.jpg)
ពុយ វណ្ណៈ បានទាត់បំបែកកង់ក្រោមរបស់ Khundeth នៅត្រឹមទឹកទី ១។ ស្រេង ម៉េងស្រ៊ុន
ភ្នំពេញៈ កីឡាករវ័យក្មេងរបស់កម្ពុជា ពុយ វណ្ណៈ បានប្រើតិចជាង ៣ នាទី ក្នុងការទាត់បំបែកកង់ក្រោមអ្នកប្រដាល់ថៃ Khundeth សម្រាប់ការប្រកួតបើកឆាកដណ្តើមខ្សែក្រវាត់គោជល់ រដូវកាលទី ៩ ទម្ងន់ ៦៣,៥ គីឡូក្រាម នៅលើសង្វៀន CNC កាលពីយប់ថ្ងៃសៅរ៍ ប៉ុន្តែ សេង ស្រឿន បានភ្លាត់ត្រូវ ១ កែងរបស់ថៃ បណ្តាលឲ្យសន្លប់។
នៅក្នុងការប្រកួតនោះ កីឡាករវ័យ ២១ ឆ្នាំ ពុយ វណ្ណៈ បានដើរចូលទាត់សន្ធាប់ខ្លាំងៗទៅលើ Khundeth ហើយទម្ងន់ជើងរបស់គេធ្វើឲ្យថៃម្នាក់នេះដួលទាំងជំហរជាច្រើនលើកនាំឲ្យអាជ្ញាកណ្តាលចាប់រាប់ ចំនួន ២ ដង និងឈានដល់បញ្ឈប់ការប្រកួត នៅចុងទឹកទី ១នេះតែម្តង បន្ទាប់ពី Khundeth ក្រោកលែងរួច នៅពេល ពុយ វណ្ណៈ ទាត់ឲ្យដួលជាលើកទី ៨ នោះ។
ចំណែក សេង ស្រឿន ក៏បានចូលវាយលុកដោយកណ្តាប់ដៃ ទាត់ និងបុកជង្គង់ ដើម្បីយកប្រៀបដាច់លើថៃ Kvangin ផងដែរ ប៉ុន្តែការចូលម៉ាត់ដោយខ្វះការប្រុងប្រយ័ត្នរបស់ ស្រឿន បានធ្វើឲ្យ Kvangin បុកកែងប្តូរចំថ្គាម បណ្តាលឲ្យសន្លប់ នៅចុងទឹកទី ២ ដ៏គួរឲ្យភ្ញាក់ផ្អើលបំផុត។
ការចាញ់យ៉ាងជូរចត់នេះ ធ្វើឲ្យ សេង ស្រឿន មានការលំបាក ក្នុងការប្រជែងទៅវគ្គពាក់កណ្តាលផ្តាច់ព្រ័ត្រ ផងដែរ ព្រោះការប្រកួតខ្សែក្រវាត់ ដែលមានកីឡាករថៃ ៤ នាក់ និងកម្ពុជា ៤ នាក់នេះ គឺអ្នករៀបចំ តម្រូវឲ្យភាគីថៃ ត្រូវប្រកួតវិលជុំជាមួយភាគីកម្ពុជា ហើយមានតែកីឡាករ ៤ នាក់ ដែលមានពិន្ទុច្រើនជាងគេប៉ុណ្ណោះ ត្រូវឡើងទៅប្រកួតនៅវគ្គបន្ត ដើម្បីដណ្តើមយកខ្សែក្រវាត់ ខ្សែកមាស អមជាមួយប្រាក់រង្វាន់ គឺអ្នកលេខ ២ បាន ២០ លានរៀល លេខ ២ បាន ១០ លាន លេខ ៣ បាន ៦ លាន និងលេខ ៤ បាន ៤ លានរៀល។
យ៉ាងណាក៏ដោយ ក្នុងសន្និសីទកាសែត ស្តីពីការប្រកួតនេះ ដែលត្រូវបានធ្វើឡើង មុនការប្រកួតចាប់ផ្តើមនោះ លោក តែម ម៉ឺន ប្រធានសហព័ន្ធកីឡាគុនខ្មែរ និងលោក ហួរ រតនៈ ប្រធានទីផ្សារទូរទស្សន៍ CNC សុទ្ធតែបានសាទរ និងអរគុណដល់ក្រុមហ៊ុនភេសជ្ជៈគោជល់ ដែលបានសម្រេចបន្តឧបត្ថម្ភធំដល់ការប្រកួតខ្សែក្រវាត់គោជល់ រដូវកាលទី ៩ នេះ។
លោក តែម ម៉ឺន បានថ្លែងថា៖ «ខ្ញុំពិតជាសប្បាយរីករាយ ដែលគោជល់ បានបន្តឧបត្ថម្ភដល់ការប្រកួតខ្សែក្រវាត់នេះ ព្រោះព្រឹត្តិការណ៍នេះ បានចូលរួមជួយអភិវឌ្ឍកីឡាប្រដាល់កម្ពុជា ត្រៀមទៅស៊ីហ្គេម ឆ្នាំ ២០២៣ ហេតុនេះមន្រ្តីបច្ចេកទេសរបស់សហព័ន្ធ ត្រូវបំពេញការងារឲ្យអស់ពីសមត្ថភាពពិសេសសុំឲ្យកាត់សេចក្តីឲ្យមានតម្លា ភាព និងយុត្តិធម៌ ដើម្បីឲ្យគ្រប់ភាគី និងអ្នកគាំទ្រ ទទួលយកបានទាំងអស់គ្នា»។
ចំណែកលោក មាន សំអុល នាយកចាត់ការទូទៅភេសជ្ជៈគោជល់ នៅកម្ពុជា បានថ្លែងថា៖ «គោជល់ តែងតែគាំទ្រដល់វិស័យកីឡាជានិច្ច។ យើងតែងតែជួយលើក និងដុសខាត់សមត្ថភាពរបស់កីឡាករខ្មែរ ឲ្យឈានដល់កម្រិតស្តង់ដារមួយ ដែលអាចប្រៀបធៀបជាមួយកីឡាករបរទេសជើង ខ្លាំងល្បីៗបាន។ ហេតុនេះ យើងសង្ឃឹមជឿជាក់ថា ការប្រកួតនេះ នឹងនៅតែទទួលបានការគាំទ្រយ៉ាងច្រើនលើសលប់ពីទស្សនិកជនទាំងអស់គ្នា»៕
