.jpg)
កីឡាករសរ រាជសីហ៍ (ស្តាំ) ក្នុងពេលប្រកួតជាមួយនឹងកីឡាករ Ser Gei កាលពីថ្ងៃអាទិត្យ។ យឺន ពន្លក
ភ្នំពេញ: កីឡាករប្រដាល់ចិត្តធំមកពីក្លិបមោងឫស្សីខេត្តបាត់ដំបង សរ រាជសីហ៍ ដែលបាត់មុខពីសង្វៀនជិតកន្លះឆ្នាំមកនោះ បានឡើងប្រកួតជាថ្មីកាលពីព្រឹកថ្ងៃអាទិត្យ ដើម្បីផ្តួលកីឡាករជើងខ្លាំង Ser Gei មកពីកៀហ្ស៊ីស៊ីស្ថាន ត្រឹមទឹកទី ៣ នៅសង្វៀនអាស៊ីអាគ្នេយ៍ ក្នុងកម្មវិធី Boostrong Fighter on Fire និងដើម្បីធ្វើឲ្យមានការចាប់អារម្មណ៍ខ្លាំងពីអ្នកទស្សនា។
កម្មវិធីប្រកួត Boostrong Fighter on Fire ដែលមានគោលដៅរៀបចំឲ្យមានការប្រកួតរវាងជើងខ្លាំងកម្ពុជា ជាមួយកីឡាករភាគច្រើនមកពីអឺរ៉ុប នោះ បានផ្តល់នូវការទាក់ទាញខ្លាំង ខណៈដែលអ្នករៀបចំការប្រកួត ត្រូវបានអះអាងប្រាប់ថា មានការប្លែកអារម្មណ៍ជាងប្រកួតអន្តរជាតិជាមួយកីឡាករថៃ។
ក្នុងការប្រកួតដ៏ជក់ចិត្តនៅ ២ ទឹកដំបូង កីឡាករសរ រាជសីហ៍ បានទទួលរងនូវស្នៀតកណ្តាប់ដៃធ្ងន់ៗរបស់កីឡាករជើងខ្លាំង Ser Gei។
សរ រាជសីហ៍ នៅតែព្យាយាមចូលឱបឡើងជង្គង់ និងទាត់ជើងក្រោម ប៉ុន្តែមើលទៅទំនងដូចចូលឲ្យគេវាយប៉ុណ្ណោះ។ លុះដល់ចុងទឹកទី ២ សរ រាជសីហ៍ ដណ្តើមយកការមានប្រៀបឡើងវិញដោយមានឱកាសឡើងក្បាច់ជង្គង់បានខ្លះ និងប្តូរស្នៀតកែងមុខកាណូត ដែលបណ្តាលឲ្យកីឡាករ Ser Gei វង្វេងវង្វាន់ ខណៈអាជ្ញាកណ្តាលលោកឡុង វិបុល បានរាប់ចំនួន ៨ ទៅលើក Ser Gei មុននឹងបន្តការប្រកួតទៀត។
ការប្រកួតបានបន្តដល់ទៅទឹកទី ៣ ខណៈដែលសរ រាជសីហ៍ ហាក់បីដូចជាមានឱកាសកាន់តែល្អដោយចូលកៀក ដើម្បីលេងក្បាច់ជង្គង់បានល្អ និងធ្វើឲ្យ Ser Gei ស្ថិតក្នុងបញ្ហាលំបាកទប់ទល់ និងបានដួលទៅលើសង្វៀនជាញឹកញាប់ ហើយអាជ្ញាកណ្តាលលោកឡុង វិបុល បានបន្តរាប់ចំនួន ២ លើកទៀត ក្នុងទឹកទី ៣។ ក្រោយពីបានបន្តការប្រកួតដែលមើលទៅហាក់បីដូចជាអស់លទ្ធភាពតដៃនោះ លោកអាជ្ញាកណ្តាលបានបញ្ឈប់តែម្តង។
កីឡាករ Ser Gei នៅតែមិនអស់ចិត្ត និងបានតវ៉ាពីការបញ្ឈប់នេះ ប៉ុន្តែ ទាំងគ្រូបង្វឹក ទាំងប្រតិភូនាំកីឡាករបរទេសគឺលោកថៃ អ៊ូ បានបញ្ជាក់ថា៖ «បើបន្តឲ្យប្រកួតទៀតអាចនឹងទទួលរងគ្រោះថ្នាក់ខ្លាំង ពីព្រោះកីឡាករបរទេសនេះក្រៅពីកណ្តាប់ដៃ មិនចេះស្នៀតការពារទេ ដោយ រាជសីហ៍ អាចឡើងជង្គង់ដល់មុខឯណោះ»។
សរ រាជសីហ៍ បានផ្តល់បទសម្ភាសឲ្យភ្នំពេញ ប៉ុស្តិ៍ ក្រោយពីដណ្តើមបានជ័យជម្នះភ្លាមៗថា៖ «ជ័យជម្នះនេះគឺបើកផ្លូវឲ្យខ្ញុំមានទីផ្សារប្រកួតជាលក្ខណៈអន្តរជាតិឡើងវិញ បន្ទាប់ពីខកខានការប្រកួតប្រហែល ៥ ខែកន្លងមក ដែលធ្វើឲ្យជីវភាពលំបាកសឹងតែដាច់បាយម្តងម្កាល»។
សរ រាជសីហ៍ បានប្រាប់បន្តថា៖ «ការខកខានការប្រកួតគឺបណ្តាលមកពីចាប់គូប្រកួតមិនបានដោយសារ ទី ១ ខ្ញុំឡើងទម្ងន់ដល់ ៧៥ គីឡូក្រាម ទី ២ មួយរយៈចុងក្រោយ ខ្ញុំប្រកួតចាញ់ញឹកញាប់ និងទី ៣ ខ្ញុំវាយមិនសូវល្អដោយបញ្ហាសុខភាព និងកម្លាំងធ្លាក់ចុះជាងមុនៗ ហើយការហ្វឹកហាត់មិនសូវបានល្អផងដែរ»។
ក្រោយការប្រកួតនេះ រាជសីហ៍ បានរំពឹងថា៖ «ខ្ញុំសង្ឃឹមថា នឹងមានសង្វៀនផ្សេងៗទទួលយកខ្ញុំទៅប្រកួតជាលក្ខណៈអន្តរជាតិបន្តក្នុងប្រភេទទម្ងន់ ៧៥ គីឡូក្រាម»។
បើយោងទៅតាមប្រវត្តិរបស់កីឡាករសរ រាជសីហ៍ រូបគេធ្លាប់ប៉ះប្រកួតជាមួយជើងខ្លាំងច្រើនណាស់មានដូចជា រឿង សោភ័ណ្ឌ, ឡុង សុភី, ម៉ឺន សុភា និងអ៊ុំ ចំរើន ជាដើម ក្នុងនោះធ្លាប់ចូលប្រកួតដណ្តើមខ្សែក្រវាត់ជាច្រើនលើក ប៉ុន្តែបានចំណាត់ថ្នាក់ត្រឹមលេខ ២ ឬជើងឯករងប៉ុណ្ណោះ។ សរ រាជសីហ៍ បានប្រាប់ឲ្យដឹងថា៖ «បច្ចុប្បន្ន ខ្ញុំមានប្រពន្ធ និងកូន ២ នាក់ហើយ នៅក្នុងចំណោមបងប្អូនបង្កើត ៦ នាក់»។
រាជសីហ៍ មានប្អូនបង្កើតម្នាក់ទៀតជាប់ជាកីឡាករគុនខ្មែរជម្រើសជាតិថ្នាលគឺកីឡាករសរ សូ ដែលមានប្រភពមកពីក្លិបមោងឫស្សីខេត្តបាត់ដំបងដូចគ្នា។ ក្រៅពីប្រដាល់ រាជសីហ៍ ធ្វើស្រែចម្ការបន្តិចបន្តួចដើម្បីបំពេញជីវភាពសាមញ្ញនៅខេត្តបាត់ដំបង។
ចំណែកប្រវត្តិប្រកួតពិតរបស់សរ រាជសីហ៍ រូបគេប្រកួតបានចំនួន ៦៦ លើក ឈ្នះ ៥៣ លើក ចាញ់ ១៣ លើក ក្នុងនោះធ្លាប់ផ្តួលដៃគូឲ្យសន្លប់ចំនួន ១៦ លើក៕
