ក្រុងឡុងដ៍: អ្នកចាំទីអន្តរជាតិប្រេស៊ីល Alisson ត្រូវបានរំពឹងទុកថា នឹងចុះហត្ថលេខាឲ្យក្លិប Liverpool ក្នុងកុងត្រារយៈពេល៥ឆ្នាំ ក្នុងតម្លៃខ្លួន ៧៥ លានអឺរ៉ូ (ស្មើនឹង ៨៧,៣ លានដុល្លារអាមេរិក) ដែលជាតម្លៃខ្លួនជាកំណត់ត្រាពិភពលោកសម្រាប់អ្នកចាំទីម្នាក់។ នេះបើយោងទៅតាមបណ្តាញសារព័ត៌មាននានាដែលបានចេញផ្សាយកាលពីថ្ងៃពុធ។
អ្នកចាំទីវ័យ២៥ឆ្នាំរូបនេះ ដែលបច្ចុប្បន្នលេងឲ្យក្លិប Roma ក្នុងប្រទេសអ៊ីតាលី នឹងកាត់បន្ថយថ្ងៃវិស្សមកាលរបស់ខ្លួន ដើម្បីទទួលការត្រួតពិនិត្យសុខភាព នៅទីក្រុង Merseyside ក្រោយពីត្រូវបានផ្តល់ការអនុញ្ញាតឲ្យពិភាក្សាជាមួយនឹង ក្លិប Liverpool។
កាសែត Liverpool Echo បានធ្វើការអះអាងថា៖ «ការប្រកាសជាផ្លូវការមួយ គួរតែធ្វើឡើងក្នុងរយៈពេល២៤ម៉ោង ទៅ៤៨ម៉ោងទៀត»។
ការផ្ទេរនេះនឹងធ្វើឲ្យក្លិបយក្សមានមូលដ្ឋាននៅ Anfield មួយនេះ ចំណាយប្រាក់៧៥លានអឺរ៉ូ ដើម្បីបំបែកកំណត់ត្រាចំនួនទឹកប្រាក់៤០លានអឺរ៉ូ ដែលក្លិប Manchester City បានចំណាយប្រាក់ទិញមិត្តរួមជាតិរបស់ Alisson គឺ Ederson ពីក្លិប Manchester City កាលពីរដូវក្តៅមុន។
ក្លិប Liverpool សង្ឃឹមថា នឹងចុះហត្ថលេខាជាមួយនឹងអ្នកចាំទីថ្មីម្នាក់ ដើម្បីជំនួសកន្លែងរបស់ Loris Karius ក្រោយពីការបង្ហាញពីទម្រង់លេងយ៉ាងខកចិត្តរបស់គេក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ៕ IS