.jpg)
សកម្មភាពប្រកួតក្របខ័ណ្ឌសិស្សវិទ្យាល័យដែលធ្លាប់ត្រូវបានរៀបចំឡើង នាពេលកន្លងមក។ រូប ភ្នំពេញប៉ុស្តិ៍
ភ្នំពេញៈ សហភាពសហព័ន្ធយុវជនកម្ពុជារាជធានីភ្នំពេញ និងក្លិបបាល់ទាត់បឹងកេតបានឈានដល់ការឯកភាពគ្នាក្នុងការបង្កើតឲ្យមានការប្រកួតបាល់ទាត់ដ៏ថ្មីសន្លាងមួយឈ្មោះថា «ពានរង្វាន់ជើងឯកវិទ្យាល័យឆ្នាំ ២០១៩» ដើម្បីស្វែងរកកីឡាករមានសមត្ថភាពនៅក្នុងស្រទាប់សិស្សានុសិស្សឲ្យទទួលបានឱកាសចូលប្រឡូកក្នុងវិស័យបាល់ទាត់ក្នុងនាមជាកីឡាករអាជីព នាពេលអនាគត។ រីឯប្រាក់រង្វាន់ផ្តល់ជូនដល់ក្រុមម្ចាស់ជយលាភីវិញគឺមានចំនួនស្មើនឹងក្រុមម្ចាស់ជយលាភីនៃការប្រកួតលីកកំពូលកម្ពុជា។
លោក បែ មករា អ្នកចាត់ការទូទៅក្លិបបឹងកេតបាននិយាយថា៖ «យើងតែងតែចង់បានកីឡាករល្អៗ ហើយគោលបំណងរបស់ក្លិបដែលបានចូលរួមរៀបចំពានរង្វាន់នេះគឺយើងចង់បានកីឡាករល្អៗ ថ្មីៗ គឺមិនមែនកីឡាករដដែលនោះទេ ហើយអ្នកទាំងនោះជាកីឡាករវ័យក្មេងដែលមានសមត្ថភាពល្អៗ អ៊ីចឹងយើងមានក្រុមបច្ចេកទេសជំនាញសម្រាប់តាមដានគ្រប់ការប្រកួត ដើម្បីជ្រើសរើសបានកីឡាករល្អពិតប្រាកដ»។
ការលើកឡើងបែបនេះរបស់លោក បែ មករា បានធ្វើឡើងនៅក្នុងសន្និសីទកាសែតស្តីពីការប្រកួតពានរង្វាន់ជើងឯកវិទ្យាល័យ ឆ្នាំ ២០១៩ នេះនៅទីស្នាក់ការសហភាពសហព័ន្ធយុវជនកម្ពុជារាជធានីភ្នំពេញកាលពីថ្ងៃព្រហស្បតិ៍ ហើយភាគីពាក់ព័ន្ធ និងតំណាងក្រុមដែលបានចូលរួមក៏មានវត្តមាននៅក្នុងសន្និសីទកាសែតនោះដែរ ដើម្បីស្តាប់ពីបទបញ្ជា និងលក្ខខណ្ឌប្រកួតផ្សេងៗដែលមានការពន្យល់ និងបកស្រាយពីគណៈកម្មការរៀបចំតែម្តង។
យ៉ាងណាក៏ដោយលោក បែ មករា ក៏បានបង្ហាញពីផលវិបាកមួយចំនួនជុំវិញការជ្រើសរើសកីឡាករល្អៗចេញពីការប្រកួតនេះ ដើម្បីឲ្យទៅចូលលេងនៅក្លិបបឹងកេតផងដែរ។ លោកបញ្ជាក់ថា៖ «មានពេលខ្លះយើងសន្យាថានឹងយក តែបែរជាអត់យកពួកគេវិញ ដោយសារទី ១ សមត្ថភាពរបស់ពួកគេមិនដល់កម្រិតដែលយើងចង់បាន ហើយទី ២ វាមានលក្ខខណ្ឌច្រើនទៀតដូចជា ឪពុកម្តាយ មិនឯកភាព ឬកីឡាករខ្លួនឯង មិនចង់ធ្វើជាកីឡាករអាជីពជាដើម។ តែទោះបីជាយ៉ាងណា យើងមានការប្តេជ្ញាចិត្តយកកីឡាករថ្មីៗឲ្យបានច្រើន ដើម្បីមករួមរស់ជាមួយក្រុមបឹងកេតរបស់យើង»។
លោក បែ មករា ពេលនិយាយនៅក្នុងសន្និសីទកាសែត។ រូប ឈន ណន
ការប្រកួតពានរង្វាន់ជើងឯកវិទ្យាល័យនេះនឹងប្រព្រឹត្តទៅនៅរៀងរាល់ថ្ងៃព្រហស្បតិ៍ និងថ្ងៃសុក្រដែលនឹងចាប់ផ្តើមពីថ្ងៃទី ៦ ខែមិថុនាតទៅ ហើយក្រុមមកពីគ្រឹះស្ថានចំណេះទូទៅរបស់រដ្ឋ និងឯកជនចំនួន ៩ បានដាក់ពាក្យចូលរួមក្នុងនោះមានក្រុមវិទ្យាល័យជាស៊ីមច្បារអំពៅ, វិ.ឥន្ទ្រទេវី, វិ.ចាក់អង្រែ, វិទ្យាល័យឫស្សីកែវ, វិទ្យាល័យជាស៊ីមសាមគ្គី, វិទ្យាល័យបឹងត្របែក, សាលា វេស្ទឡាញន៍, វិទ្យាល័យព្រះស៊ីសុវត្ថិ និងវិ. សម្តេចហ៊ុនសែន ភ្នំពេញថ្មី។
ក្រុមទាំង ៩ នេះត្រូវបានតម្រូវឲ្យមានការប្រកួតតាមរូបមន្តលីកកំពូលកម្ពុជា គឺប្រកួតវិលជុំចំនួន ២ ជើង ហើយក្រុមដែលមានពិន្ទុខ្ពស់ជាងគេនឹងក្លាយជាម្ចាស់ជើងឯកតែម្តង។ បើបូកសរុបតែថ្ងៃប្រកួតគឺព្រឹត្តិការណ៍នេះប្រើពេលតែ ៣៦ ថ្ងៃប៉ុណ្ណោះ ប៉ុន្តែប្រាក់រង្វាន់ដែលនឹងត្រូវប្រគល់ជូនដល់ក្រុមម្ចាស់ជយលាភីគឺមានចំនួនស្មើនឹងការប្រកួតប្រាក់រង្វាន់លីកកំពូលកម្ពុជាផងដែរ គឺក្រុមលេខ ១ នឹងទទួលបាន ៦០ លានរៀល ក្រុមលេខ ២ បាន ៤០ លានរៀល និងក្រុមលេខ ៣ បាន ២០ លានរៀល។
ជាមួយគ្នានេះក្រុមនីមួយៗអាចចុះបញ្ជីកីឡាករយ៉ាងតិច ១៨ នាក់ និងយ៉ាងច្រើន ៥០ នាក់ ប៉ុន្តែកីឡាករដែលបានចុះបញ្ជីចូលរួម ត្រូវតែមានបណ្ណសម្គាល់ខ្លួនជាសិស្សនៃវិទ្យាល័យ ឬគ្រឹះស្ថានសិក្សារបស់ក្រុមចូលរួមប្រកួត និងលិខិតបញ្ជាក់សុខភាពថាអាចលេងកីឡាបាន។
ចំណែកកីឡាករបរទេសអាចលេងបាន លុះត្រាតែបានចុះបញ្ជីជាមួយគណៈកម្មការប្រកួតតាមរយៈក្រុមចូលរួមប្រកួតត្រូវមានលិខិតឆ្លងដែន ដែលមានទិដ្ឋាការរយៈពេលយ៉ាងតិច ៦ ខែមានលិខិតបញ្ជាក់សុខភាពថាអាចលេងកីឡាបាន និងមានបណ្ណសម្គាល់ខ្លួនជាសិស្សរបស់វិទ្យាល័យ ឬគ្រឹះស្ថានរបស់ក្រុមចូលរួមប្រកួត។
ប៉ុន្តែទោះជាយ៉ាងណានៅត្រង់ចំណុចទាំងនេះលោក បែ មករា បានបញ្ជាក់បន្ថែមថា កីឡាករដែលមានឈ្មោះលេងនៅលីកកំពូលកម្ពុជាមិនត្រូវបានអនុញ្ញាតឲ្យចូលរួមការប្រកួតពានរង្វាន់ជើងឯកវិទ្យាល័យនេះទេ បើទោះបីជាអ្នកនោះមានបណ្ណសម្គាល់ខ្លួនជាសិស្សសាលាក៏ដោយ ហើយលោកបានសុំឲ្យតំណាងក្រុមទាំងអស់រក្សាឲ្យបាននូវតម្លាភាពនៅលើការចុះបញ្ជីឈ្មោះកីឡាករ ពិសេសត្រូវគោរពឲ្យបាននូវបទបញ្ជា និងលក្ខខណ្ឌនៃការប្រកួត ដើម្បីធ្វើឲ្យព្រឹត្តិការណ៍នេះដំណើរការទៅបានល្អ និងក៏ដើម្បីមុខមាត់របស់សាលា ឬក្រុមដែលបានចូលរួមផងដែរ។
ជាមួយគ្នានេះលោក ងួន សុភៈ ប្រធានគណៈកម្មការរៀបចំការប្រកួតបានលើកឡើងថា «ពានរង្វាន់ជើងឯកវិទ្យាល័យ» ត្រូវបង្កើតឡើងដើម្បីរួមចំណែកអភិវឌ្ឍវិស័យកីឡាបាល់ទាត់នៅកម្ពុជា និងជំរុញចលនាកីឡាបាល់ទាត់នៅតាមសាលារៀនឲ្យមានសមត្ថភាពកាន់តែផុសផុល ។
លោក ងួន សុភៈ បានបញ្ជាក់ថា៖ «យើងបង្កើតពានរង្វាន់ជើងឯកវិទ្យាល័យនេះត្រូវបានបង្កើតឡើងក្នុងគោលបំណងរួមចំណែកលើកកម្ពស់វិស័យកីឡាបាល់ទាត់កម្ពុជាឲ្យមានសកម្មភាពរស់រវើក និងរីកចម្រើនកាន់តែប្រសើរ សំដៅបណ្តុះស្មារតីឲ្យស្រឡាញ់កីឡា សុខភាព ចៀសឆ្ងាយពីគ្រឿងញៀនព្រមទាំងអាចសម្រិតសម្រាំងបានធនធានកីឡាករសម្រាប់បន្តវេន ហើយការប្រកួតនេះក៏ដើម្បីរឹតចំណងមិត្តភាព សាមគ្គីភាព និងកិច្ចសហប្រតិបត្តិការរវាងសិស្សានុសិស្សដែរ»៕
