ភ្នំពេញ៖ វិបត្តិជំងឺកូវីដ ១៩ ជាលក្ខណៈសកលលោកបានធ្វើឲ្យអតីតកីឡាករបាល់ទាត់ដ៏ល្បីល្បាញរបស់កម្ពុជា លោក ប៉ែន ផាត ជាប់គាំង និងបន្តរស់នៅក្នុងខេត្តឈុនបុរី ប្រទេសថៃ ទាំងគ្មានជម្រើស បើទោះបីជា លោកបានផុតកុងត្រាពីតួនាទីជាអ្នកគ្រប់គ្រងបច្ចេកទេសរបស់សាលាបាល់ទាត់ថ្នាល TKS Academy នៅទីនោះតាំងពីខែមេសា ហើយមានបំណងមកលេងប្រទេសកំណើត មុនបន្តទៅប្រទេសបារាំង ជាផ្ទះរបស់លោកក៏ដោយ។
លោក ប៉ែន ផាត ដែលបច្ចុប្បន្នមានអាយុ ៧២ ឆ្នាំទៅហើយនោះ បានក្លាយជាគ្រូបង្វឹកបាល់ទាត់ដ៏ឆ្នើម ១ រូបដ៏មានបទពិសោធ ខណៈក្នុងអំឡុងទសវត្សរ៍ ៦០ និង ៧០ លោកជាកីឡាករលេងបាល់ទាត់ឲ្យប្រទេសថៃ ហើយបន្ទាប់មកលោកបានទៅរស់នៅ និងធ្វើជាគ្រូបង្វឹកឲ្យសាលាបាល់ទាត់កម្រិតថ្នាលមួយ នៅប្រទេសបារាំង ប៉ុន្តែលោកនៅតែមានទំនាក់ទំនងលើវិស័យបាលទាត់នៅកម្ពុជា។
លោក ប៉ែន ផាត បានប្រាប់ភ្នំពេញប៉ុស្តិ៍តាមហ្វេសប៊ុក កាលពីថ្ងៃចន្ទថា៖ «សាលាបាល់ទាត់ថ្នាល TKS Academy នៅខេត្តឈុនបុរី ប្រទេសថៃ បានចុះកិច្ចសន្យាជាមួយខ្ញុំ ដើម្បីធ្វើគ្រូបង្វឹកផ្នែកបច្ចេកទេសនៅទីនោះ បានរយៈពេល ៣ ឆ្នាំមកហើយ ដែលក្នុងនោះ កិច្ចសន្យាធ្វើក្នុងរយៈពេល ៦ ខែម្ដង ប៉ុន្តែពេលនេះកិច្ចសន្យា ត្រូវបានចប់ជាបណ្តោះអាសន្ន ស្របពេលដែលជំងឺកូវីដ ១៩ មិនទាន់បានបាត់នាំឲ្យកិច្ចសន្យា មិនអាចបន្តទៀតបាន ខណៈសាលានេះក៏ត្រូវបានបិទផងដែរ»។
លោកបានបន្តថា៖ «លំនៅឋានអចិន្រ្តៃយ៍របស់ខ្ញុំ នៅឯប្រទេសបារាំង ដោយខ្ញុំមានសញ្ជាតិបារាំង និងប្រទេសកម្ពុជា ជាទីកំណើតរបស់ខ្ញុំ ដែលខ្ញុំនៅតែចាត់ទុកថា ជាផ្ទះរបស់ខ្ញុំដោយអាចចេញចូលបាន។ ប៉ុន្តែបញ្ហាជំងឺកូវីដនេះ មិនទាន់អនុញ្ញាតឲ្យខ្ញុំមានឱកាសបានទៅមាតុប្រទេសកម្ពុជា ឬទៅប្រទេសបារាំង នោះឡើយ គឺនាំឲ្យខ្ញុំគ្មានការងារអ្វីធ្វើនាពេលបច្ចុប្បន្ននេះ»។
គួររំឭកថា លោក ប៉ែន ផាត បានទៅរស់នៅប្រទេសថៃតាំងពីឆ្នាំ ១៩៧២ ក្នុងពេលដែលកម្ពុជាមានសង្រ្គាម។ ក្នុងរយៈពេលនោះ លោកបានលេងឲ្យក្រុមបាល់ទាត់ជម្រើសជាតិថៃ ដែលមានរហ័ស្សនាមថា «ពស់កេងកង» ហើយលោកជាកីឡាករឆ្នើមរបស់កម្ពុជាតែម្នាក់គត់ ដែលធ្លាប់លេងបាល់ជាមួយស្តេចបាល់ទាត់ប្រេស៊ីល Pele។
អតីតកីឡាករដ៏ឆ្នើមរូបនេះ បានបន្តទៀតថា៖ «ខ្ញុំចង់វិលទៅស្រុកខ្មែរ ដើម្បីជួបជាមួយមិត្តភក្តិចាស់ៗ និងហូបបាយជាមួយគ្នា រំឭកពីអនុស្សាវរីយ៍កន្លងមក ដែលធ្លាប់ជាអ្នកកីឡាដូចគ្នា បន្ទាប់មកខ្ញុំចង់ត្រឡប់ទៅកាន់ប្រទេសបារាំង វិញ ដើម្បីរង់ចាំទទួលកិច្ចសន្យាថ្មី ប៉ុន្តែមិនដឹងថា ពេលណាគេបើកវិញទេ»។
ទាក់ទងនឹងជីវភាពរស់នៅក្នុងពេលជាប់គាំងនៅប្រទេសថៃ នេះ លោក ប៉ែន ផាត បានឆ្លើយតបថា៖ «ពេលកិច្ចសន្យាបញ្ចប់ ខ្ញុំគ្មានប្រាក់ឈ្នួលទៀតទេ ប៉ុន្តែក្នុងមនោសញ្ចេតនា គឺខាងសាលា TKS Academy បានជួយខ្ញុំ ត្រឹមហូបចុក ស្នាក់នៅ ជាបណ្តោះអាសន្នដោយរង់ចាំជំងឺឆ្លងស្ងប់ស្ងាត់ គេបើកផ្លូវហោះហើរចេញចូលបានសិន ទើបខ្ញុំមានឱកាសទៅស្រុកខ្មែរ»៕