ក្រុងអាប៊ូចា៖ មន្ត្រីអាជ្ញាធរនីហ្សេរីយ៉ា ពីថ្ងៃចន្ទបានរឹបអូសទ្រព្យសម្បត្តិពីមន្ត្រីជាន់ខ្ពស់មួយចំនួននៃសមាគមបាល់ទាត់កំពូលនៅប្រទេស នីហ្សេរីយ៉ា រួមទាំងប្រធានរបស់សមាគមនេះ គឺលោក Amaju Pinnick នៅក្នុងប្រតិបត្តិការបង្ក្រាបអំពើពុករលួយថ្មីៗនេះ។
គណៈកម្មការបង្ក្រាបអំពើពុករលួយឯករាជ្យ (ICPC) បានរឹបអូសអចលនទ្រព្យ ១២ កន្លែង ក្នុងនោះពាក់កណ្ដាល គឺជាកម្មសិទ្ធិរបស់លោក Pinnick រួមទាំងមួយកន្លែងនៅក្នុងទីក្រុងឡុងដ៍ផងដែរ ក្នុងការស៊ើបអង្កេតថ្មីបំផុតដោយសំដៅរកមន្ត្រីជាន់ខ្ពស់សហព័ន្ធបាល់ទាត់នីហ្សេរីយ៉ា (NFF) ដែលត្រូវបានចោទប្រកាន់ពីបទលាងលុយកខ្វក់រាប់លានដុល្លារ។
មន្ត្រីនាំពាក្យគណៈកម្មការ ICPC លោក Rasheedat Okoduwa បាននិយាយថា៖ «មន្ត្រីជាច្រើនរូបនៅសហព័ន្ធ NFF កំពុងស្ថិតក្រោមការស៊ើបអង្កេតព្រោះអ្វីដែលពួកគេមាន គឺលើសពីអ្វីដែលពួកគេរកបានទៅទៀត»។
ប្រធានមួយចំនួនរបស់សហព័ន្ធ NFF ដឹកនាំដោយលោក Pinnick បច្ចុប្បន្នកំពុងស្ថិតក្រោមការស៊ើបអង្កេតពាក់ព័ន្ធនឹងអំពើពុករលួយ ៣ ដាច់ដោយឡែកពីគ្នារួមទាំងការចោទប្រកាន់ ១៧ ករណី នៅតុលាការចាប់ពីការមិនប្រកាសទ្រព្យសម្បត្តិរហូតដល់ការកិបកេងប្រាក់ចំនួន ៨,៤ លានដុល្លារ របស់សហព័ន្ធបាល់ទាត់ពិភពលោក FIFA ដែលត្រូវចំណាយទៅឲ្យសហព័ន្ធជាតិនេះផងដែរ។
ករណីនេះនឹងបន្តដល់ថ្ងៃទី ២៦ ខែកញ្ញា។ ក្នុងករណីដាច់ដោយឡែកមួយទៀត លោក Pinnick និងលោក Mohammed Sanusi ព្រមទាំងគណនេយ្យករ ៣ នាក់ទៀត នៅសហព័ន្ធ NFF នេះត្រូវបានចោទប្រកាន់ពីបទកិបកេងប្រាក់ជំនួយជាង ១០ លានដុល្លារ របស់សហព័ន្ធ FIFA និងសហព័ន្ធបាល់ទាត់អាហ្រ្វិក (CAF) ដែលជាជំនួយសម្រាប់ការអភិវឌ្ឍវិស័យបាល់ទាត់នៅនីហ្សេរីយ៉ា។
កាលពីខែកក្កដា សហព័ន្ធ CAF បានបណ្ដេញលោក Pinnick ចេញពីតំណែងអនុប្រធានសហព័ន្ធនេះពាក់ព័ន្ធអំពើពុករលួយ៕ AFP/SN