.jpg)
ចាន់ វឌ្ឍនាកា រកបានគ្រាប់បាល់ទី ១ ដើម្បីជួយឲ្យក្រុមបឹងកេត ឈ្នះក្រុមប៉ូលិស ១-០។ ស្រេង ម៉េងស្រ៊ុន
ភ្នំពេញៈ ខ្សែប្រយុទ្ធ ចាន់ វឌ្ឍនាកា បានរកឃើញគ្រាប់បាល់ដំបូង សម្រាប់ការវិលមកលេងនៅលីកកំពូលកម្ពុជា ឆ្នាំ ២០១៨ របស់ខ្លួនហើយ ហើយវាក៏ជាគ្រាប់បាល់ដ៏មានន័យបំផុត ក្នុងការជួយក្រុមបឹងកេតដែរ ចំណែកអ្នកចាំទី សំ ពៅ បានធ្វើឲ្យក្រុមណាហ្គាវើល ជួបការខកចិត្តនៅលើទឹកដីខេត្តសៀមរាប ជាមួយការសង្គ្រោះបាល់ដ៏អស្ចារ្យរបស់គេ ឯក្រសួងការពារជាតិ បានបង្កើតកំណត់ត្រាច្រំដែល ក្នុងការយកឈ្នះក្រុមអាស៊ីអឺរ៉ុប។
ចាន់ វឌ្ឍនាកា ត្រូវបានគ្រូបង្វឹកលោក ហៅ សុជាតិ ដាក់ឲ្យចូលលេងនៅក្នុងជម្រើស ១១ នាក់ដំបូង ជាលើកទី ១ បន្ទាប់ពីរូបគេ មិនបានបង្ហាញខ្លួន កាលពីសប្តាហ៍មុន។ ការប្រកួត នៅពហុកីឡដ្ឋានជាតិ កាលពីយប់ថ្ងៃសៅរ៍នោះ វឌ្ឍនាកា បានតែតបាល់បញ្ចូលទីជួយឲ្យក្រុមបឹងកេត ឈ្នះក្រុមប៉ូលិស ១-០ ទាំងលំបាក នៅនាទីទី ៧២ ខណៈ Gbenga បានលើកបាល់កាត់ចូលក្នុងតំបន់គ្រោះថ្នាក់យ៉ាងល្អនោះ។
បើទោះបីជា ការឈ្នះប៉ូលិស ត្រឹម ១-០ នេះវាបានបង្ហាញពីការថមថយនូវចំនួនគ្រាប់បាល់ បើប្រៀបធៀបទៅនឹងការជួបគ្នាជើងទី ១ ដែលបឹងកេត បានឈ្នះប៉ូលិស រហូតដល់ ៥-១ ប៉ុន្តែ ១ គ្រាប់របស់ វឌ្ឍនាកា នេះបានក្លាយជាជ័យជម្នះយ៉ាងសំខាន់បំផុត ក្នុងការជួយឲ្យក្រុមបឹងកេត មានភាគរយ កាន់តែខ្ពស់ ក្នុងការប្រជែងយកពាននៅឆ្នាំនេះ។
ការមាន ៣៦ ពិន្ទុ បានធ្វើឲ្យក្រុមបឹងកេត មាន ៤ ពិន្ទុ ដាច់ពីក្រុមណាហ្គាវើល ដែលជាគូប្រជែងរបស់ខ្លួន ព្រោះការប្រកួតជើងទី ២ ជាមួយក្រុមអង្គរថាយហ្គឺរ នៅលើទឹកដីខេត្តសៀមរាប កាលពីថ្ងៃអាទិត្យ ណាហ្គាវើល ទទួលបានត្រឹម ១ ពិន្ទុ ដើម្បីមាន ៣២ ពិន្ទុ។ ណាហ្គាវើល បានត្រឹមស្មើ ១-១ ជាមួយអង្គរថាយហ្គឺរ ដែលពួកគេធ្លាប់ឈ្នះ ៣-០ កាលពីជើងទី ១។
ខ្សែប្រយុទ្ធ Joichiro បានរកគ្រាប់បាល់នាំមុខឲ្យក្រុមអង្គរថាយហ្គឺរ ១-០ តាំងពីនាទីទី ១៥ ប៉ុន្តែខ្សែប្រយុទ្ធ Matthew Osa វាយបកបាន ១ គ្រាប់វិញឲ្យណាហ្គាវើល នៅនាទីទី ៤០។ ក្រោយការតាមស្មើនេះ ណាហ្គាវើល បានបង្កើនការវាយលុកទៅលើក្រុមអង្គរថាយហ្គឺរ យ៉ាងខ្លាំង ហើយបានបង្កើតឱកាសក្នុងការស៊ុត និងតែតបាល់ចំគោលដៅជិត ១០ គ្រាប់ ប៉ុន្តែអ្នកចាំទី សំ ពៅ សង្គ្រោះបាល់ទាំងនោះ បានយ៉ាងជោគជ័យ។
សំ ពៅ ត្រូវបានអ្នកទស្សនា ចាត់ទុកថាជាកំពូលអ្នកសង្គ្រោះបាល់ ដែលបានជួយឲ្យក្រុមអង្គរថាយហ្គឺរ ចែក ១ ពិន្ទុជាមួយក្រុមណាហ្គាវើល លើកនេះ ដើម្បីមាន ១២ ពិន្ទុ ប៉ុន្តែលទ្ធផលស្មើគ្នានេះ បានធ្វើឲ្យគ្រូបង្គោលក្រុមណាហ្គាវើល លោក មាស ចាន់ណា មិនសប្បាយចិត្តនោះទេ ហើយវាក៏ជាពេលដែលណាហ្គាត្រូវធ្វើការងារកាន់តែធ្ងន់ ក្នុងការប្រជែងយកពាននៅឆ្នាំនេះផងដែរ។
ចំណែកក្រុមទ័ព បានយកឈ្នះក្រុមអាស៊ីអឺរ៉ុប ៣-១ បន្ថែមទៅលើការឈ្នះ ២-១ កាលពីជើងទី ១ ហើយការឈ្នះ ៣-១ នេះវាដូចគ្នាទៅនឹងការប្រកួតជម្រុះវគ្គ ១៦ ក្រុមថ្នាក់ជាតិពានរង្វាន់សម្តេច ហ៊ុន សែន កាលពីថ្ងៃពុធអ៊ីចឹងដែរដោយ ទ័ព បានឈ្នះ អាស៊ីអឺរ៉ុប ៣-១ ដូចគ្នា។ ការទទួលបាន ៣ ពិន្ទុនេះ បានជួយឲ្យក្រុមទ័ព មាន ៣០ ពិន្ទុ ខណៈក្រុមសូលទីឡូអង្គរ ក៏បានបន្តឈ្នះក្រុមឈរនៅបាតតារាងវេស្ទើន ៣-០ ដើម្បី ១៤ ពិន្ទុ។
ចំពោះ ២ ប្រកួតទៀត ដែលធ្វើឡើងកាលពីយប់ថ្ងៃអាទិត្យ ម្សិលមិញ ក្រុមព្រះខ័នរាជស្វាយរៀង បានយកឈ្នះក្រុមអគ្គិសនីកម្ពុជា ៤-២ ដើម្បីមាន ២០ ពិន្ទុ ហើយជ័យជម្នះនេះក៏ជាពេលដែល ណុប តុលា រកបាន ២ គ្រាប់តែម្នាក់ឯងជាថ្មីផងដែរ ខណៈ ប្រាក់ មុន្នីឧត្តម និង Silva Junior រកបានម្នាក់ ១ គ្រាប់ ឯ ២ គ្រាប់របស់អគ្គិសនីកម្ពុជា រកបានដោយ ម៉ាត់ នូរុណ។ រីឯក្រុមមាន ២៩ ពិន្ទុស្រាប់ វិសាខា បានយកឈ្នះក្រុមមាន ២១ ពិន្ទុ ភ្នំពេញក្រោន ៣-១៕
