ភ្នំពេញៈ ការប្រកួតថ្នាក់ខេត្តពានរង្វាន់សម្តេចហ៊ុនសែន លើកទី ១២ ឆ្នាំ ២០១៨ នឹងត្រូវធ្វើការប្រកួតវគ្គខ្វែង ១៦ ក្រុមចុងក្រោយ នៅលើទីលានចំនួន ៨ ផ្សេងពីគ្នា នារសៀលម៉ោង ៣ ដូចគ្នា ថ្ងៃពុធនេះ ដើម្បីស្វែងរកក្រុមឈ្នះចំនួន ៨ ក្រុម ឡើងទៅប្រកួតវគ្គ ១/៤ ផ្តាច់ព្រ័ត្រ ជាបន្តទៀត។
តាមរយៈការចាប់ឆ្នោតកន្លងមកនេះ ក្រុមពូល C ខេត្តមណ្ឌលគិរី ដែលបានឡើងមកដល់វគ្គ ១៦ ក្រុមនេះ ដោយស្វ័យប្រវត្តិ ព្រោះមានតែ ១ ក្រុម ត្រូវស្វាគមន៍ក្រុមលេខ ១ ពូល A ខេត្តប៉ៃលិន នៅលើកីឡដ្ឋានខេត្តមណ្ឌលគិរី ឯក្រុមលេខ ៣ ពូល D ខេត្តកោះកុង ត្រូវធ្វើជាម្ចាស់ផ្ទះ ក្នុងការទទួលក្រុមលេខ ៣ ពូល B ខេត្តត្បូងឃ្មុំ។
ចំណែកក្រុមលេខ ៤ ល្អពូល D ខេត្តកំពត ត្រូវស្វាគមន៍ក្រុមលេខ ៣ ពូល A ខេត្តបាត់ដំបង នៅកីឡដ្ឋានខេត្តកំពត ស្របពេលក្រុមលេខ ៤ ល្អពូល B ខេត្តព្រៃវែង ត្រូវទទួលក្រុមលេខ ៤ ល្អពូល E ខេត្តកំពង់ធំ នៅកីឡដ្ឋានខេត្តព្រៃវែង ហើយក្រុមលេខ ១ ពូល B ខេត្តកំពង់ចាម ត្រូវប្រកួតជាមួយក្រុមលេខ ១ ពូល E ខេត្តសៀមរាប នៅកីឡដ្ឋានខេត្តកំពង់ចាម។
ជាមួយគ្នានេះ ក្រុមលេខ ២ ពូល A គិរីវង់អេហ្វស៊ី និងត្រូវជួបក្រុមលេខ ២ ពូល B យុវជនក្រសួងការពារជាតិ នៅកីឡដ្ឋានគិរីវង់ ហើយក្រុមលេខ ២ ពូល E ស៊ីម៉ាក់អេហ្វស៊ី ត្រូវស្វាគមន៍ក្រុមលេខ ២ ពូល D ខេត្តព្រះសីហនុ នៅពហុកីឡដ្ឋានជាតិ ខណៈក្រុមលេខ ៣ ពូល E ខេត្តឧត្តរមានជ័យ ត្រូវប្រឈមជាមួយក្រុមលេខ ១ ពូល D យុវជនបាល់ទាត់ជាតិ U18 នៅលើទឹកដីខ្លួនឯង គឺកីឡដ្ឋានខេត្តឧត្តរមានជ័យ។
យោងតាមការចាប់ឆ្នោតនេះ វាបានបង្ហាញឲ្យឃើញពីរឿងដ៏គួរឲ្យចាប់អារម្មណ៍មួយ ខណៈក្រុមដែលមានប្រភពចេញពីពូលជាមួយគ្នា មិនបានជួបគ្នាសូម្បីតែ ១ គូនោះ ស្របពេលក្រុមខ្លាំងៗ ត្រូវជួបគ្នា ប៉ុន្តែក្រុមខេត្តព្រៃវែង ខេត្តត្បូងឃ្មុំ និងខេត្តកំពត ដែលបានឡើងមកដល់វគ្គ ១៦ ក្រុមនេះ ក្នុងនាមជាក្រុមលេខ ៤ ល្អនោះ បែរជាគេចផុតពីក្រុមខ្លាំងៗទៅវិញ។
នៅក្នុងចំណោមការប្រកួតទាំង ៨ គូនេះ ត្រូវបានគេមើលឃើញថា ការជួបគ្នារវាងក្រុមខេត្តកំពង់ចាម និងខេត្តសៀមរាប ព្រមទាំងការប៉ះគ្នារបស់គិរីវង់អេហ្វស៊ី និងយុវជនក្រសួងការពារជាតិ រួមជាមួយជំនួបរវាងក្រុមស៊ីម៉ាក់អេហ្វស៊ី និងខេត្តព្រះសីហនុ គឺអាចនឹងមានភាពតានតឹងខ្លាំង ពិបាកក្នុងការព្យាកររកក្រុមឈ្នះ ព្រោះក្រុមទាំង ៦ នេះ សុទ្ធតែធ្វើបានល្អ ក្នុងការប្រកួតជម្រុះតាមពូលកន្លងមកនេះ។
ប៉ុន្តែក្រុមខេត្តឧត្តរមានជ័យ អាចនឹងមានការលំបាក ក្នុងការទប់ទល់ជាមួយក្រុមយុវជនបាល់ទាត់ជាតិ U18 ឆ្នាំ ព្រោះក្រុមថ្នាលមួយនេះ មានការហ្វឹកហាត់យ៉ាងត្រឹមត្រូវ នៅមជ្ឈមណ្ឌលនិងសាលបាល់ទាត់ជាតិបាទី ក្រោមការទំនុកបម្រុងរបស់សហព័ន្ធកីឡាបាល់ទាត់កម្ពុជា ហើយពួកគេ ជាក្តីសង្ឃឹមរបស់កម្ពុជា ក្នុងការចូលរួមប្រកួតប្រជែងក្នុងស៊ីហ្គេម ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ៕