អាមេរិក៖ មន្ត្រីនៅទីក្រុង Los Angeles បានបញ្ជាក់ពីថ្ងៃអាទិត្យថា មនុស្សចំនួន ៩ នាក់បានស្លាប់ នៅក្នុងគ្រោះថ្នាក់ធ្លាក់ឧទ្ធម្ភាគចក្រក្នុងនោះមានវីរបុរសបាល់បោះនៃសមាគមបាល់បោះជាតិ (NBA) គឺលោក Kobe Bryant និងកូនស្រីអាយុ ១៣ ឆ្នាំ របស់រូបគាត់ផងដែរ។
ស្នងការក្រុង Los Angeles លោក Alex Villanueva បាននិយាយថា អ្នកដំណើរចំនួន ៨ នាក់ និងអ្នកបើកម្នាក់បានស្លាប់ក្នុងគ្រោះថ្នាក់នេះ។
លោក Villianueva បានបញ្ជាក់ថា៖ «គ្មានអ្នកណាម្នាក់នៅរស់នោះទេ ហើយមនុស្សចំនួន ៩ នាក់ បានជិះនៅក្នុងឧទ្ធម្ភាគចក្រនេះ គឺអ្នកបើកម្នាក់ និងអ្នកដំណើរចំនួន ៨ នាក់»។
ឧទ្ធម្ភាគចក្រនេះបានធ្លាក់នៅក្នុងអាកាសធាតុអាប់អួនៅជាយក្រុង Los Angeles ជិតទីក្រុង Calabasas រដ្ឋកាលីហ្វ័រនីញ៉ា សហរដ្ឋអាមេរិក។
អភិបាលក្រុង Los Angeles លោក Eric Garcetti បានបញ្ជាក់ថា ក្មេងស្រី Gianna ជាកូនស្រីរបស់វីរបុរសបាល់បោះ Bryant ក៏បានស្ថិតនៅក្នុងចំណោមជនរងគ្រោះនោះផងដែរ។
លោក Garcetti បានសរសេរតាមប្រព័ន្ធ Twitter ថា៖ «ក្រុង Los Angeles សូមចូលរួមរំលែកទុក្ខជាមួយគ្រួសាររបស់លោក Bryant ចំពោះការបាត់បង់អាយុជីវិតក្មេងស្រី Gianna ជាមួយឪពុក និងមិត្តភក្តិរបស់នាងនៅក្នុងសោកនាដកម្មនៅថ្ងៃនេះ»។
តាមរបាយការណ៍អាមេរិកបានឲ្យដឹងថា អតីតតារាបាល់បោះក្នុងក្របខ័ណ្ឌ NBA អាយុ ៤១ ឆ្នាំរូបនេះ និងកូនស្រី Gianna កំពុងធ្វើដំណើរទៅចូលរួមការប្រកួតរបស់កូនស្រីគាត់នៅពេលឧទ្ធម្ភាគចក្ររបស់ពួកគេបានធ្លាក់នោះ។
ប្រព័ន្ធផ្សព្វផ្សាយមូលដ្ឋានបាននិយាយថា ជនរងគ្រោះផ្សេងទៀតបានរួមបញ្ចូលទាំងកីឡាករម្នាក់ និងឪពុកឬម្ដាយម្នាក់ផ្សេងទៀតផងដែរ។
ក្រុមបាល់បោះ Orange Coast College បានបញ្ជាក់ថា គ្រូបង្វឹកបាល់បោះរបស់ក្លិបនេះ គឺលោក John Altobelli អាយុ ៥៦ ឆ្នាំក៏បានស្ថិតនៅក្នុងឧទ្ធម្ភាគចក្រនេះដែរ។
ទូរទស្សន៍ CNN បាននិយាយថា ភរិយារបស់លោក Altobelli គឺអ្នកស្រី Keri និងកូនស្រីម្នាក់របស់ពួកគេឈ្មោះ Alyssa ក៏បានស្ថិតនៅក្នុងឧទ្ធម្ភាគចក្រនេះដែរ។
លោក Villaneuva បានប្រាប់ក្រុមអ្នកកាសែតថា មន្ត្រីអាជ្ញាធរមិនទាន់កំណត់អត្តសញ្ញាណជនរងគ្រោះទាំងអស់នៅឡើយទេដោយរង់ចាំការបញ្ជាក់ពីសមាជិកក្រុមគ្រួសារ និងពីមន្ត្រីធ្វើកោសល្យវិច័យ។
លោក Villanueva បានបន្តថា៖« វាពិតជាគួរឱ្យក្រៀមក្រំចិត្តណាស់នៅពេលដឹងថា មនុស្សជាទីស្រឡាញ់របស់អ្នកបានស្លាប់ ហើយអ្នកបានដឹងពីហេតុការណ៍នេះតាមរយៈ ការធ្វើតេស្ត TMZ»។
ក្រុមប្រឹក្សាសុវត្ថិភាពដឹកជញ្ជូនជាតិ (NTSB) បាននិយាយថា ក្រុមប្រឹក្សានេះកំពុងបញ្ជូនក្រុមមួយដែលមានសមាជិក ១៨ នាក់ ទៅកាន់រដ្ឋកាលីហ្វ័រនីញ៉ា ដើម្បីជួយធ្វើការស៊ើបអង្កេតចំពោះគ្រោះថ្នាក់នេះ។
អ្នកស្រី Jennifer Homendy សមាជិកនៃក្រុមប្រឹក្សា NTSB បាននិយាយថា៖ «ក្រុមរបស់យើងនឹងស្វែងយល់ពីប្រវត្តិអ្នកបើក និងអាកាសយានិកនេះព្រមទាំងអ្វីផ្សេងៗទៀតពាក់ព័ន្ធនឹងគ្រោះថ្នាក់នេះ»៕ APF/SN