡប់ទៅមាតុភូមិវិញរបស់វីរបុរសខ្លួន នៅថ្ងៃចន្ទនេះ ក្រោយពីបានលើកពាន World Cup ជាលើកទី២ តាមរយៈការដណ្តើមបានជ័យជម្នះក្នុងលទ្ធផល ៤-២ លើក្រុមជម្រើសជាតិក្រូអាស៊ី ដែលក៏នឹងទទួលការអបអរយ៉ាងខ្លាំងក្លានៅប្រទេសរបស់ពួកគេផងដែរ។
ខ្សែប្រយុទ្ធវ័យក្មេង Kylian Mbappe បានបំពេញជ័យជម្នះរបស់ក្រុមខ្លួនក្នុងទីក្រុង ម៉ូស្គូ ខណៈដែលក្រុមជម្រើសជាតិបារាំង ដែលត្រូវបានជួយដោយការធ្វើឲ្យបាល់ចូលទីខ្លួនឯង និងវីដេអូជំនួយការអាជ្ញាកណ្តាល បានយកឈ្នះលើគូប្រកួតប្រកបដោយស្មារតីប្រយុទ្ធ ក្នុងការប្រកួតមួយក្នុងចំណោមការប្រកួតវគ្គផ្តាច់ព្រ័ត្រដ៏រំភើបបំផុតនៃយុគសម័យកាលទំនើប។
Mbappe វ័យត្រឹមតែ១៩ឆ្នាំ បានរកគ្រាប់បាល់ទី៤របស់បារាំង និងត្រូវបានបោះឆ្នោតឲ្យជាប់ជាកីឡាករវ័យក្មេងឆ្នើមបំផុតប្រចាំយុទ្ធនាការ ដែលរូបគេបានបង្ហាញថា គេជាតារាឆ្នើមម្នាក់។
ជ័យជម្នះនេះ ក៏បានធ្វើឲ្យលោក Didier Deschamps ដែលបានធ្វើជាប្រធានក្រុមនៃក្រុមបារាំងក្នុងពេលពួកគេលើកពាន World Cup នៅលើទឹកដីខ្លួនឯងកាលពីឆ្នាំ១៩៩៨នោះ ចូលរួមជាមួយនឹងលោក Mario Zagallo និងលោក Franz Beckenbauer ក្នុងនាមជាបុរសទី៣ក្នុងការឈ្នះពាន World Cup ទាំងជាកីឡាករ និងគ្រូបង្វឹកម្នាក់។
ប្រធានាធិបតីបារាំងលោក Emmanuel Macron ដែលបានអបអររាល់គ្រាប់បាល់បញ្ចូលទីនាកីឡដ្ឋាន Luzhniki ក្នុងទីក្រុងម៉ូស្គូ បានទទឹកខ្លួនជោគដោយសារតែភ្លៀងយ៉ាងខ្លាំងក្លា អំឡុងពេលការប្រគល់ពាន និងបានព្យាយាមស្វាគមន៍កីឡាករក្នុងបន្ទប់ផ្លាស់ប្តូរសម្លៀកបំពាក់៕ IS