ក្រុងសាំងភីធើស្ប៊ើក: តារាឆ្នើម Neymar នឹងមានបំណងធ្វើឲ្យយុទ្ធនាការ World Cup របស់ក្រុមបាល់ទាត់ជម្រើសជាតិប្រេស៊ីល វិលទៅកាន់ភាពល្អប្រសើរឡើងវិញ នៅយប់នេះ ខណៈដែលក្រុមយក្សមួយនេះ សម្លឹងរកការបង្ហាញពីភាពខ្លាំងរបស់ខ្លួនក្នុងនាមជាក្រុមប្រជែងដណ្តើមពាន តាមរយៈការយកឈ្នះលើក្រុមជម្រើសជាតិកូស្តារីកា។
Neymar ត្រូវបានធ្វើឲ្យជួបការលំបាកយ៉ាងខ្លាំងក្នុងពេលក្រុមប្រេស៊ីល បានបញ្ចប់ក្នុងលទ្ធផលស្មើ ១-១ ជាមួយនឹងក្រុមជម្រើសជាតិស្វ៊ីស កាលពីថ្ងៃអាទិត្យ ដោយរងនូវការប្រព្រឹត្តកំហុសពីលើ ១០ លើក អំឡុងពេលនៃការប្រកួតនោះ ដែលជាអត្រាដ៏ច្រើនបំផុតសម្រាប់កីឡាករម្នាក់ ក្នុងការប្រកួតមួយនៃ World Cup ក្នុងរយៈពេល ២០ ឆ្នាំកន្លងមកនេះ។
បន្ទាប់មក កីឡាករមានតម្លៃខ្លួនខ្ពស់ជាងគេបំផុតរបស់ពិភពលោករូបនេះ បានធ្វើឲ្យមានការព្រួយបារម្ភផ្សេងៗ នៅពេលដែលរូបគេហាក់បានដើរទាំងមានរបួសក្នុងពេលហ្វឹកហាត់កាលពីថ្ងៃអង្គារ នៅពីមុខកាមេរ៉ាជាច្រើន។ ទោះបីជាយ៉ាងណា រូបគេបានវិលទៅហ្វឹកហាត់វិញ ក្នុងរយៈពេល ៤៨ ម៉ោង នៅមុនពេលការប្រកួតក្នុងទីក្រុង Saint Petersburg ដែលនាំឲ្យមានក្តីសង្ឃឹមថា រូបគេនឹងចូលលេង។
នៅមុនពេលជួបការខកចិត្តថ្មីៗនេះ មានការសង្ស័យជាច្រើនទៅលើភាពរឹងមាំរបស់ Neymar នៅមុនពេលឈានទៅ World Cup នេះ ក្រោយពីការអវត្តមានរយៈពេល ៣ ខែ។
ស៊ែប៊ី សម្លឹងរកកៅអីក្នុងវគ្គ ១៦ ពេលប៉ះ ស្វ៊ីស
ក្រុមបាល់ទាត់ជម្រើសជាតិស៊ែប៊ី នឹងព្យាយាមប្រជែងយកកៅអីទៅវគ្គ ១៦ ក្រុមចុងក្រោយនៃព្រឹត្តិការណ៍ World Cup នៅរាត្រីនេះ ខណៈដែលពួកគេត្រូវប៉ះជាមួយនឹងក្រុមជម្រើសជាតិស្វ៊ីស ដែលកំពុងតែមានការជឿជាក់ ក្រោយពីដណ្តើមបានលទ្ធផលស្មើជាមួយនឹងប្រេស៊ីល។ ក្រុមជម្រើសជាតិស៊ែប៊ី កំពុងគ្រប់គ្រងជោគវាសនារបស់ខ្លួនក្នុងពូល E ក្រោយពីបានយកឈ្នះលើក្រុមជម្រើសជាតិកូស្តារីកា ក្នុងលទ្ធផល ១-០ កាលពីថ្ងៃអាទិត្យ ដែលបានកើតឡើងពីការស៊ុតបាល់ពិន័យ Free-kick យ៉ាងល្អរបស់ Aleksandar Kolarov។
ការដណ្តើមបានជ័យជម្នះលើក្រុមជម្រើសជាតិស្វ៊ីស ក្នុងទីក្រុង Kaliningrad នឹងធ្វើឲ្យក្រុមស៊ែប៊ី ឈ្នះកៅអីមួយទៅវគ្គ ១៦ ក្រុមចុងក្រោយ បើទោះបីពួកគេ ចាញ់ ឬឈ្នះក្នុងការប្រកួតចុងក្រោយរបស់ពួកគេជាមួយនឹងក្រុមជម្រើសជាតិប្រេស៊ីល នៅសប្តាហ៍ក្រោយ ក៏ដោយ។
Kolarov បានដឹងថា ស៊ែប៊ី កំពុងស្ថិតក្នុងទីតាំងដ៏រឹងមាំក្នុងការឈ្នះកៅអីទៅវគ្គបន្ត ជាលើកទី ១ ចាប់តាំងពីពួកគេបានប្រកួតរួមគ្នាជាមួយក្រុមម៉ុងតេណេហ្រ្គោក្នុងឆ្នាំ ១៩៩៨៕ AFP/IS
កម្មវិធីប្រកួតចុងសប្តាហ៍
ថ្ងៃសុក្រ ទី ២២ ខែមិថុនា
ប្រេស៊ីល v កូស្តារីកា-7យប់
នីហ្សេរីយ៉ា v អ៊ីស្លង់-10យប់
ស៊ែប៊ី v ស្វ៊ីស-1រំលងអាធ្រាត្រ
ថ្ងៃសៅរ៍ ទី ២៣ ខែមិថុនា
បែលហ្ស៊ិក v ទុយនីស៊ី-7យប់
កូរ៉េខាងត្បូង v ម៉ិកស៊ិក-10យប់
អាល្លឺម៉ង់ v ស៊ុយអែត-1អាធ្រាត្រ
ថ្ងៃអាទិត្យ ទី ២៤ ខែមិថុនា
អង់គ្លេស v ប៉ាណាម៉ា-7យប់
ជប៉ុន v សេណេហ្គាល់-10យប់
ប៉ូឡូញ v កូឡុំប៊ី-1រំលងអាធ្រាត្រ