ភ្នំពេញ៖ កីឡាករវាយមិនសំចៃកម្លាំង ពុយ វណ្ណៈ បានបង្កើនការហ្វឹកហាត់យ៉ាងខ្លាំង ដើម្បីត្រៀមជួបជើងខ្លាំង យ៉េន ឌីណា ក្នុងការប្រកួតវគ្គពាក់កណ្តាលផ្តាច់ព្រ័ត្រ ដណ្តើមខ្សែក្រវាត់ខារ៉ាបាវ ទម្ងន់ ៦៣,៥ គីឡូក្រាម នៅលើសង្វៀន SEATV នាថ្ងៃសៅរ៍ ដើម្បីស្វែងរកឈ្នះឡើងទៅប្រកួតផ្តាច់ព្រ័ត្រជាមួយអ្នកប្រដាល់ថៃ ដែលអាចជា Loom Leng ឬ Kolap Dam ព្រោះអ្នកទាំង ២ នេះ ក៏ត្រូវប្រជែងគ្នាក្នុងវគ្គ ១/២ ផ្តាច់ព្រ័ត្រនេះដែរ។
សម្រាប់ការជួបគ្នា ក្នុងវគ្គដ៏សំខាន់នេះ យ៉េន ឌីណា របស់សមាគមប្រដាល់ក្រសួងកសិកម្ម និង ពុយ វណ្ណៈ ក្លិបឃ្លាំងមឿងកីឡា ត្រូវបានគេមើលឃើញថា មានកម្រិតបច្ចេកទេសដាច់ឆ្ងាយពីគ្នា ដោយសារ យ៉េន ឌីណា វ៉ៃក្បាច់តាមបច្ចេកទេស ឯ ពុយ វណ្ណៈ អាងកម្លាំងច្រើនជាង ហើយអ្នកទាំង ២ នេះ ក៏មិនធ្លាប់បានជួបគ្នាពីមុនមកនោះដែរ ហេតុនេះឱកាសប្រជែងកៅអី ឡើងទៅវគ្គផ្តាច់ព្រ័ត្រ ពិតជាមានឧបសគ្គធំដូចគ្នា។
កីឡាករ ពុយ វណ្ណៈ ធ្លាប់ប្រកួត ៧៥ ដង ឈ្នះ ៥៦ ចាញ់ ១៧ និងស្មើពិន្ទុ ២ ដង ចំណែក យ៉េន ឌីណា មានប្រវត្តិប្រកួតបាន ៧៦ ដង ឈ្នះ ៦៤ និងចាញ់ ១២ ដង។ ឌីណា ដែលកំពុងហ្វឹកហាត់ជាមួយក្លិបអេ ភូថង មិនអាចសុំទាក់ទងសម្ភាសបានទេពីការត្រៀមខ្លួនក្នុងវគ្គសំខាន់នេះ ប៉ុន្តែចំពោះ ពុយ វណ្ណៈ កំពុងតែប្រឹងប្រែងហាត់ជាប្រចាំ។
អ្នកស្រី ម៉េង សុខា អ្នកគ្រប់គ្រងក្លិបឃ្លាំងមឿងកីឡា បានប្រាប់ថា ពុយ វណ្ណៈ កំពុងហ្វឹកហាត់ខ្លាំងណាស់ ហើយតាមការហ្វឹកហាត់នេះ អ្នកស្រីប្រាប់ថា មានសង្ឃឹមឈ្នះ ៦០ ភាគរយ។ អ្នកស្រី សុខា បានបន្តថា៖ «វណ្ណៈ ហ្វឹកហាត់មានកម្លាំងត្រៀមប្រកួតបានល្អ ធានាថាវ៉ៃល្អចំនួន ៥ ទឹកពេញ ប៉ុន្តែបញ្ហាចាញ់ ឬឈ្នះ គឺពិតជាតឹងតែង និងសុទ្ធតែឧបសគ្គធំដូចគ្នា»។
ចំណែកជំនួបវគ្គពាក់កណ្ដាលផ្ដាច់ព្រ័ត្ររវាងកីឡាករថៃដូចគ្នា គឺ Loom Leng និង Kolap Dam នៅថ្ងៃសៅរ៍នោះដែរ គេមិនហ៊ានទស្សន៍ទាយទេ ព្រោះពួកគេមកជាមួយគ្នា ព្រមទាំងហូបចុកស្នាក់នៅជាមួយគ្នា មិនអាចដឹងពីជម្រៅចិត្តបានថា វ៉ៃអស់ពីសមត្ថភាព ឬមានភាពមិនប្រក្រតីណាមួយឡើង។
ចំពោះបញ្ហានេះ លោក ថៃ អ៊ូ អ្នកនាំកីឡាករថៃមកប្រកួតបានឆ្លើយតបថា៖ «សម្រាប់កីឡាករថៃ ទោះមកជាមួយគ្នា ក៏វ៉ៃអស់ពីសមត្ថភាពដូចគ្នា ព្រោះជាវគ្គសំខាន់ដណ្តើមកៅអីទៅវគ្គផ្តាច់ព្រ័ត្រ មិនអាចបន្ធូរដៃឲ្យគ្នាបានទេ។
ជាមួយគ្នានេះ បើសិនមានភាពមិនប្រក្រតីណាមួយកើតឡើងត្រូវបានរកឃើញ ឬចាប់បានភ័ស្តុតាង គឺបណ្តេញចេញមិនឲ្យតម្លៃខ្លួនទេ»៕