.jpg)
Paulo Victor របស់ភ្នំពេញក្រោន រារាំងខ្សែប្រយុទ្ធ Crus Guardiano របស់វិសាខាកាលជើងទី ១។ វិសាខា
ភ្នំពេញៈ ក្រុមភ្នំពេញក្រោន ដែលកំពុងតែមានមោទនភាពទៅលើភាពរីកចម្រើនក្នុងការលេងជាក្រុមបានល្អនោះ គ្រោងនឹងលេងបែបការវាយលុកទៅលើក្រុមវិសាខាសម្រាប់ការវិលមកជួបគ្នាជើងទី ២ លីកកំពូលកម្ពុជា ឆ្នាំ ២០១៩ នៅកីឡដ្ឋានវិសាខានាថ្ងៃអាទិត្យ ដើម្បីសងសឹកចំពោះការចាញ់ ៣-១ កាលពីជើងទី ១ ចំណែកបឹងកេតក៏នឹងត្រូវជម្រះភាពមន្ទិលជាមួយក្រុមអង្គរថាយហ្គឺរនៅថ្ងៃសៅរ៍ដែរ។
ការស្មើក្រុមបឹងកេត ៤-៤ ដែលពួកគេធ្លាប់ចាញ់ ៣-២ កាលពីជើងទី ១ និងការបន្តលត់ក្រុមសាលាកីឡាបាល់ទាត់ជាតិបាទីរហូតដល់ ១២-១ ក្នុងការប្រកួតជើងទី ២ នេះបានបង្ហាញឲ្យឃើញពីភាពរីកចម្រើនរបស់ក្រុមភ្នំពេញក្រោន ហើយអ្នកចាត់ការទូទៅវ័យក្មេងរបស់ក្រុមនេះគឺអតីតខ្សែប្រយុទ្ធឆ្នើម កែវ សុខង៉ន បាន ចាត់ទុកការលេងបានល្អក្នុងជើងទី ២ នេះថាជាភាពរីកចម្រើនលើសពីអ្វីដែលក្រុមភ្នំពេញក្រោនបានរំពឹងទុក។
កែវ សុខង៉ន បានប្រាប់កាលពីម្សិលមិញថា៖ «នៅពេលនេះភ្នំពេញក្រោន លេងជាក្រុមបានល្អជាងមុន ព្រមទាំងមានសាមគ្គី និងសហការគ្នាល្អផងដែរ អ៊ីចឹងការជួបក្រុមវិសាខាលើកនេះ វានឹងមិនពិបាកណាស់ណានោះទេ។ ប៉ុន្តែយើងតែងមានការបារម្ភចំពោះការប្រកួតធំបែបនេះដោយសារវិសាខាក៏គេរៀបចំបានល្អដែរ ហើយក៏ទទួលបានលទ្ធផលល្អកាលពីពេលថ្មីៗនេះដូចគ្នា»។
យ៉ាងណាក៏ដោយ កែវ សុខង៉ន បានបញ្ជាក់ថា៖ «ការលេងជាមួយក្រុមវិសាខាលើកនេះយើងទាមទារយកឈ្នះ ៣ ពិន្ទុដាច់ខាត គឺយើងត្រូវតែវាយលុក ព្រោះចំណាត់ថ្នាក់របស់យើងពេលនេះទោះបីជាយើងចាញ់ក៏ដោយ មិនរំកិលចុះក្រោមដែរ អ៊ីចឹងលទ្ធភាពរបស់យើងអាចលេងប្រយុទ្ធច្រើន ហើយកម្លាំងប្រយុទ្ធរបស់យើងមានជួរមុខ ៣ ទៅ ៤ នាក់ដែលគិតថាល្អដែរ ដូចជា Dzarma Bata, Booyen Shane, Mustafa Zazai និង ប្រាក់ ធីវ៉ា ដែលពួកគាត់សហការគ្នាបានល្អ»។
តាមរយៈការប្រកួត ១៥ សប្តាហ៍កន្លងមកនេះភ្នំពេញក្រោន ឈរនៅចំណាត់ថ្នាក់លេខ ៦ ដោយមាន ២៨ ពិន្ទុ ហេតុនេះការប្រជែងយក ៣ ពិន្ទុពីក្រុមវិសាខា វាសំខាន់ណាស់សម្រាប់ពួកគេក្នុងការប្រជែងឡើងទៅឈរនៅតំបន់កំពូលតារាងទាំង ៤ (Top4) ទៅតាមទិសដៅរបស់ខ្លួន។
ប៉ុន្តែក្រុមវិសាខាដែលមាន ៣១ ពិន្ទុក៏ត្រូវការឈ្នះដាច់ខាត ដើម្បីរក្សាទីតាំងលេខ ៤ របស់ពួកគេ ឬក៏អាចឡើងទៅឈរនៅលេខ ៣ ផងដែរ ព្រោះនៅសប្តាហ៍នេះក្រុមកំពុងឈរនៅលេខ ៣ មាន ៣៣ ពិន្ទុ អង្គរថាយហ្គឺរ ត្រូវធ្វើដំណើរពីសៀមរាបមកជួបក្រុមបឹងកេតនៅភ្នំពេញវិញម្តង។
បើទោះបីជាក្រុមអង្គរថាយហ្គឺរ បានស្មើ ១-១ ជាមួយបឹងកេតសម្រាប់ការប្រកួតជើងទី ១ នៅលើទឹកដីខ្លួនឯង ប៉ុន្តែការប្រកួតលើកនេះ អង្គរថាយហ្គឺរ អាចនឹងមានការលំបាកច្រើន។ ផ្ទុយពីនេះក្រុមកំពុងឈរនៅលើកំពូលតារាងមាន ៣៩ ពិន្ទុ ព្រះខ័នរាជស្វាយរៀង អាចនឹងឈ្នះបាន ៣ ពិន្ទុបន្ថែមទៀត ខណៈពួកគេត្រូវស្វាគមន៍ក្រុមគិរីវង់ដែលខ្លួនធ្លាប់ឈ្នះ ២-០ នោះ។ ចំណែកក្រុមឈរនៅលេខ ២ មាន ៣៤ ពិន្ទុ ណាហ្គាវើល ត្រូវវិលទៅជួបក្រុមប៉ូលិសដែលពួកគេធ្លាប់ឈ្នះ ៦-០ ក្នុងជើងទី ១ ដែលរំពឹងអាចឈ្នះបាន ៣ ពិន្ទុដូចគ្នា៕
កម្មវិធីប្រកួតនៅថ្ងៃសៅរ៍
-សាលាកីឡាបាល់ទាត់ជាតិ v អគ្គិសនីកម្ពុជានៅសាលាកីឡា បាល់ទាត់ជាតិបាទី ១៥:៣០
-សូលទីឡូអង្គរ v អាស៊ីអឺរ៉ុប កីឡ.ខេត្តសៀមរាប ១៥:៣០
-បឹងកេត v អង្គរថាយហ្គឺរ កីឡដ្ឋានខេមបូឌាអ៊ែរវ៉េ ១៥:៣០
៤ ប្រកួតនៅថ្ងៃអាទិត្យ
-ស្វាយរៀង v គិរីវង់ កីឡដ្ឋានខេត្តស្វាយរៀង ១៨:០០
-ប៉ូលិស v ណាហ្គាវើល កីឡ.អគ្គិសនីកម្ពុជា ១៥:៣០
-ខេត្តកំពង់ចាម v ក្រសួងការពារជាតិ កីឡ.ស្តាតចាស់ ១៥:៣០
-វិសាខា v ភ្នំពេញក្រោន កីឡដ្ឋានវិសាខា ១៨:០០
