ក្រុងមីឡាន: លោក Carlo Ancelotti បានសន្យាថា នឹងបញ្ចប់ការរង់ចាំរយៈពេល២៨ឆ្នាំរបស់ក្រុម Napoli សម្រាប់ការឈ្នះពានក្របខ័ណ្ឌ Serie A ក្រោយពីលោកត្រូវបានតែងតាំងជំនួសលោក Maurizio Sarri ក្នុងនាមជាគ្រូបង្វឹកថ្មីរបស់ក្លិបអ៊ីតាលីមួយនេះ ក្នុងកិច្ចសន្យារយៈពេល៣ឆ្នាំ កាលពីថ្ងៃពុធ។
លោក Ancelotti ដែលត្រូវបានបណ្តេញចេញដោយក្លិប Bayern Munich កាលពីខែកញ្ញានោះ ចូលកាន់តំណែង ក្រោយពីលោក Sarri ត្រូវបានបង្ខំឲ្យចាកចេញពីកីឡដ្ឋាន San Paolo បន្ទាប់ពីបញ្ចប់ក្នុងចំណាត់ថ្នាក់លេខ២ នៅលើតារាងក្របខ័ណ្ឌ Serie A ពីក្រោយក្រុម Juventus។
Napoli មិនធ្លាប់បានឈ្នះពានក្របខ័ណ្ឌ Serie A សោះ ចាប់តាំងពីថ្ងៃដែលអតីតតារាឆ្នើមអាហ្សង់ទីន Diego Maradona បានជួយឲ្យពួកគេឈ្នះពានតែ២លើករបស់ពួកគេកាលពីឆ្នាំ១៩៨៧ និងឆ្នាំ១៩៩០។
លោក Ancelotti បានឲ្យដឹងក្នុងសេចក្តីថ្លែងការណ៍មួយនៅលើគេហទំព័រផ្ទាល់ខ្លួនថា៖ «ខ្ញុំពិតជារីករាយណាស់ក្នុងការវិលទៅកាន់ប្រទេសរបស់ខ្ញុំវិញ និងទៅកាន់ក្រុមមួយក្នុងចំណោមក្រុមដ៏អស្ចារ្យបំផុតក្នុងប្រទេសអ៊ីតាលី។ គោលបំណងគឺការគ្រប់គ្រងពាន Scudetto ក្រោយពីរយៈពេល២៨ឆ្នាំ។ យើងពិតជារំភើបចំពោះការប្រជែងនេះ និងត្រៀមរួចរាល់ក្នុងការបើកទំព័រថ្មីក្នុងកីឡាបាល់ទាត់»៕ IS