.jpg)
Oiboh Julius បានលោតរំលេងទៅយកបាល់ពេលរូបគេជួយឲ្យបឹងកេត ស្មើ វិសាខា ១-១។ ស្រេង ម៉េងស្រ៊ុន
ភ្នំពេញៈ ក្រុមបឹងកេតបានវាយបកតាមស្មើក្រុមវិសាខា ទាំងលំបាក ប៉ុន្តែលទ្ធផលនេះវាប្រសើរជាងក្រុមព្រះខ័នរាជស្វាយរៀងដែលកាន់តែឃ្លាតឆ្ងាយពីតំបន់កំពូលតារាងទាំង ៤ ឯក្រុមទ័ពបានឈ្នះ ៣ ពិន្ទុបន្ថែមដូចក្រុមប៉ូលិសដែរ។
សម្រាប់ការប្រកួតកាលពីថ្ងៃអាទិត្យនោះក្រុមវិសាខារកបានគ្រាប់បាល់មុន ដែលរកបានដោយខ្សែប្រយុទ្ធកូរ៉េខាងជើង Myong Ho តាំងពីនាទីទី ១២ ប៉ុន្តែការព្យាយាមវាយបករបស់បឹងកេតបានផ្តល់ឱកាសឲ្យ Oiboh Julius អាចតែតបាល់បញ្ចូលទីតាមស្មើ ១-១ នៅនាទីទី ៧៧។
ការប្រកួតនេះមានភាពតានតឹងខ្លាំងបំផុត ហើយការផ្តោតខ្លាំងទៅលើការដណ្តើមបាន ៣ ពិន្ទុនេះធ្វើឲ្យក្រុមទាំង ២ ហាក់ដាក់សម្ពាធខ្លាំងទៅលើអាជ្ញាកណ្តាលកាត់សេចក្តីផងដែរ។ ប៉ុន្តែអ្វីៗបានប្រសើរវិញក្រោយចប់ការប្រកួតដោយបឹងកេត បាន ១ ពិន្ទុបន្ថែម ដើម្បីមាន ២៤ ពិន្ទុ ហើយវិសាខា បាន ១ ពិន្ទុ ដើម្បីមាន ២០ ពិន្ទុ។
ផ្ទុយពីនេះក្រុមស្វាយរៀងបានឃ្លាតកាន់តែឆ្ងាយពីតំបន់កំពូលតារាងទាំង ៤ ក្រោយពេលពួកគេបន្តចាញ់ក្រុមអាស៊ីអឺរ៉ុប ២-១ កាលពីថ្ងៃសៅរ៍។ ខ្សែប្រយុទ្ធ Shane Booysen រកបានគ្រាប់បាល់បើកឆាកឲ្យស្វាយរៀងបានមុននៅនាទីទី ៣៥ ប៉ុន្តែអាស៊ីអឺរ៉ុបបានវាយបកបាន ២ គ្រាប់វិញដែលរកបានដោយខ្សែប្រយុទ្ធ Privat នៅនាទីទី ៤៦ និងទី ៨៥។
លទ្ធផលនេះបានធ្វើឲ្យក្រុមស្វាយរៀងមាន ១១ ពិន្ទុដដែល ឯអាស៊ីអឺរ៉ុបមាន ១៥ ពិន្ទុ ខណៈ Privat កំពុងមានគ្រាប់បាល់ច្រើនជាងគេគឺ ១៥ គ្រាប់ក្នុងដំណើរឆ្ពោះទៅប្រជែងយកស្បែកជើងមាសក្នុងរដូវកាលនេះ។
ចំណែកក្រុមក្រសួងការពារជាតិ (ទ័ព) បានយកឈ្នះក្រុមសូលទីឡូអង្គរ ៣-១ ដើម្បីមាន ១៨ ពិន្ទុ និងបន្តឈរនៅលេខ ៤ ឯក្រុមប៉ូលិសបានឈ្នះអង្គរថាយហ្គឺរ ២-១ ដើម្បី ១៧ ពិន្ទុ។
ដោយឡែកក្រុមណាហ្គាវើលបានឈ្នះវេស្ទើន ១០-១ ហើយភ្នំពេញក្រោន បានត្រឹមស្មើអគ្គិសនីកម្ពុជា ០-០ ប៉ុណ្ណោះកាលពីម្សិលមិញ៕
