ភ្នំពេញៈ សហព័ន្ធកីឡាវាយកូនឃ្លីលើតុកម្ពុជាគ្រោងនឹងពង្រីកការផ្សព្វផ្សាយ និងបំផុសលើប្រភេទកីឡានេះឲ្យបានទៅដល់គ្រប់ខេត្ត ដើម្បីអាចជ្រើសរើសបានអត្តពលិកល្អយកមកបណ្តុះបណ្តាលបន្ថែម ត្រៀមស៊ីហ្គេម ឆ្នាំ ២០២៣ នៅកម្ពុជា ព្រោះការប្រកួតកីឡាសិស្សថ្នាក់ជាតិលើកទី ១ ឆ្នាំ ២០១៩ ដែលបានបញ្ចប់កាលពីម្សិលមិញគឺប្រភេទកីឡាវាយកូនឃ្លីលើតុមានចំនួនអ្នកចូលរួមតិចដោយមានត្រឹមកីឡាករ ២៨ នាក់ និងកីឡាការិនី ៥ នាក់។
លោក តេង សំណាង អគ្គលេខាធិការរងសហព័ន្ធកីឡាវាយសីកម្ពុជា និងជាប្រធានគ្រប់គ្រងការប្រកួតកីឡាវាយកូនឃ្លីលើតុ សិស្សថ្នាក់ជាតិនេះបានប្រាប់ភ្នំពេញ ប៉ុស្តិ៍ ក្រោយការប្រកួតថា៖ «ពិតណាស់រាជធានីភ្នំពេញនៅតែនាំមុខគេនៅលើការប្រកួតកីឡាវាយកូនឃ្លីលើតុនេះ ព្រោះសិស្សសាលានៅភ្នំពេញមានការលេងកីឡានេះច្រើន ចំណែកអ្នកនៅតាមខេត្ត ដោយសារសហព័ន្ធរបស់យើងនៅមានការខ្វះខាត ទើបយើងមិនទាន់បានផ្សព្វផ្សាយដល់បណ្តាខេត្តឆ្ងាយៗ»។
តាមរយៈការប្រកួតត្រឹម ៣ ថ្ងៃនៅលើប្រភេទវិញ្ញាសាចំនួន ៤ គឺក្រុមអត្តពលិករបស់រាជធានីភ្នំពេញបានឈ្នះមេដាយ ២ នៅលើវិញ្ញាសាជាក្រុម និងវិញ្ញាសាវាយគូបុរសរបស់កីឡាករ កាង យូឃាង និង ទៀ ហុកលី ហើយភ្នំពេញក៏ឈ្នះបានមេដាយប្រាក់ ១ ទៀតផងដែរ។ ចំណែកមេដាយមាសលើវិញ្ញាសាឯកត្តជននារីបានទៅលើកីឡាការិនី យិន ចាន់រតនា របស់ខេត្តកំពង់ចាម ហើយឯកត្តជនបុរស មេដាយមាសបានទៅកីឡាករ យីវ សុវណ្ណបញ្ញា របស់ខេត្តកំពត។
លោក តេង សំណាង បានបន្ថែមថា៖ «ចំនួនអ្នកចូលរួមការប្រកួតនេះនៅមានកម្រិត ព្រោះនៅខេត្តមួយចំនួននៅមិនទាន់មានកន្លែងលេងកីឡាវាយកូនឃ្លីលើតុទេ ហេតុនេះជាយុទ្ធសាស្ត្ររបស់សហព័ន្ធនៅក្នុងឆ្នាំ ២០១៩ នេះគឺយើងនឹងព្យាយាមបញ្ជ្រាបកីឡានេះទៅដល់គ្រប់បណ្តាខេត្តទាំងអស់ ហើយបើមានលទ្ធភាព យើងនឹងផ្តល់ជាតុ និងបញ្ជូនគ្រូបង្វឹកទៅបំផុស និងជួយបង្វឹកថែមទៀត ព្រោះបើយើងមិនធ្វើបែបនេះគឺនៅតាមខេត្តភាគច្រើននៅតែអត់សូវស្គាល់កីឡានេះដដែល»។
លោកបានបញ្ជាក់ថា៖ «ការបំផុសក៏ដូចការគ្រោងបង្កើតឲ្យមានលេងកីឡាវាយកូនឃ្លីលើតុនៅគ្រប់ខេត្តនេះគឺយើងចង់ជ្រើសរើសបានអត្តពលិកនៅតាមខេត្តយកមកបណ្តុះបណ្តាល ហើយបើពួកគេមានទេពកោសល្យគឺយើងអាចបណ្តុះបណ្តាលពីថ្នាលរហូតដល់ចូលជម្រើសជាតិ ដើម្បីត្រៀមទៅកាន់ការប្រកួតស៊ីហ្គេមឆ្នាំ ២០២៣»។
យ៉ាងណាក៏ដោយលោក តេង សំណាង បានសរសេរក្រុមអត្តពលិកមកពីខេត្តត្បូងឃ្មុំ និងខេត្តរតនគិរីថា ពួកគេមានទឹកដៃលេងបានល្អ ព្រោះខេត្តទាំង ២ នេះដណ្តើមបានមេដាយសំរឹទ្ធចំនួន ១ ដូចគ្នា៕